استىقتى تەرەڭ وڭدەيتىن 6 جوبا ىسكە اسادى
استانا. KAZINFORM - بيىل 9 ايدا اۋىل شارۋاشىلىعىنىڭ نەگىزگى كاپيتالىنا سالىنعان ينۆەستيتسيالار كولەمى 1,4 تريلليون تەڭگەگە جەتتى. بۇل تۋرالى ۇكىمەت وتىرىسىندا اۋىل شارۋاشىلىعى ءمينيسترى ايداربەك ساپاروۆ ايتتى.
- اۋىل شارۋاشىلىعى ونىمدەرىن قايتا وڭدەۋ كولەمى دە ارتىپ كەلەدى. بيىل ون ايدا وسىمدىك مايىنىڭ ءوندىرىسى %24,1- عا ءوسىپ، 938 مىڭ توننانى، ۇن ءوندىرىسى %10,8- عا ءوسىپ، 3,2 ميلليون توننانى، كونديتەرلىك ونىمدەر ءوندىرىسى %7,1- عا ءوسىپ، 210 مىڭ توننانى قۇرادى. اگروونەركاسىپتىك كەشەننىڭ قايتا وڭدەلگەن ونىمدەرىنىڭ ەكسپورتى دا ارتتى. قاڭتار- تامىز ايلارىندا ونىڭ كولەمى %35,1- عا ۇلعايىپ، 3 ميلليارد ا ق ش دوللارىنا جەتتى. 2023 -جىلمەن سالىستىرعاندا وسىمدىك مايىنىڭ ەكسپورتى %40- عا ءوسىپ، 705 مىڭ توننانى، ۇن ەكسپورتى %30- عا ءوسىپ، 1,38 ميلليون توننانى، كونديتەرلىك ونىمدەر ەكسپورتى %17- عا ءوسىپ، 51,1 مىڭ توننانى قۇرادى، - دەدى مينيستر.
ايداربەك ساپاروۆتىڭ سوزىنە قاراعاندا، سالانىڭ كەڭەيۋىمەن قاتار ينۆەستيتسيا كولەمى دە ۇلعايىپ كەلەدى. بيىلعى توعىز ايدا تاماق ونىمدەرىن ءوندىرۋ سالاسىنىڭ نەگىزگى كاپيتالىنا سالىنعان ينۆەستيتسيالار 2,1 ەسە ءوسىپ، 373 ميلليارد تەڭگەگە جەتتى.
- مەملەكەت باسشىسىنىڭ تاپسىرماسى بويىنشا اۋىل شارۋاشىلىعى ونىمدەرىن تەرەڭ وڭدەۋدى دامىتۋعا ەرەكشە نازار اۋدارىلىپ وتىر. وسى باعىتتا 2029 -جىلعا دەيىن جىلىنا جالپى كولەمى 5,8 ميلليون تونناعا دەيىن استىق شيكىزاتىن وڭدەيتىن التى ءىرى جوبانى ىسكە اسىرۋ كوزدەلگەن. العاشقى ناتيجەلەر بار. بيىل تۇركىستان وبلىسىندا «قازكراحمال» زاۋىتى، جامبىل وبلىسىندا «فۋفەنگ گرۋپپ» كومپانياسىنىڭ جوباسى ىسكە قوسىلدى. «قازكراحمال» زاۋىتىندا جۇگەرىدەن موديفيكاتسيالانعان كراحمال مەن گليۋكوزا- فرۋكتوزا ءشارباتتارىن ءوندىرۋ كوزدەلگەن. «فۋفەنگ» جوباسى اياسىندا كراحمال، امينقىشقىلدارى (ليزين، ترەونين، گلۋتامين قىشقىلى، گلۋتامين، لەيتسين)، جەمشوپ، جۇگەرى اقۋىزى مەن جۇگەرى ءدانىنىڭ ۇرىعىن قامتيتىن ءونىم تۇرلەرىن شىعارۋ جوسپارلانعان. بۇل ونىمدەرگە الەمدىك نارىقتا سۇرانىس ءوسىپ كەلەدى، - دەدى ول.
ءمينيستردىڭ دەرەگىنشە، 2029 -جىلعا دەيىن تاعى ءتورت جوبانى ىسكە قوسۋ جوسپارلانعان. ونىڭ ەكەۋى اقمولا وبلىسىندا، بىرەۋى قوستاناي وبلىسىندا جانە بىرەۋى استانا قالاسىندا ورنالاسادى. بۇل جوبالاردى ىسكە اسىرۋ - قوسىلعان قۇنى جوعارى ونىمدەر ءوندىرىسىن ۇلعايتۋعا، وتاندىق استىققا سۇرانىستى قامتاماسىز ەتۋگە مۇمكىندىك بەرەدى.
- وسى جىلدىڭ 9 ايىندا اۋىل شارۋاشىلىعىنىڭ نەگىزگى كاپيتالىنا سالىنعان ينۆەستيتسيالار كولەمى 1,4 تريلليون تەڭگەنى قۇرادى. بۇل 2025 -جىلدىڭ سايكەس كەزەڭىمەن سالىستىرعاندا 1,4 ەسە كوپ. بۇگىنگى تاڭدا وتاندىق جانە شەتەلدىك ينۆەستورلارمەن جالپى سوماسى 2,4 تريلليون تەڭگەنى قۇرايتىن ينۆەستيتسيالار تۋرالى 13 كەلىسىم جاسالدى. ينۆەستورلار قاتارىندا فۋفەنگ گرۋپ، مارس، كوكا-كولا، كارلسبەرگ، تيرياكي حولدينگ، شينلاين جانە باسقا دا كومپانيالار بار. بۇل جوبالاردى ىسكە اسىرۋ وتاندىق اۋىل شارۋاشىلىعى شيكىزاتىنا سۇرانىستى ارتتىرۋعا، قوسىلعان قۇنى جوعارى ءونىم ءوندىرىسىن كەڭەيتۋگە جانە وڭىرلەردە جۇمىس ورىندارىن اشۋعا مۇمكىندىك بەرەدى، - دەدى مينيستر.
اۆتورلار
مارلان جيەمباي