اۋستراليا پارلامەنتى سپيكەرى قازاقستانداعى رەفورمالارعا جوعارى باعا بەردى
استانا. KAZINFORM - مەملەكەت باسشىسى پارلامەنتارالىق وداق پرەزيدەنتى، اۋستراليا پارلامەنتى وكىلدەر پالاتاسىنىڭ سپيكەرى ميلتون ديكتى قابىلدادى. بۇل تۋرالى اقوردا ءمالىم ەتتى.
كەزدەسۋ بارىسىندا قاسىم-جومارت توقايەۆ ميلتون ديكتى پارلامەنتارالىق وداق پرەزيدەنتى لاۋازىمىنا سايلانۋىمەن قۇتتىقتاپ، جاۋاپتى ميسسيانى ابىرويمەن اتقارۋىنا تىلەۋلەستىك ءبىلدىردى.
مەملەكەت باسشىسى قازاقستان پارلامەنتارالىق وداقپەن كوپجىلدىق جەمىستى ىنتىماقتاستىقتى جوعارى باعالايتىنىن جەتكىزدى.
سونداي-اق پارلامەنتارالىق وداقتىڭ حالىقارالىق سەرىكتەستىكتى ىلگەرىلەتەتىن ماڭىزدى ينستيتۋت ەكەنىن اتاپ ءوتىپ، ۇيىممەن بايلانىستى تەرەڭدەتۋگە بەيىل ەكەنىن راستادى.
قاسىم-جومارت توقايەۆ ەلىمىزدەگى ساياسي جۇيەنى جاڭعىرتۋ جانە دەموكراتيالىق ينستيتۋتتاردى نىعايتۋ باعىتىندا قولعا الىنعان رەفورمالارعا توقتالدى.
ءوز كەزەگىندە ميلتون ديك پارلامەنتارالىق وداق پرەزيدەنتى رەتىندە ساپارمەن كەلىپ وتىرعان العاشقى ەل قازاقستان ەكەنىن ايرىقشا اتاپ ءوتتى.
بۇل رەتتە ول ەلىمىزدەگى ساياسي، ەكونوميكالىق وزگەرىستەردى جوعارى باعالادى.
اڭگىمەلەسۋ بارىسىندا تاراپتار پارلامەنتتىك ديپلوماتيا، جاساندى ينتەللەكتىنىڭ دامۋى جانە قازاقستان-اۋستراليا ىنتىماقتاستىعىنىڭ كەلەشەگى جونىندە پىكىر الماستى.
ايتا كەتەيىك، بۇعان دەيىن قازاقستان مەن ۇلىبريتانيا اراسىنداعى پارلامەنتارالىق ىنتىماقتاستىقتى نىعايتۋ، ستراتەگيالىق ارىپتەستىكتى تەرەڭدەتۋ جانە ەكى ەل پارلامەنتتەرىنىڭ بەيىندى كوميتەتتەرى اراسىنداعى بايلانىستى دامىتۋ ماسەلەلەرىن تالقىلاعان بولاتىن.