ناتو ەۋروپاداعى جاڭا «جەڭىس ستراتەگياسىن» جاريالادى
استانا. KAZINFORM - ناتو-نىڭ ەۋروپاداعى بىرىككەن قارۋلى كۇشتەرىنىڭ جوعارعى باس قولباسشىسى الەكسۋس گرينكيەۆيچ اليانستىڭ شابۋىلداردى تويتارۋعا باعىتتالعان جاڭا «جەڭىس تەورياسىن» تانىستىردى، دەپ حابارلايدى Anadolu.
گەنەرال بۇل تۋرالى 2026 -جىلعى ۆارشاۆا قاۋىپسىزدىك فورۋمىندا مالىمدەدى. ونىڭ ايتۋىنشا، جاڭا تۇجىرىمداما كەز كەلگەن شابۋىلدى توقتاتۋدى، ونىڭ سالدارىن بەيتاراپتاندىرۋدى جانە اگرەسسيا جالعاسقان جاعدايدا قارسىلاستىڭ شابۋىلداۋشى كۇشتەرىن ىستەن شىعارۋدى كوزدەيدى.
گرينكيەۆيچ ناتو- نىڭ باستى ماقساتى بەيبىتشىلىكتى ساقتاۋ ەكەنىن اتاپ ءوتتى.
- ناتو - قورعانىس اليانسى. ءبىزدىڭ حالىقتارىمىز بەن اۋماقتارىمىزدى قورعاۋدان باسقا جوسپارىمىز دا، ماقساتىمىز دا جوق. الايدا قورعانىسقا باسىمدىق بەرۋىمىزدى السىزدىك نەمەسە باتىلدىقتىڭ جوقتىعى دەپ قابىلداۋعا بولمايدى، - دەدى ول.
باس قولباسشىنىڭ ايتۋىنشا، اليانسقا مۇشە 32 مەملەكەت ورتاق «جەڭىس تەورياسىن» قابىلداعان. ناتو قازىرگى ۋاقىتتا جاقىن بولاشاقتا اسكەري قاقتىعىس بولادى دەپ كۇتپەيدى، دەگەنمەن كەز كەلگەن جاعدايعا دايىن بولۋدى ماڭىزدى سانايدى.
- قاقتىعىستاردىڭ الدىن الۋ ءۇشىن سوعىسقا دايىن بولۋ قاجەت. ال دايىندىق تەك ىقتيمال وقيعالارعا عانا ەمەس، جۇزەگە اسۋى مۇمكىن ءتۇرلى سسەناريلەرگە دە جوسپار قۇرۋدى تالاپ ەتەدى، - دەدى گرينكيەۆيچ.
ول ناتو- نىڭ بارلاۋ مۇمكىندىكتەرىنە دە توقتالدى. گەنەرالدىڭ سوزىنشە، اليانس ءارتۇرلى دەرەككوزدەردەن الىنعان اقپاراتتى زاماناۋي بارلاۋ جۇيەلەرى مەن الگوريتمدەر ارقىلى تالداپ، ستراتەگيالىق جانە جەدەل جاعدايدى تۇراقتى باقىلاپ وتىرادى.
- بۇل اليانستىڭ كۇتپەگەن شابۋىلعا تاپ بولۋ ىقتيمالدىعى تومەن ەكەنىن بىلدىرەدى، - دەدى ول.
گرينكيەۆيچ جاڭا تۇجىرىمدامانىڭ ءۇش نەگىزگى كەزەڭىن ءتۇسىندىردى. الدىمەن ناتو شابۋىلدى توقتاتۋعا تىرىسادى. ەگەر شابۋىل جالعاسسا، ونىڭ سالدارىن بەيتاراپتاندىرىپ، قارسىلاستىڭ ىلگەرىلەۋىنە جول بەرمەيدى. قاجەت بولعان جاعدايدا شابۋىلعا قاتىسقان اسكەري كۇشتەر مەن جاۋىنگەرلىك جۇيەلەردى ىستەن شىعارادى.
ونىڭ ايتۋىنشا، اليانس قارسىلاسىن ستراتەگيالىق تۇرعىدان تولىق جەڭۋدى ماقسات ەتپەيدى.
- ءبىزدىڭ ماقساتىمىز - كەز كەلگەن شابۋىلدى توقتاتۋ جانە قارسىلاستىڭ اۋماعىمىزدى باسىپ الىپ، باقىلاۋدا ۇستاۋىنا جول بەرمەۋ. ول ءۇشىن بىزگە قارسى قولدانىلعان كۇشتەردى تاكتيكالىق جانە جەدەل دەڭگەيدە جەڭۋ جەتكىلىكتى. ءبىز شابۋىل جاساپ جاتقان جاۋىنگەرلىك جۇيەنى ودان ءارى ارەكەت ەتە المايتىنداي ەتىپ بەيتاراپتاندىرامىز، - دەدى گەنەرال.
ول ناتو شيەلەنىستى ۋشىقتىرۋدى كوزدەمەيتىنىن، ال قاقتىعىس ورشىگەن جاعدايدا جاۋاپكەرشىلىك شابۋىل جاساعان تاراپقا جۇكتەلەتىنىن مالىمدەدى.
گرينكيەۆيچ اليانس جاڭا تۇجىرىمدامانى ىسكە اسىرۋ ءۇشىن اسكەري دايىندىقتى كۇشەيتىپ جاتقانىن جەتكىزدى.
- ەگەر بىزگە شابۋىل جاسالسا، بۇگىن ءتۇننىڭ وزىندە سوعىسۋعا دايىنبىز. ءبىراق بۇعان توقمەيىلسىمەيمىز. كۇن سايىن دايىندالىپ، اسكەري جاتتىعۋلار وتكىزە بەرەمىز. ەرتەڭ بۇگىنگىدەن، ال بۇرسىگۇنى ەرتەڭگىدەن دە دايىن بولامىز، - دەدى ول.
ءسوزىنىڭ سوڭىندا گەنەرال ناتو- نىڭ باستى مىندەتى بەيبىتشىلىكتى قورعاۋ ەكەنىن تاعى دا اتاپ ءوتتى.
- بۇگىن تانىستىرعان جەڭىس تەورياسى مەنى ەشقاشان بەرگىم كەلمەيتىن بۇيرىقتاردى بەرۋگە ءماجبۇر ەتۋى مۇمكىن. الايدا سوعىس باستالسا، ءبىز شابۋىلدى توقتاتىپ، ونىڭ سالدارىن بەيتاراپتاندىرامىز. ال اگرەسسيا جالعاسسا، شابۋىل جاساۋشى كۇشتەردى ىستەن شىعارامىز، - دەپ تۇيىندەدى الەكسۋس گرينكيەۆيچ.
ايتا كەتەيىك، بۇعان دەيىن بريۋسسەلدە ناتو ەلدەرىنىڭ باس شتاب باستىقتارى باس قوسىپ، اليانستىڭ قورعانىس الەۋەتى مەن قارسىلاستى تەجەۋ تەتىكتەرىن تالقىلاعان بولاتىن.
