استانادا رەسپۋبليكالىق بيۋدجەت ەسەبىنەن قوسىمشا 10 مەكتەپ سالىنادى
2024-جىلى رەسپۋبليكالىق بيۋدجەتتەن ەلوردادا 10 مەكتەپ سالۋ ءۇشىن قارجى بولىنەدى. بۇل تۋرالى وقۋ-اعارتۋ ءمينيسترى عاني بەيسەمبايەۆ استانا جۇرتشىلىعىمەن كەزدەسۋىندە ايتتى، دەپ حابارلايدى Kazinform.
«جالپى وقۋ- اعارتۋ مينيسترلىگىنىڭ باستى مىندەتتەرىنىڭ ءبىرى - قارجىلاي قولداۋ كورسەتۋ. سالىستىرار بولساق، 2020 -جىلى رەسپۋبليكالىق بيۋدجەتتەن استانا قالاسىنا بەرىلگەن قارجى كولەمى 20 ميلليارد تەڭگەنىڭ اياسىندا بولسا، 2023 -جىلى 80 ميلليارد تەڭگەگە ارتىپ وتىر. بۇل - جاقسى جاڭالىق. ەكىنشىدەن، جەمقورلاردان الىنعان قارجى جيناقتالاتىن ينفراقۇرىلىمدى قولداۋ ورتالىعىنان سالىناتىن «جايلى مەكتەپتەردەن» بولەك، بيىل استانا قالاسىنا 10 مەكتەپكە قارجى بولدىك. ونىڭ جەتەۋى پايدالانۋعا بەرىلدى»، - دەدى ۆەدومستۆو باسشىسى.
عاني بەيسەمبايەۆ استانا قالاسىنداعى ءۇش اۋىسىمدى، اپاتتى مەكتەپتەردىڭ جاعدايىن تۇزەۋ ءۇشىن وقۋ-اعارتۋ مينيسترلىگى، ۇكىمەت ءتيىستى قاراجاتتى اياماي ءبولىپ كەلە جاتقانىن ايتتى.
«ءبىز بۇل قولداۋدى ارى قاراي دا جالعاستىرۋدى جوسپارلاپ وتىرمىز. تاعى 10 مەكتەپ ءتىزىمىن بەرۋدى اكىممەن كەلىستىك. كەلەسى جىلى قوسىمشا تاعى 10 مەكتەپكە قارجى بەرۋدى كوزدەپ وتىرمىز. وسىنداي قارجى ءبولىنىپ، قولداۋ كورسەتىلىپ وتىرعاندا مەكتەپتەردە وقۋشىلارىمىزعا جايلى ورتا قالىپتاسۋى ءتيىس. ياعني، مەكتەپ باسشىلارى، پەداگوگيكالىق ۇجىم بالالارىمىزعا جىلى شىراي تانىتىپ، سۇيىسپەنشىلىكپەن قابىلداپ، بىلىكتى دە، ءبىلىمدى ازامات بولىپ شىعۋىنا بارلىق جاعداي جاساۋى قاجەت»، - دەدى مينيستر.
اۆتور
مارلان جيەمباي
