اتىراۋ وبلىسىندا 800 كيىكتىڭ ولەكسەسى تابىلدى

استانا. قازاقپارت - اتىراۋ وبلىسىنىڭ قۇرمانعازى اۋدانىندا كيىكتەر قىرىلىپ جاتىر. وسىدان 10 كۇن بۇرىن تۇرعىندار جازىق دالادا جايراپ جاتقان 600-گە تارتا اقبوكەننىڭ ولەكسەسىن تاۋىپ، دابىل قاققان. 

جانۋارلاردىڭ ولىمىنە كەنەنىڭ كوبەيۋى سەبەپ. ەندى زيانكەس جاندىك ءتورت-تۇلىككە جابىسسا، شىعىنعا ۇشىرايمىز با دەپ الاڭدايدى شارۋالار. ءبىراق ماماندار مۇنىمەن كەلىسپەي وتىر. ولاردىڭ پايىمىنشا، بىلتىر تۋعان لاقتاردىڭ قىستان ارىپ شىعۋىنان جانە كۇزگى شاعىلىستان كەيىن السىرەگەن تەكەلەردىڭ تابيعي كۇيىمەن بايلانىستى.

 ينسپەكتورلاردىڭ مونيتورينگى ناتيجەسىندە وبلىس اۋماعىندا شامامەن 15 مىڭعا جۋىق كيىك شوعىرلانعانى انىقتالدى. كۇنى بۇگىنگە دەيىن 800-دەن استام ولەكسە جينالىپ جويىلدى.

ءالىم تامەنوۆ، سۇيىندىك اۋىلىنىڭ تۇرعىنى:

- كيىك دەگەن جايراپ جاتىر. قورادا وزىمىزگە كەنە شابادى. شەشىنىپ، جۋىنىپ كىرەمىز. تەكە قىرىلىپ قالدى عوي، ەندى. قىس قاتتى بولدى. مال دا قىرىلدى، جىلقى دا قىرىلدى. 1985 -جىلدان بەرى بولماعان قىس ەكەن، ۇلكەندەردىڭ ايتۋىنشا.  كوپ كيىگىمىز رەسەيگە «ۆولگا» وزەنىمەن استراحان وبلىسىنا ءوتتى. 

24.kz