استىقتان كراحمال، گليۋتەن، بيوەتانول الىناتىن 6 جوبا قولعا الىندى
استانا. KAZINFORM - 2029 -جىلعا دەيىن استىقتى تەرەڭ وڭدەيتىن 6 ءىرى جوبانى ىسكە اسىرۋ جوسپارلانىپ وتىر. ولاردىڭ جالپى قۋاتى جىلىنا 5,8 ميلليون توننا شيكىزاتتى وڭدەۋگە جەتەدى. بۇل تۋرالى ۇكىمەت وتىرىسىندا اۋىل شارۋاشىلىعى ءمينيسترى ايداربەك ساپاروۆ مالىمدەدى.
ءمينيستردىڭ ايتۋىنشا، قازىر ەلىمىزدە جىلىنا 510 مىڭ توننا استىق وڭدەيتىن ءۇش كاسىپورىن جۇمىس ىستەيدى.
- 2029 -جىلعا دەيىن كراحمال، گليۋتەن، بيوەتانول، امينقىشقىلدارى جانە باسقا دا ونىمدەر شىعاراتىن، جىلىنا 5,8 ميلليون توننا شيكىزات وڭدەيتىن التى ءىرى جوبانى ىسكە اسىرۋ جوسپارلانىپ وتىر. العاشقى ناتيجەلەر قازىردىڭ وزىندە بار، - دەدى ا. ساپاروۆ.
اتاپ ايتقاندا، تۇركىستان وبلىسىندا «كازكراحمال» زاۋىتى، ال جامبىل وبلىسىندا Fufeng Group كومپانياسىنىڭ وندىرىستىك جوباسى ىسكە قوسىلدى.
جاڭا وندىرىستەردى قۇرۋمەن قاتار، ولاردى شيكىزاتپەن قامتاماسىز ەتۋ، ينفراقۇرىلىمدى دامىتۋ جانە جوبالىق قۋاتتارعا شىعارۋ بويىنشا دا كەشەندى جۇمىس جۇرگىزىلىپ جاتىر.
- سولتۇستىك قازاقستان وبلىسىنىڭ تاجىريبەسىن تاراتۋ اياسىندا زاماناۋي تاۋارلىق ءسۇت فەرمالارىن سالۋ جالعاسىپ جاتىر. بيىل جىل سوڭىنا دەيىن ىسكە قوسىلعان فەرمالاردىڭ جوبالىق قۋاتىنىڭ %70- ىنا، كەلەر جىلى تولىق قۋاتىنا شىعارۋ جوسپارلانعان. كەلەر جىلعا جالپى قۋاتى 228 مىڭ توننا ءسۇت وندىرەتىن 21 تاۋارلىق ءسۇت فەرماسىنان تۇراتىن جوبالار پۋلى جاسالدى، - دەپ تولىقتىردى مينيستر.
ەت ءوندىرىسىن ۇلعايتۋ ءۇشىن تولىق وندىرىستىك سيكلى بار 6 ەت كلاستەرى ىسكە قوسىلماق. تۇركىستان وبلىسىندا العاشقى ءىرى مامانداندىرىلعان مال بيرجاسى سالىنىپ جاتىر.
بۇعان دەيىن اۋىل شارۋاشىلىعى ءمينيسترى شارۋالاردى قولداۋعا جۇزدەگەن ملرد قاراجات بولىنەتىنىن ايتقان ەدى.
پرەزيدەنت قاسىم-جومارت توقايەۆ جولداۋدا اۋىل شارۋاشىلىعى ينفراقۇرىلىمىن جەتىلدىرۋ، ءونىمدى تەرەڭ وڭدەۋ جانە ەڭبەك ونىمدىلىگىن ارتتىرۋ ماسەلەلەرىن كوتەردى.
