استاناداعى مەترو قۇرىلىسىنا تاعى 150 ميلليارد تەڭگە قاجەت بولۋى مۇمكىن

كولىك ءمينيسترى مارات قارابايەۆ ۇكىمەت وتىرىسىنان كەيىن وتكەن بريفينگىدە استانادا سالىنىپ جاتقان LRT قۇرىلىسىنا كەلەسى جىلى قانشا قاراجات كەرەك بولاتىنىن ايتتى، دەپ حابارلايدى Kazinform.

«بيىل جوباعا 52 ميلليارد تەڭگە ءبولىندى. جىل باسىندا وسى سومانى مينيسترلىك ەندى سۇراپ جاتىر دەگەن اقپارات تارادى. اڭگىمە ول جايلى ەمەس. ول سوما ءبولىنىپ، ىرگەتاس قازىقتارىن قاعۋعا باعىتتالدى. ول جۇمىس 96 پايىز ورىندالدى. ال تىرەۋ ورناتۋ جۇمىستارى 76 پايىزعا اياقتالدى. قۇرىلىمدارىن ءبىر- بىرىنە جالعاۋ جۇمىستارى، بىلۋىمشە، 82 پايىز جاسالدى. بۇل - بيىل اياقتالعان جۇمىستار»، - دەدى مارات قارابايەۆ.

سونداي- اق ۆەدومستۆو باسشىسى كەلەسى جىلى جوباعا قانشا قاراجات قاجەت بولاتىنىن ايتتى.

«كەلەسى جىلى قۇرىلىس- مونتاج جۇمىستارىن اياقتاۋ ءۇشىن شامامەن 45 ميلليارد تەڭگە كەرەك بولادى. قازىر قۇرىلىس الاڭىندا 1,5 مىڭعا جۋىق جۇمىسشى ەڭبەك ەتىپ جاتىر. ەگەر جۇمىس اۋقىمى كەڭەيسە، وندا قوسىمشا 150 ميلليارد تەڭگەگە دەيىن قاراجات سۇرايمىز. الايدا نىساندى اياقتاۋ جوسپارى 2025 -جىلعا كوزدەلگەن. العاشقىدا 8 ستانسيا مەن 5 پويىز جۇمىسىن باستايدى، - دەدى مينيستر.

اۆتور

ەسىمجان ناقتىباي