اپتاپ ىستىقتا كاسپي سۋى نەگە سالقىن بولادى: عالىم سەبەبىن ايتتى
اقتاۋ. KAZINFORM - اقتاۋ جاعالاۋىنداعى تەڭىز سۋى جازدىڭ قاق ورتاسىندا دا سالقىن بولۋى مۇمكىن. ونىڭ تەمپەراتۋراسىنا اۋا رايىمەن قاتار جەل، تەڭىز اعىستارى جانە تەرەڭ قاباتتارداعى سۋىق سۋدىڭ جوعارى كوتەرىلۋى اسەر ەتەدى.
بۇل تۋرالى كاسپي تەڭىزى عىلىمي- زەرتتەۋ ينستيتۋتى ءتوراعاسىنىڭ ورىنباسارى سالتانات سادۆاكاسوۆا ايتتى.
كاسپيدىڭ شىعىس جاعالاۋىنا ءتان قۇبىلىستاردىڭ ءبىرى - اپۆەللينگ، ياعني تەرەڭ قاباتتاعى سۋىق سۋدىڭ جەر بەتىنە كوتەرىلۋى.
ماماننىڭ مالىمەتىنشە، بۇل قۇبىلىس اقتاۋ ماڭىندا دا عىلىمي زەرتتەۋلەر ارقىلى راستالعان. اپۆەللينگ شىلدە جانە تامىز ايلارىندا نەعۇرلىم قارقىندى بايقالادى. جەكەلەگەن جاعدايلاردا قۇبىلىس بىرنەشە كۇنگە سوزىلىپ، جاعالاۋداعى سۋ تەمپەراتۋراسىنىڭ ايتارلىقتاي تومەندەۋىنە اكەلۋى مۇمكىن. سوندىقتان اۋا تەمپەراتۋراسىنىڭ جوعارى بولۋى تەڭىز جاعاسىنداعى سۋدىڭ دا جىلى بولاتىنىن بىلدىرمەيدى.
- كاسپي - ديناميكالىق سۋ ايدىنى. جاعالاۋداعى سۋ تەمپەراتۋراسىنا ءبىر مەزەتتە بىرنەشە فاكتور اسەر ەتەدى. ولاردىڭ قاتارىندا جەل رەجيمى، تەڭىز اعىستارى، تەڭىز ءتۇبىنىڭ بەدەرى جانە سۋ ماسسالارىنىڭ تىك باعىتتا ارالاسۋى بار. جازدىڭ قاق ورتاسىندا اۋا تەمپەراتۋراسى جوعارى بولعاننىڭ وزىندە جاعالاۋداعى سۋ سالقىن بولۋى نەمەسە بىرنەشە كۇننىڭ ىشىندە كۇرت سۋىپ كەتۋى مۇمكىن، - دەيدى مامان.
كاسپي تەڭىزى عىلىمي-زەرتتەۋ ينستيتۋتى وكىلىنىڭ تۇسىندىرۋىنشە، اقتاۋ ماڭىنداعى سۋ تەمپەراتۋراسى تەك جەرگىلىكتى اۋا رايىنىڭ اسەرىنەن قالىپتاسپايدى. وعان بەلگىلى ءبىر ۋاقىتتا جاعالاۋعا قانداي سۋ ماسسالارىنىڭ جاقىنداعانى جانە تەڭىزدە قانداي پروتسەستەردىڭ ءجۇرىپ جاتقانى دا ىقپال ەتەدى.
سوندىقتان اقتاۋعا كەلەتىن تۇرعىندار مەن تۋريستەر تەك اۋا تەمپەراتۋراسىنا نەمەسە كۇنتىزبەدەگى ايعا قاراپ، تەڭىز سۋىنىڭ جاعدايىن باعالاماعانى ءجون. بىرنەشە كۇن قاتارىنان كۇن ىستىق بولعاننىڭ وزىندە سۋ سالقىن كۇيىندە قالۋى نەمەسە قىسقا مەرزىم ىشىندە تەمپەراتۋراسى ايتارلىقتاي وزگەرۋى مۇمكىن.
