اتىراۋ وبلىسىندا تۇرعىندار سانى 700 مىڭنان استى

Атырау облысында тұрғындар саны 700 мыңнан асты
Фото: atr.kz

اتىراۋ. KAZINFORM - اتىراۋ وبلىسىندا تۇرعىندار سانى 703180 ادامعا جەتتى. تۇرعىنداردىڭ باسىم بولىگى اتىراۋ قالاسىندا تۇرادى.

ۇلتتىق ستاتيستيكا بيۋروسى اتىراۋ وبلىسى بويىنشا دەپارتامەنتىنىڭ باسشىسى نۇرجان قۇمارعاليەۆتىڭ دەرەگىنە سۇيەنسەك، اتىراۋ قالاسىندا 389669 ادام تۇراتىنى انىقتالعان. ال 313511 ادام اۋىلداردا قونىستانعان.

«كەيىنگى بەس جىلدا ءوڭىر تۇرعىندارىنىڭ سانى 57900 ادامعا ارتتى. ءوسىم - 9 پايىز. ماسەلەن، قالا تۇرعىندارى %10,6 عا، ال اۋىلدىقتار قاتارى %7 عا ءوسىپ وتىر. بىلتىرعى 11 ايدا 15156 ءسابي دۇنيەگە كەلدى. ونىڭ ىشىندە 7892 ۇل، 7264 قىز بار. تۇرعىنداردىڭ تابيعي ءوسىمى 12 مىڭ 20 ادام بولدى. وتكەن جىلى 3980 نەكە قيۋ، 396 نەكەنى بۇزۋ تۋرالى اكت جازباسى تىركەلدى»، - دەپ حابارلادى نۇرجان قۇمارعاليەۆ.

ونىڭ مالىمەتىنشە، وبلىستان 27 مىڭ 953 ادام كوشىپ كەتكەن. ماسەلەن، سىرتقى كوشى- قون بويىنشا 121 ادام، ونىڭ ىشىندە ت م د ەلدەرىنە 74، الەمنىڭ باسقا ەلدەرىنە 47 ادام قونىس اۋدارعان.

«اتىراۋ وبلىسىنا وزگە وڭىرلەردەن كوشىپ كەلگەندەر سانى - 26 مىڭ 34 ادام. ونىڭ ىشىندە سىرتقى كوشى- قون بويىنشا كەلگەن 562 ادام، ناقتىلاي ايتقاندا، ت م د ەلدەرىنەن - 533، ال الەمنىڭ باسقا مەملەكەتتەرىنەن 29 ادام كوشىپ كەلدى. ال قازاقستاننىڭ باسقا وڭىرلەرىنەن 6441 ادام اتىراۋ وڭىرىنە قونىس اۋداردى. ماسەلەن، اقتوبە وبلىسىنان كوشىپ كەلگەندەر سانى - 18,9، استانادان 16,6، ماڭعىستاۋ وبلىسىنان كەلگەندەر 15,8 پايىز»، - دەپ ءمالىم ەتتى نۇرجان قۇمارعاليەۆ.

ەسكە سالا كەتەلىك، بۇعان دەيىن بىلتىر اتىراۋ وبلىسىنا شەتەلدەن 272 ەتنيكالىق قازاق كوشىپ كەلگەنىن حابارلاعان ەدىك.

اۆتور

جولداسبەك شوپەعۇل

سوڭعى جاڭالىقتار