اتىراۋدا دومبىرا پىشىندەس كونسەرت زالىنىڭ قۇرىلىسى باستالادى
اتىراۋ. KAZINFORM - بيىل اتىراۋ قالاسىندا 2 مىڭ ورىندىق كونسەرت زالى مەن تاريحي-ولكەتانۋ مۇراجايىنىڭ قۇرىلىسى باستالادى. دومبىرا پىشىندەس جاڭا نىسان ءۇشىن قۇرىلىسى اياقتالماي قالعان كونسەرت زالىنىڭ نىسانى بۇزىلادى.
وڭىرلىك كوممۋنيكاتسيالار قىزمەتىنىڭ اقپاراتىنا قاراعاندا، قازىر قۇرىلىس نىسانىنىڭ جوبالاۋ-سمەتالىق قۇجاتتاماسىن جاساۋ قولعا الىنعان.
«اتىراۋ قالاسىندا قۇرىلىسى توقتاپ تۇرعان كونسەرت زالىنىڭ عيماراتىن بۇزۋ ءۇشىن جوبالىق-سمەتالىق قۇجاتتاما دايىندالىپ، ساراپتامانىڭ وڭ قورىتىندىسى الىندى. جاڭا كونسەرت زالى بۇزىلعان عيماراتتىڭ ورنىنا سالىنادى. قۇرىلىستىڭ باس جوبالاۋشىسى - «Engeneering Center ltd» ج ش س كومپانياسى. جاڭا نىسان ءۇشىن 5,1 گەكتار جەر تەلىمى ءبولىندى. نىساننىڭ جالپى اۋماعى 34 مىڭ 618 شارشى مەتر. جوبالاۋدى 2024-جىلدىڭ ءۇشىنشى توقسانىندا، قۇرىلىس جۇمىستارىن 2026-جىلى اياقتاۋ جوسپارلاندى»، - دەپ حابارلادى وڭىرلىك كوممۋنيكاتسيالار قىزمەتى.
جاڭا نىساننىڭ الدىنعى قاسبەتى دومبىرا پىشىندەس بولادى. عيماراتتىڭ ەكى قاباتىندا دا كونسەرت زالى قاراستىرىلعان. ونىڭ ءبىرى - 1200 ورىندىق. سونداي- اق، مۇراجاي فويەسى مەن ەكسپوزيتسياسىن، حورەوگرافيا جانە مۋزىكالىق ستۋديالار اشۋ جوسپارلانعان. قالا كورىنىسىن تاماشالاۋ ءۇشىن شولۋ ءليفتىسى ورناتىلادى.
ەسكە سالا كەتەلىك، بۇعان دەيىن اتىراۋدا كاسىپكەرلەر ءۇشىن قۇقىقتىق الگوريتم ازىرلەنەتىنىن جازعان ەدىك.
اۆتور
جولداسبەك شوپەعۇل
