اتىراۋ اكىمى بوگەتتى نىعايتۋعا كومەكتەسكەن 92 جاستاعى اجەگە پرەزيدەنتتىڭ العىسىن جەتكىزدى
اتىراۋ. KAZINFORM - اتىراۋ وبلىسىنىڭ اكىمى سەرىك شاپكەنوۆ بوگەتتى نىعايتۋعا كومەكتەسكەن 92 جاستاعى اجەمەن كەزدەستى. وعان پرەزيدەنتتىڭ العىسىن جەتكىزدى.
ماحامبەت اۋدانىنداعى بەيبارىس اۋىلىندا تۇراتىن ورىنشا قوجيەۆانىڭ جاسى - 92-دە. ول 10 بالاسىنان 16 نەمەرە مەن 10 شوبەرە ءسۇيىپ وتىر. «پەرۆومايسكيي» ج ش س- دا، كەيىن زەينەتكەرلىككە شىققانعا دەيىن مەكتەپتە جۇمىس ىستەگەن.
ال كەيىنگى كۇندەرى اۋىلداستارىنا جايىق وزەنىنىڭ جاعالاۋىن نىعايتۋ ءۇشىن قاپقا توپىراق تولتىرۋعا كومەكتەسكەن. بۇل تۋرالى الەۋمەتتىك جەلىدە ۆيدەو تاراعان.
«بەيبارىس اۋىلىنداعى مەكتەپ ۇجىمىنا جاعالاۋدى نىعايتۋ جۇمىسىنا ۇلەس قوستىڭىز. پرەزيدەنت قوڭىراۋ شالىپ، جانقيارلىق ەڭبەگىڭىز ءۇشىن العىس ايتۋدى تاپسىردى. ءسىز سۋ تاسقىنىنا دايىندىق جۇمىسىنا ۇلەسىڭىزدى قوسىپ، جاستارعا ۇلگى بولىپ وتىرسىز»، - دەدى سەرىك شاپكەنوۆ.
ورىنشا قوجيەۆانىڭ ايتۋىنشا، ەلدى مەكەندى تاسقىن سۋدان قورعاۋ -بارشانىڭ پارىزى. سول سەبەپتەن ۇيىندە وتىرا الماعان.
«قازىر ءبىراز جاسقا كەلىپ قالدىم. سوندىقتان مەنىڭ قولىمنان قۇم تولتىرىلاتىن قاپتى جەدەل دايىنداپ وتىرۋ عانا كەلەدى. تابيعاتتىڭ توسىن مىنەزىن بولجاۋ مۇمكىن ەمەس. وسى جاسىما دەيىن مۇندايدىڭ تالايىن كوردىك. سوندىقتان سۋ تاسقىنىنا الدىن الا دايىندالۋ كەرەك»، - دەيدى ورىنشا قوجيەۆا.
وبلىس اكىمى بۇگىن اتىراۋ وبلىسىندا تابيعي سيپاتتاعى توتەنشە جاعداي رەجيمىن جاريالاۋدىڭ ماقساتىنا توقتالدى.
«بۇل - جەرگىلىكتى اتقارۋشى ورگاندار مەن ءتيىستى قىزمەتتەردىڭ الداعى سۋ تاسقىنىنا قارسى دايىندىعىن كۇشەيتۋ ماقساتىندا جاسالعان قادام. دۇربەلەڭگە سالىنۋعا، ۇرەيلەنۋگە ەش سەبەپ جوق»، - دەدى سەرىك شاپكەنوۆ.
ەسكە سالا كەتەلىك، بۇعان دەيىن اتىراۋ وبلىسىندا توتەنشە جاعداي جاريالانعان بولاتىن.
سونداي-اق، اتىراۋ وبلىسىندا ەۆاكۋاتسيالاۋ ءۇشىن 15 مىڭ ورىن دايىندالعانىن جازعان بولاتىنبىز.
تاسقىن سۋ قاۋپى قۇلسارى قالاسىنىڭ 7 شاعىن اۋدانىنا ءتونىپ تۇرعانىن حابارلاعان ەدىك.
«تەڭىز» كەنىشىندەگى ۆاحتالىق قالاشىققا 6,5 مىڭنان استام ادام ەۆاكۋاتسيالاندى.
جولداسبەك شوپەعۇل
