اتىراۋدا دومبىرا پىشىندەس كونسەرت زالى قاشان سالىنادى
اتىراۋ. KAZINFORM - پرەزيدەنت 2022 -جىلعى قاراشادا اتىراۋعا كەلگەن ساپارىندا مادەنيەت ورتالىعىن سالىپ، وعان قۇرمانعازىنىڭ اتىن بەرۋدى تاپسىردى. سودان بەرى ءۇش جىلعا جۋىق ۋاقىت وتسە دە، جاڭا نىساننىڭ قۇرىلىسى باستالعان جوق.
- وبلىستاعى مادەنيەت سالاسىن دامىتۋعا ەرەكشە نازار اۋدارۋ قاجەت. قالادا مادەنيەت ورىندارىنىڭ كوبىرەك بولعانى ءجون. مەن اتىراۋ قالاسىندا دارىندى جاستار ءۇشىن مادەنيەت جانە شىعارماشىلىق ورتالىعىن سالۋدى تاپسىرامىن. ونى قازاق كۇي ونەرىنىڭ الىبى - قۇرمانعازىنىڭ اتىمەن اتاۋدى ۇسىنامىن، - دەگەن ەدى پرەزيدەنت.
مۇنايلى شاھارداعى كونسەرت زالىنىڭ قۇرىلىسى 2012 -جىلى توقتاپ قالدى. جەرگىلىكتى اكىمدىك «ساقالدى» قۇرىلىسقا اينالعان نىساندى قايتا جاڭعىرتۋ ءۇشىن ينۆەستور ىزدەدى.
شەتەلدىك كومپانيالار توقتاعان قۇرىلىستى جانداندىرۋعا نيەت بىلدىرگەنىمەن كەلىسىم جاسالعان جوق.
كەيىن جەرگىلىكتى اكىمدىك كونسەرت زالىنىڭ نىسانىن ساۋدا ورتالىعىنا اينالدىرۋدى كوزدەدى. بۇل قادام اياقسىز قالدى.
پرەزيدەنت اتىراۋ قالاسىنىڭ كوركىن بۇزىپ، سۇيەلدەي بولعان كونسەرت زالىن سىنعا الىپ، جاڭا مادەنيەت ورتالىعىن سالۋعا تاپسىرما بەردى.
سودان بەرى ءۇش جىلعا جۋىق ۋاقىت وتسە دە، جاڭا نىساننىڭ قۇرىلىسى ءالى باستالعان جوق. قۇرىلىس جۇمىستارى قاشان باستالاتىنى ازىرگە ايتىلعان جوق.
اتىراۋ وبلىسى اكىمىنىڭ باسپا ءسوز حاتشىسى رۋسلان جۇماعازيەۆتىڭ ۇسىنعان اقپاراتىنا قاراعاندا جاڭا نىساننىڭ جوبالىق- سمەتالىق قۇجاتى ساراپتامادا جاتىر.
- جوبالىق- سمەتالىق قۇجاتتاماعا سايكەس كونسەرت زالى مەن تاريحي-ولكەتانۋ مۋزەيى ءۇش بلوكقا بولىنەدى. ءبىرىنشى بلوكتا 1200 ورىندىق كونسەرت زالى مەن بولمە قاراستىرىلىپ وتىر، - دەپ حابارلادى رۋسلان جۇماعازيەۆ.
بۇل بلوكتا كورەرمەندەرگە ارنالعان ۇلكەن ۆەستيبيۋل، فويە مەن كۋلۋارلار، بۋفەتتەر بولادى دەپ كوزدەلگەن. ەكى كونفەرەنتس-زالى بولادى. ونىڭ ءبىرى - 100، ەكىنشىسى - 50 ورىندىق.
سونداي-اق 40 ورىندىق VIP زال، وركەسترگە ارنالعان ساحنا، ونەر ۇجىمدارىنىڭ رەپەتيتسيا جاسايتىن بىرنەشە زالى مەن دىبىس جازۋ ستۋدياسى اشىلادى.
- ال ەكىنشى بلوكقا تاريحي-ولكەتانۋ مۋزەيىن ورنالاستىرۋ جوسپارلانىپ وتىر. كەشەن قۇرامىنا ساندىق جانە عىلىمي كىتاپحانا، عىلىمي زەرتحانا، شەبەرحانالار مەن مۇراعات، قور، كورمە، ەكسپوزيتسيالىق جانە كونفەرەنتس-زال كىرەدى، - دەيدى رۋسلان جۇماعازيەۆ.
مادەنيەت ورتالىعىنىڭ ءۇشىنشى بلوگى وزگەشە بولعالى تۇر. بۇل - الدىڭعى ەكى بلوكتى ءبىر-بىرىمەن جالعاستىراتىن «دومبىرا» مونۋمەنتىندەگى باقىلاۋ الاڭى.
مۇندا كاسسالىق گالەرەيا، مونۋمەنتتەگى ليفتى مەن باسپالداق الاڭى بار فويە ورنالاسادى. ءار بلوكتا اكىمشىلىك جانە قوسالقى بولمەلەر قاراستىرىلعان.
ەسكە سالا كەتەلىك، بۇدان بۇرىن اتىراۋدا 11 جىل بۇرىن باستالعان فارماتسيەۆتيكالىق زاۋىت قۇرىلىسى سول كۇيى توقتاپ تۇرعانىن حابارلاعان بولاتىنبىز.
اۆتور
جولداسبەك شوپەعۇل
