استانالىق مۇعالىمدەرگە كاسىبي مەرەكەسىندە سىيلىق جاساۋعا تىيىم سالىندى

استانا قالاسىنىڭ ءبىلىم باسقارماسى ءبىلىم بەرۋ ۇيىمدارىنىڭ اتا- انالاردان سىي- سياپات الۋىنا تىيىم سالاتىن بۇيرىق شىعاردى، دەپ حابارلايدى قازاقپارات.

«سىبايلاس جەمقورلىققا قارسى ءىس- قيمىل تۋرالى زاڭىنىڭ 9-بابىنا سايكەس، ءبىلىم بەرۋ ۇيىمدارىنىڭ باسشىلارىنىڭ اتا- انالاردان جوندەۋ جۇمىستارىن جۇرگىزۋگە، قۇرال- جابدىقتار مەن جيھاز ساتىپ الۋعا، پەداگوگيكالىق ۇجىمعا سىيلىق بەرۋگە، ءبىلىم بەرۋ ۇيىمدارىن اتتەستاتسيالاۋعا، مەرەكەلىك ءىس- شارالارعا جانە باسقا دا ماقساتتارعا اقشا جيناۋىنا، سونداي- اق سىيلىق قابىلداۋعا ءۇزىلدى- كەسىلدى تىيىم سالىنسىن. پەداگوگيكالىق ۇجىم جانە انا- انالار كوميتەتىنىڭ مۇشەلەرى اراسىندا مەكتەپ پەن سىنىپ قاجەتتىلىگىنە، مەرەكەلىك ءىس- شاراعا زاڭسىز اقشا جيناۋ ماسەلەسى بويىنشا ءتۇسىندىرۋ جۇمىسىن جۇرگىزسىن»، - دەپ جازىلعان بۇيرىقتا.

سونداي- اق، ءبىلىم بەرۋ ۇيىمدارىنا اتا- انالاردان زاڭسىز اقشا جيناۋعا جول بەرگەن سىنىپ جەتەكشىلەرىنە، مۇعالىمدەر مەن تاربيەشىلەرگە شارا قولدانۋ بۇيىرىلعان.

«ءبىلىم بەرۋ ۇيىمدارى اتا- انالاردان زاڭسىز اقشا جيناۋعا جول بەرمەۋ تۋرالى بۇيرىق شىعارسىن جانە ونى ۇجىمعا تانىستىرسىن. وسى بۇيرىق ورىندالماعان جاعدايدا ءبىلىم مەكەمەلەرىنىڭ باسشىلارىنا لاۋازىمىنان بوساتۋعا دەيىن قاتاڭ تارتىپتىك شارالار قولدانىلسىن»، - دەپ بۇيرىق شىعاردى ەلوردالىق ءبىلىم باسقارماسىنىڭ باسشىسى قاسىمحان سەنعازيەۆ.

اۆتور

ايجان سەرىكجان قىزى