استانادان ءۇي الىپ قويۋ كەرەك دەيتىندەر از ەمەس - ماقسات حالىق
استانا. KAZINFORM - ەلىمىزدىڭ ءار وڭىرىنەن استاناعا ارمان قۋىپ كەلەتىندەر از ەمەس. ال كەيىنگى ۋاقىتتا الماتىدا جەر سىلكىنۋى ءجيى تىركەلىپ، قالا تۇرعىندارى اراسىندا ەلورداعا قونىس اۋدارۋعا نيەتتىلەر كوبەيگەنى ءسوز بولا باستادى. وسى ورايدا، ساراپشىلار استاناداعى پاتەرلەردىڭ باعاسى قىمباتتاپ جاتقانىن العا تارتىپ وتىر.
Krisha.kz سايتىنىڭ ساراپتامالىق ءبولىمى ۇسىنعان مالىمەتكە سۇيەنسەك، بيىل اقپاندا ەكىنشى نارىقتاعى تۇرعىن ۇيلەردىڭ باعاسى تومەندەي باستاعان.
«مونيتورينگ جۇرگىزىلگەن 18 قالانىڭ توعىزىندا باعانىڭ تومەندەۋى تىركەلدى. اسىرەسە، اقتاۋ قالاسىندا ايتارلىقتاي ءبىلىندى (%2,4). استانادا پاتەر باعاسى ءبىر ايدا 2 پايىزعا ءوستى. الماتى مەن شىمكەنتتە شامالى ءوسۋ بايقالادى»، - دەلىنگەن زەرتتەۋ ماقالادا.
پاتەر باعاسى ەڭ جوعارى قالالار (1 شارشى مەترىنە): الماتىدا - 724 مىڭ تەڭگە، استانادا - 485 مىڭ تەڭگە، شىمكەنتتە - 421 مىڭ تەڭگەگە باعالانادى. ال ەڭ ارزان پاتەر قىزىلوردا (238 مىڭ تەڭگە) مەن اقتوبەدە (290 مىڭ تەڭگە).
ماماندار مالىمەتىنشە، الماتىداعى جەر سىلكىنىسى باعا ساياساتىنا قاتتى اسەر ەتە قويماعان.
«5-ناۋرىزداعى اقپارات بويىنشا، الماتىدا ءۇي ساتۋعا بايلانىستى جاڭا حابارلاندىرۋلار بايقالمايدى. استانا قالاسىندا دا سۇرانىس ارتقان جوق. ءبىر عانا وزگەرىس بار. الماتىلىقتاردىڭ ساعاتپەن جالعا بەرىلەتىن جەكە ۇيلەرگە دەگەن سۇرانىستارى ارتا باستادى. ناقتىلاساق، تاۋلىگىنە 3 ەسەگە ءوسىپ وتىر. بۇل - جەر سىلكىنىسى سالدارىنان ۋاقىتشا باسپانا ىزدەگەننەن، قالا بەردى، الدا كەلە جاتقان مەرەكەلەرگە بايلانىستى»، - دەيدى ساراپشىلار.
ال بەلگىلى ساراپشى ماقسات حالىقتىڭ ايتۋىنشا، استانادا پاتەر قۇنى قىمباتتاۋى مۇمكىن، بۇل - زاڭدىلىق.
«ەلوردادا پاتەر باعاسىنىڭ كوتەرىلۋى قالىپتى جاعداي. الماتىداعى جەر سىلكىنىسىنەن كەيىن «استانادان ءۇي الىپ قويۋ كەرەك» دەيتىندەر از ەمەس. قازىردىڭ وزىندە الماتىدا 6-قاباتتان جوعارى ورنالاسقان پاتەرلەردىڭ باعاسى ارزانداپ جاتىر. جەر سىلكىنىسى جيىلەپ كەتسە، وڭتۇستىك استانالىقتار وزگە وڭىرگە قونىس اۋدارماي، ەلوردانى بەتكە الاتىنى انىق. سايكەسىنشە، استاناداعى پاتەر باعاسى قىمباتتاي تۇسەدى. ءبىراق، قىمباتشىلىقتى قالىپتى جاعداي دەپ تە، ۋاقىتشا جاعداي دەپ تە باعالاۋعا بولادى»، - دەيدى ساراپشى.
اۆتور
ورالحان قوجانوۆ
