اتاجۇرتقا ورالىپ، اتاكاسىپتى جاڭعىرتتى

قازاقستان حالقىنىڭ سانىن كوبەيتىپ جاتقان ءبىر سەبەپ -سىرتتاعى ەلدىڭ اتاجۇرتقا ورالۋى. تاۋەلسىزدىك العالى بەرى ءبىر عانا قوستاناي وبلىسىنا 36 مىڭنان استام اعايىن كوشىپ كەلگەن.

سولاردىڭ ءبىرى المات نۇرماحانوۆ. ءيا، كەرەگەسى كەڭەيگەن ەلدىڭ شاڭىراعى دا بيىكتەيدى. المات نۇرماحانوۆ بۇل وڭىرگە تىڭ كاسىپ، تۇيە ءوسىرىپ، شۇبات ءوندىرىپ وتىر. ونىڭ الدىنا سالعان ويسىل قارا سانى وتىزدان اسادى. الدا مال باسىن ودان ءارى ۇلعايتۋ ويى بار. ەلگە ورالعان اعايىننىڭ قۋانىشىنا ورتاقپىز. كەزىندە قىتاي، ءۇندىستان، اۋعان، يران، تۇركيا ودان ەۋروپا اسىپ تارىداي شاشىلعان قازاقتىڭ بۇگىن ەلگە ورالۋى ارينە تاۋەلسىزدىكتىڭ ارقاسى عوي. بۇل ءبىر عانيبەت ەمەس پە؟! تاۋەلسىزدىككە ىلەسىپ كەلگەن ۇلى كوش توقتاماسىن دەپ تىلەيىك.
المات نۇرماحانوۆ وزبەكستاننان تاريحي وتانىنا 2003 -جىلى ورالدى. باستاپقىدا رۋدنىي قالاسىنا كوشىپ كەلىپ، كەن ورىنىندا جۇمىس ىستەگەن. ودان كەيىن سول ماڭداعى يۋبيلەينىي اۋىلىنا قونىس اۋدارادى. شاعىن نەسيەگە 5 تۇيە ساتىپ الىپ، اتاكاسىپكە دەن قويادى. سودان بەرگى ون جىلدىڭ ىشىندە ۇلتتىق سۋسىن-شۇباتىمەن بۇكىل وڭىرگە تانىلدى.
المات نۇرماحانوۆ، كاسىپكەر:
- ەكى رەت ۇكىمەتتەن جەڭىلدەتىلگەن نەسيەمەن قارجى الىپ، سونى تۇيە شارۋاشىلىعىمەن اينالىسىپ وتىرمىز. كاسىپ باستايمىن، جۇمىس ىستەيمىن دەگەن ادامعا ۇكىمەتتىڭ بەرەتىن جاردەمى بار. كومەگى مەنىڭ ويىمشا جەتەدى. ءبىراق ەندى سونى پايدالانىپ، الا ءبىلۋ كەرەك. جاساپ ءبىلۋ كەرەك دەگەن سياقتى عوي.
جۇبايى روزا دا وسى شارۋاشىلىقتىڭ باسى-قاسىندا. جىل ون ەكى اي تۇيە ساۋىپ، شۇبات اشىتادى. ساباقتان بوساعان كەزدەرى بالالارى دا قولقانات. ەندى ولار كۇرە جول بويىندا ۇلتتىق سۋسىن، تاعام ساتاتىن ەتنواۋىل تۇرعىزۋدى جوسپارلاپ وتىر.
المات نۇرماحانوۆ، كاسىپكەر:
- الداعى قويعان ماقساتىمىز، ەندى ءبىز ءوزىمىزدىڭ العان جەرىمىزدە تراسسانىڭ جانىنان الاڭ سالىپ بەرسە، سول جەرگە كيىز ءۇي قويىپ، سول جەردە قازاقتىڭ ۇلتتىق تاعامدارىمەن قاتار ۇلتتىق ويىندارىن دارىپتەۋ، سول سياقتى ەندى ءبىر جاعىنان اگروتۋريزم، ءبىر جاعىنان پريدوروجنىي سەرۆيس دەگەندى دامىتقىمىز كەلەدى.
تاريحي وتانىنا ورالعان قانداستارىمىزدىڭ تەز بەيىمدەلىپ، ءسىڭىسىپ كەتۋىنە مەملەكەت بارىنشا جاعداي جاساپ جاتىر. ازاماتتىق الۋ مەرزىمى التى ايدان ءۇش ايعا قىسقاردى. بيىل ءۇي سالۋىنا نەمەسە ساتىپ الۋىنا ۇتقىرلىق سەرتيفيكاتى بەرىلە باستادى. ياعني باسپانا شىعىنىنىڭ بەلگىلى ءبىر بولىگىن ۇكىمەت ءوز مويىنا الادى.
ايساۋلە وماربەكوۆا، جۇمىسپەن قامتۋ جانە الەۋمەتتىك باعدارلامالار باسقارماسىنىڭ باس مامانى:
- جىلدان-جىلعا قانداستار بىرتە-بىرتە ارتىپ كەلەدى. مىسالعا الاتىن 2023 -جىلى وبلىستا قانداس مارتەبەسىن 1128 ادام الدى. وتكەن جىلمەن سالىستىرعاندا ەكى ەسە كوپ. بيىلعى جىلى قانداستاردى قابىلداۋدىڭ وڭىرلىك كۆوتاسىنا 352 ادام ەنگىزىلدى. جوسپار تولىعىمەن ورىندالدى. كۆوتاعا ىلىككەن قانداستاردىڭ جۇمىسقا جارامدىلارى، ءبارى جۇمىسپەن قامتىلدى.
ايتا كەتەلىك، كەلەر جىلعا قانداستارعا بولىنەتىن وڭىرلىك كۆوتا سانى ءالى انىقتالعان جوق. ءبىراق بيىلعا قاراعاندا ءبىرشاما كوپ بولادى دەگەن بولجام بار.
اۆتورلارى: ماعاۋيا قاليەۆ، سەرگەي تراحتەنبەرگ
www.24.kz