پاتەردە تۇرعىنداردى شەكتەۋسىز تىركەۋگە توسقاۋىل قويىلماق - زاڭ جوباسى

استانا. KAZINFORM - پاتەردە تۇرمايتىن ادامداردى تىركەۋدەن شىعارماعانى ءۇشىن تۇرعىن ءۇي يەسىنە ايىپپۇل 2 ەسەگە وسەدى. بۇل نورما بۇگىن پارلامەنت ماجىلىسىندە تانىستىرىلعان ەلوردانى جانە رەسپۋبليكالىق ماڭىزى بار قالالاردى دامىتۋ ماسەلەلەرىنە ارنالعان زاڭ جوباسىندا قامتىلعان.

«قازىرگى كەزدە حالىق ءىرى قالالارعا كوشىپ كەلۋگە تىرىسادى، بۇل ءۇردىس پاتەرلەردە تۇرعىنداردىڭ سانىن شەكتەۋسىز تىركەۋ پروبلەماسىنا الىپ كەلدى. كوبىنەسە تۇرعىن ءۇي يەلەرىنىڭ وزدەرى كوشى-قون زاڭناماسىن بۇزۋعا جول بەرەدى، ۇيىندە تۇرمايتىن ازاماتتاردى بەلگىلى ءبىر تولەم ءۇشىن تىركەيدى. ماسەلەن، استانا قالاسىنداعى پاتەردىڭ بىرىندە 800-دەن استام ادام تىركەلگەن»، - دەدى ۇلتتىق ەكونوميكا ۆيتسە-ءمينيسترى باۋىرجان وماربەكوۆ.

وسى ماسەلەنى شەشۋ ماقساتىندا:

- «استانا مارتەبەسى تۋرالى» زاڭىنا تۇرعىلىقتى جەرى جانە ەلوردا اۋماعىندا ۋاقىتشا بولاتىن جەرى بويىنشا تىركەۋ نورماتيۆىن بەكىتۋ جونىندەگى ءماسليحاتتىڭ قۇزىرەتىن كەڭەيتۋ؛

- «حالىقتىڭ كوشى-قونى تۋرالى» زاڭىنا استانا اۋماعىندا بەلگىلەنگەن نورماتيۆتەردەن ارتىق تىركەۋگە تىيىم سالۋ بويىنشا وزگەرىستەر ەنگىزۋ ۇسىنىلدى.

«بۇل رەتتە، تىركەۋ نورماتيۆتەرى تۇرعىن ءۇيدىڭ مەنشىك يەسى جۇبايىن جانە جاقىن تۋىستارىن تىركەگەن كەزدە قولدانىلمايدى. سونىمەن قاتار، اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ اياسىندا تۇرعىن ۇيلەردە تىركەلگەن جانە تۇرمايتىن جەكە ادامداردى تىركەۋدەن شىعارماعانى ءۇشىن تۇرعىن ءۇي يەسىنە ايىپپۇلدى 2 ەسەگە ۇلعايتۋ (10 ا ە ك- تەن 20 ا ە ك- كە دەيىن) ۇسىنىلدى»، - دەدى ۆيتسە- مينيستر.

بۇدان بۇرىن حابارلانعانداي، بۇگىن پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە استانانى جانە رەسپۋبليكالىق ماڭىزى بار قالالاردى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلدى.

اۆتور

رۋسلان عابباسوۆ