اۆتوكولىككە اي سايىن قانشا اقشا جۇمسالادى

قازاقستان اۆتوموبيل وداعىنىڭ مالىمەتىنشە، 2026 -جىلدىڭ قاڭتار-تامىز ايلارىندا ەڭ كوپ ساتىلعان 20 مودەلدىڭ ىشىندە باستاپقى باعاسى ەڭ ارزانى — JAC S3 Pro. ونىڭ قۇنى 5990000 تەڭگەدەن باستالادى. ال تىزىمدەگى ەڭ قىمبات مودەل - Toyota Camry. ونىڭ باستاپقى باعاسى 18690000 تەڭگە. ناقتى قۇنى جابدىقتالۋىنا قاراي وزگەرەدى.

وسى ەكى كولىككە كەتەتىن شىعىندى سالىستىرۋ ءۇشىن Kazinform ءتىلشىسى اۆتوموبيل نارىعىن مونيتورينگتەۋ جانە تالداۋ اگەنتتىگىنىڭ باس ديرەكتورى ارتۋر ميسكاريانعا جۇگىندى.

ساراپشى ەكى مودەلدىڭ شىعىنىن بىردەي جاعدايدا ەسەپتەدى. ءول ۇشىن كولىكتەر استانادا ايىنا ورتا ەسەپپەن 1000 شاقىرىم، جىلىنا 12 000 شاقىرىم جۇرەدى دەپ الىندى.

جانارمايعا قانشا اقشا كەتەدى؟

ساراپشىنىڭ ەسەبىنشە، JAC S3 Pro  كولىگى 100 شاقىرىمعا ورتا ەسەپپەن 9 ليتر، Toyota Camry  كولىگى 10 ليتر بەنزين جۇمسايدى.

اي-92 بەنزينىنىڭ ليترى 250 تەڭگە بولسا، JAC S3 Pro-عا ايىنا شامامەن 22500 تەڭگە، جىلىنا 270 مىڭ تەڭگە كەتەدى. Toyota Camry ءۇشىن بۇل شىعىن ايىنا 25 مىڭ، جىلىنا 300 مىڭ تەڭگەنى قۇرايدى.

ال ليترى 310 تەڭگە تۇراتىن اي-95 بەنزينىن پايدالانسا، JAC S3 Pro-عا ايىنا شامامەن 28 مىڭ، جىلىنا 335 مىڭ تەڭگە جۇمسالادى. Toyota Camry ءۇشىن ايلىق شىعىن 31 مىڭ، جىلدىق شىعىن 372 مىڭ تەڭگەگە جەتەدى.

ارتۋر ميسكاريان ەسەپتە جانارماي شىعىنىنىڭ ەڭ تومەنگى ورتاشا كورسەتكىشتەرى الىنعانىن ەسكەرتتى. كۇندەلىكتى پايدالانۋ كەزىندە JAC S3 Pro  كولىگى 100 شاقىرىمعا 11-12 ليتر، Toyota Camry  كولىگى 15-16 ليترگە دەيىن بەنزين جۇمساۋى مۇمكىن.

ساقتاندىرۋ مەن كولىك سالىعى

JAC S3 Pro ءۇشىن جىلدىق كولىك سالىعى شامامەن 8 مىڭ تەڭگە، Toyota Camry ءۇشىن 27 مىڭ تەڭگە.

ال كولىك يەلەرىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋعا ءار مودەل ءۇشىن 54 مىڭ تەڭگەدەن ەسەپتەلگەن.

ساقتاندىرۋ اقىسى كولىكتىڭ قاي وڭىردە تىركەلگەنىنە، جۇرگىزۋشىنىڭ جاسى مەن وتىلىنە، سونداي-اق بۇرىنعى ساقتاندىرۋ جاعدايلارىنا بايلانىستى وزگەرەدى. بۇل ەسەپكە ەرىكتى اۆتوساقتاندىرۋ (كاسكو) كىرمەگەن.

تەحنيكالىق قىزمەت كورسەتۋ

ارتۋر ميسكارياننىڭ ەسەبىنشە، جىلىنا 12 مىڭ شاقىرىم جۇرەتىن JAC S3 Pro-عا جوسپارلى تەحنيكالىق قىزمەت كورسەتۋ ءۇشىن 120-300 مىڭ تەڭگە قاجەت. Toyota Camry ءۇشىن بۇل شىعىن 150-350 مىڭ تەڭگەنى قۇرايدى.

ناقتى سوما ءوندىرۋشىنىڭ تالاپتارىنا، كولىكتىڭ جۇرگەن جولىنا، قاجەتتى ماتەريالداردىڭ باعاسىنا جانە قىزمەت كورسەتەتىن ورتالىققا بايلانىستى.

قىسقى دوڭگەلەك پەن ونى اۋىستىرۋ

JAC S3 Pro-عا ارنالعان ءتورت قىسقى دوڭگەلەك شامامەن 80-300 مىڭ تەڭگە تۇرادى. Toyota Camry ءۇشىن 180-450 مىڭ تەڭگە قاجەت.

دوڭگەلەكتىڭ باعاسى ولشەمىنە، وندىرۋشىسىنە جانە ساتىپ الاتىن ماۋسىمعا قاراي وزگەرەدى.

ال دوڭگەلەكتى جىلىنا ەكى رەت اۋىستىرۋ JAC S3 Pro يەسىنە شامامەن 25 مىڭ، Toyota Camry يەسىنە 35 مىڭ تەڭگەگە تۇسەدى.

كولىك جۋۋ مەن تۇراق اقىسى

JAC S3 Pro كولىگىن جۋۋعا ايىنا شامامەن 10 مىڭ تەڭگە، جىلىنا 120 مىڭ تەڭگە كەتەدى. Toyota Camry ءۇشىن بۇل شىعىن ايىنا 15 مىڭ، جىلىنا 180 مىڭ تەڭگەنى قۇرايدى.

اقىلى تۇراقتاردى ارا-تۇرا پايدالانۋعا ەكى مودەل ءۇشىن دە جىلىنا شامامەن 100 مىڭ تەڭگە قاراستىرىلعان.

جوندەۋ مەن قوسالقى بولشەكتەر

جوندەۋ جۇمىستارى مەن قوسالقى بولشەكتەرگە دە الدىن الا اقشا قاراستىرعان ءجون.

ساراپشىنىڭ ەسەبىنشە، JAC S3 Pro ءۇشىن جىلىنا 50-200 مىڭ تەڭگە، Toyota Camry ءۇشىن 80-300 مىڭ تەڭگە قاجەت بولۋى مۇمكىن.

بۇدان بولەك، اينەك جۋاتىن قاتپايتىن سۇيىقتىق، اينەك تازالاعىش شەتكالار مەن باسقا دا ۇساق كەرەك-جاراقتارعا قاراجات جۇمسالادى. ولارعا JAC S3 Pro ءۇشىن جىلىنا شامامەن 50 مىڭ، Toyota Camry ءۇشىن 70 مىڭ تەڭگە ەسەپتەلگەن.

جالپى شىعىن قانشا بولادى؟

جانارماي، مىندەتتى ساقتاندىرۋ، كولىك سالىعى، تەحنيكالىق قىزمەت كورسەتۋ، دوڭگەلەك ساتىپ الۋ مەن اۋىستىرۋ، كولىك جۋۋ، تۇراق، جوندەۋ جانە باسقا دا شىعىنداردى قوسقاندا، JAC S3 Pro-عا جىلىنا 658 مىڭنان 1 ميلليون 569 مىڭ تەڭگەگە دەيىن جۇمسالۋى مۇمكىن. بۇل ايىنا شامامەن 55-131 مىڭ تەڭگە.

Toyota Camry ءۇشىن جىلدىق شىعىن 818 مىڭنان 1 ميلليون 999 مىڭ تەڭگەگە دەيىن جەتەدى. ايىنا شاققاندا 68-167 مىڭ تەڭگە.

اۆتوساراپشىنىڭ الدىن الا باعالاۋىنشا، ەكى كولىككە كەتەتىن جىلدىق شىعىننىڭ ايىرماسى 200-400 مىڭ تەڭگە بولۋى مۇمكىن.

بۇعان قوسا كاسكو، اقىلى جولدار، ايىپپۇلدار، كولىكتى ەۆاكۋاتورمەن تاسىمالداۋ جانە ەسەپكە كىرمەگەن قوسىمشا جابدىقتارعا اقشا كەتۋى مۇمكىن. ەگەر كولىك نەسيەگە ساتىپ الىنسا، بانككە تولەنەتىن پايىزدار مەن وزگە تولەمدەردى دە ەسكەرۋ قاجەت.

ارتۋر ميسكاريان ەكى مودەلدىڭ ايىرماشىلىعىن دا ەسكەرتتى. JAC S3 Pro مەن Toyota Camry شاناق ءتۇرى، جابدىقتالۋى، ساناتى، كولەمى، سالماعى مەن باعاسى جاعىنان بىردەي ەمەس. ولاردىڭ ساتىپ الۋشىلارى دا ءارتۇرلى. سوندىقتان بۇل سالىستىرۋدى قاي كولىكتى ساتىپ العان ءتيىمدى ەكەنىن انىقتايتىن ۇسىنىس رەتىندە قابىلداۋعا بولمايدى.

بۇعان دەيىن كولىك جوندەۋ قىزمەتى قانشا تۇراتىنىن جازعان ەدىك.

اۆتورلار

ۆەنەرا جولامان قىزى