پاتەرىنە شەتەلدىكتەردى كوپتەپ تىركەۋ ارقىلى پايدا تاباتىندار انىقتالىپ جاتىر

استانا. KAZINFORM - ەلىمىزدىڭ ءىرى ءۇش قالاسىندا پاتەر يەلەرى ءوز باسپاناسىنا بوتەن ادامداردى شامادان تىس كوپ تىركەگەن. بۇل تۋرالى بۇگىن ىشكى ىستەر مينيسترلىگى كوشى-قون قىزمەتى كوميتەتىنىڭ ءتوراعاسى اسلان اتالىقوۆ ايتتى.

«ەلىمىزدىڭ قالالارىندا پاتەر يەلەلەرى ءوز باسپاناسىنا بوتەن ادامداردى كوپتەپ تىركەپ جاتادى. قازاقستان ازاماتتارى مەن شەتەلدىكتەردى جالعان تىركەۋدىڭ ەڭ كوپ سانى رەسپۋبليكالىق ماڭىزى بار ءۇش قالادا انىقتالدى. وسىنداي 1348 پاتەرتە 36 مىڭعا جۋىق ادام تىركەلگەن»، - دەدى ا. اتالىقوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ ايتۋىنشا، ءتيىستى ءىس-شارالاردىڭ ناتيجەسىندە مۇنداي پاتەرلەر سانى ايتارلىقتاي ازايدى.

«جالپى، جالعان تارتىپتە ادامداردى تىركەۋ زاڭسىز ەكەنىن اتاپ وتكىم كەلەدى. مۇنىڭ ءبىر سەبەبىنە توقتالسام، وسىمەن اينالىساتىن ادامدار پايدا تاپقىسى كەلەدى. 5 مىڭ تەڭگەگە جالعان تىركەۋدى ۇسىنعان جارنامالار تولىپ ءجۇر. شەتەلدىكتەر ءۇشىن مۇنداي تىركەۋ ءسال جوعارى. وسى ادامداردى انىقتاپ، جاۋاپقا تارتىپ جاتىرمىز. قازىر جاۋاپكەرشىلىكتى كۇشەيتۋ ماسەلەسى تالقىلانىپ جاتىر»، - دەدى كوميتەت باسشىسى.

بۇدان بۇرىن حابارلانعانداي، ەلىمىزدە 196 مىڭ شەتەلدىك تۇراقتى تۇرىپ جاتىر.

اۆتور

رۋسلان عابباسوۆ