اتىراۋ وبلىسىندا جولاۋشىلار پويىزى بەس تۇيەنى باسىپ كەتتى
اتىراۋ وبلىسىندا «ۆولگوگراد- تاشكەنت» باعىتىنا قاتىنايتىن جولاۋشىلار پويىزى 5 تۇيەنى باسىپ كەتتى. تەپلوۆوز ماشينيسى شۇعىل تەجەۋ تەتىگىن ىسكە قوسقانىمەن، پويىز توقتاپ ۇلگەرمەگەن، دەپ حابارلايدى Kazinform.
كولىكتەگى پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، وقيعا 13-قاڭتاردا بولعان.
«جىلىوي اۋدانىنداعى قۇلسارى تەمىرجول ستانساسىنىڭ ماشينيسى شۇعىل تەجەۋ تەتىگىن ىسكە قوستى. بۇعان تەمىرجول بويىندا بىرنەشە تۇيەنىڭ جۇرگەنى سەبەپ بولعان. الايدا، جولاۋشىلار پويىزى توقتاپ ۇلگەرمەي، بەس تۇيەنى باسىپ كەتتى»، - دەپ حابارلادى دەپارتامەنتتىڭ باسپا ءسوز قىزمەتى.
تۇلىك يەسىنىڭ تەمىرجول بويىندا مال جايۋى - زاڭسىز ارەكەت. سول سەبەپتى، مال يەسى اكىمشىلىك جاۋاپكەرشىلىككە تارتىلدى.
«شۇعىل تەجەۋ جانە جانۋارلارمەن سوقتىعىستىڭ سالدارىنان پويىزدار ۇزاق تۇرىپ قالادى. لوكوموتيۆتەر زاقىمدانىپ، شىعىنعا ۇشىرايدى. وسىعان بايلانىستى كولىكتەگى پوليتسيا دەپارتامەنتى ءۇي جانۋارلارىنىڭ يەلەرىنە قاۋىپسىزدىك شارالارىن ەسكەرىپ، تەمىرجول ماڭىندا مال جايۋدا ساق بولۋدى ەسكەرتەدى»، - دەپ ءمالىم ەتتى دەپارتامەنتتىڭ باسپا ءسوز قىزمەتى.
ەسكە سالا كەتەلىك، بۇدان بۇرىن اتىراۋ وبلىسىندا مال ىزدەۋگە شىققان 3 ادام جوعالىپ كەتكەنىن حابارلاعان بولاتىنبىز.
اۆتور
جولداسبەك شوپەعۇل