استاناداعى «قازاقستان» سپورت سارايىنىڭ قۇرىلىسى قاشان اياقتالادى - قالا اكىمى جاۋاپ بەردى

استانا. KAZINFORM - الداعى 1,5 جىلدىڭ ىشىندە ەلوردادا ەكى سپورتتىق وبەكت قايتا سالىنىپ، پايدالانۋعا بەرىلەدى. بۇل تۋرالى شاھار اكىمى جەڭىس قاسىمبەك ءمالىم ەتتى.

«بۇل جوبا 5 جىل بۇرىن باستالدى، ءساتسىز مودەل تاڭدالدى دەپ ويلايمىن. وتكەن جىلى سوت تارتىبىمەن مەملەكەت پەن جەكە سەرىكتەس اراسىنداعى مەملەكەتتىك-جەكەشەلىك ارىپتەستەستىك كەلىسىمشارتىن بۇزىپ، اتالعان وبەكتىنى قايتاردىق. قازىر بۇل وبەكتىنىڭ قۇرىلىسى كەلەسى جىلى اياقتايتىن كومپانيا انىقتالىپ جاتىر. الداعى 1,5 جىلدىڭ جوبا قۇرىلىسىن اياقتاۋ مىندەتىن قويىپ وتىرمىن»، - دەپ جاۋاپ بەردى تۇرعىن ساۋالىنا جەڭىس قاسىمبەك «بايقوڭىر» اۋدانى تۇرعىندارىمەن كەزدەسۋ بارىسىندا.

اكىمنىڭ ايتۋىنشا، زاماناۋي سپورت سارايىندا مۇز ايدىنى، باسسەين تاعى سول سياقتى سپورتتىق سەكسيالار بولادى.

«سونىمەن قاتار كەلەر جىلى كوكتەمدە سارى ارقا اۋدانىندا ورنالاسقان فۋتبول ستاديونىنىڭ قۇرىلىسىن قايتا جانداندىرۋدى قولعا الامىز. سوندىقتان دا قالاداعى وسى ەكى تاريحي سپورتتىق نىسان 1,5 جىلدا سالىنىپ، پايدالانۋعا بەرىلەدى»، - دەپ سەندىردى ەلوردا باسشىسى.

ەسكە سالا كەتسەك، ەلورداداعى «قازاقستان» سپورت سارايى قۇرىلىسىنىڭ بىتپەۋى - ارىدەن كەلە جاتقان پروبلەما. 2022 -جىلى جازدا «قازاقستان» سپورت سارايىن جوندەۋ جۇمىسى باستالاتىنى ايتىلدى.

اۆتور

داۋلەت ىزتىلەۋ