استانادا رەكوردتى كولەمدە مەكتەپتەر سالىنىپ جاتىر

استانا. KAZINFORM - استانا قالاسىنىڭ اكىمى جەڭىس قاسىمبەك Instagram پاراقشاسىندا الداعى وقۋ جىلىندا اشىلاتىن مەكتەپتەر تۋرالى جازدى.

اكىم قازىر 30-دان استام مەكتەپتىڭ قۇرىلىسى ءجۇرىپ جاتقانىن ايتتى. ونىڭ ىشىندە 90 مىڭ وقۋشىعا ارنالعان ەكى اۋىسىمدى 24 جايلى مەكتەپ بار.

«استانادا رەكوردتى كولەمدە مەكتەپتەر سالىنىپ جاتىر. قازىرگى ۋاقىتتا 100 مىڭعا جۋىق وقۋشى ورنىنا (ەكى اۋىسىمدى) ارنالعان 30-دان استام مەكتەپتىڭ قۇرىلىسى ءجۇرىپ جاتىر. ولاردىڭ اراسىندا «جايلى مەكتەپ» ۇلتتىق جوباسى اياسىندا Samruk-Kazyna Construction سالاتىن (2024-2025 -جىلدارى) 90 مىڭ وقۋشى ورنىنا ارنالعان ەكى اۋىسىمدى 24 جايلى مەكتەپ بار. قالانى ارالاۋ بارىسىندا ق ر پرەمەر-ءمينيسترىنىڭ ءبىرىنشى ورىنباسارى رومان سكليارمەن بىرگە وقۋ جىلىنىڭ باسىندا اشىلاتىن جايلى مەكتەپتەرگە باردىق.

بۇل 8 مەكتەپ مىنا مەكەنجايلاردا ورنالاسقان: سارى ارقا اۋدانىندا ۇلىتاۋ مەن ناۋرىز كوشەلەرىنىڭ قيىلىسىندا، بەيبارىس سۇلتان كوشەسىندە، نۇرا اۋدانىندا تولە بي كوشەسى مەن 24 كوشەنىڭ قيىلىسىندا، ەسىل اۋدانىندا قابانباي باتىر داڭعىلى مەن سىعاناق كوشەسىنىڭ قيىلىسىندا، نۇرا اۋدانىندا تولە بي كوشەسى، 31 مەكەنجايىندا، ماڭگىلىك ەل داڭعىلى مەن ە-497 كوشەسىنىڭ قيىلىسىندا، ورىنبور كوشەسى مەن №37 كوشەنىڭ قيىلىسىندا، الماتى اۋدانىندا ا. بايتۇرسىنوۆ كوشەسىندە. سونداي- اق، وقۋ جىلىنىڭ باسىندا جوعارىدا اتالعان وقۋ ورىندارىنان باسقا تاعى ءۇش مەملەكەتتىك جانە ءبىر جەكە مەكتەپ اشۋ جوسپارلانىپ وتىر. سول سياقتى جىل سوڭىنا دەيىن تاعى 7 جايلى مەكتەپ، 5 مەملەكەتتىك جانە 3 جەكەمەنشىك مەكتەپ اشۋ جوسپاردا بار. وسىلايشا، جاڭا وقۋ جىلى بارىسىندا 23 مەكتەپتىڭ قۇرىلىسى اياقتالادى»، - دەلىنگەن حابارلامادا.

اۆتور

ەلميرا ورالبايەۆا