اۆتوكولىكتى تەحنيكالىق بايقاۋدان وتكىزۋ ساپاسىن ءتيىمدى باقىلاۋدىڭ جاڭا تەتىكتەرى ازىرلەنەدى

استانا. KAZINFORM - اۆتوكولىكتى تەحنيكالىق بايقاۋدان وتكىزۋ ساپاسىن ءتيىمدى باقىلاۋدىڭ جاڭا تەتىكتەرى ازىرلەنەدى. بۇل تۋرالى بۇگىن ۇكىمەت وتىرىسىندا پرەمەر- مينيستر ولجاس بەكتەنوۆ ايتتى.

«مەملەكەت باسشىسى قوعامدىق قاۋىپسىزدىك ماسەلەلەرىنە ەرەكشە نازار اۋداردى. وسىعان بايلانىستى ىشكى ىستەر مينيسترلىگى مۇددەلى مەملەكەتتىك ورگاندارمەن بىرلەسىپ، ەكى اي مەرزىمدە قىلمىسپەن، ونىڭ ىشىندە الاياقتىقپەن كۇرەس بويىنشا قوسىمشا شارالار كەشەنىن ازىرلەۋى قاجەت. بۇدان باسقا، ىشكى ىستەر مينيسترلىگى ەسىرتكى قىلمىسىنا قارسى ءىس- قيمىل جانە ناشاقورلىقتىڭ پروفيلاكتيكاسى جونىندەگى تۇزەتۋلەردى كوزدەيتىن زاڭ جوباسىن ىلگەرىلەتۋ جۇمىسىن جانداندىرۋى قاجەت» ، - دەدى ول.

سونداي- اق، ولجاس بەكتەنوۆ جول-كولىك وقيعالارىنىڭ جانە جولداردا ادامداردىڭ قازا بولۋ كورسەتكىشتەرىن ازايتۋ ماسەلەلەرىنە ەرەكشە نازار اۋدارۋ كەرەكتىگىنە توقتالدى.

«سوندىقتان كولىك مينيسترلىگىنە زياتكەرلىك جۇيەلەردى ەنگىزە وتىرىپ، قاۋىپسىز جول ينفراقۇرىلىمىن قۇرۋدى قامتاماسىز ەتۋدى، سونداي-اق وسى جىلدىڭ سوڭىنا دەيىن اۆتوكولىكتى تەحنيكالىق بايقاۋدان وتكىزۋ ساپاسىن ءتيىمدى باقىلاۋدىڭ جاڭا تەتىكتەرىن ازىرلەۋدى تاپسىرامىن»، - دەدى ۇكىمەت باسشىسى.

اۆتور

مارلان جيەمباي