استانادا ش ى ۇ مۇشە مەملەكەتتەردىڭ وتىرىسى يران پرەزيدەنتىن ەسكە الۋمەن باستالدى
استانا. KAZINFORM - ەلوردادا شاڭحاي ىنتىماقتاستىق ۇيىمعا مۇشە ەلدەردىڭ س ءى م باسشىلارى جينالدى.
العى ءسوزدى قازاقستان رەسپۋبليكاسىنىڭ پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ الىپ، شەتەلدىك مەيمانداردى قارسى الدى.
كەڭەس وتىرىسىنا قاتىسۋشىلار يران پرەزيدەنتى اياتوللا سەيەد يبراحيم رايسيدى ەسكە الىپ، 1 مينۋت ۇنسىزدىك جاريالادى.
«وكىنىشكە قاراي، سىرتقى ىستەر مينيسترلەرى كەڭەسىنىڭ وتىرىسىن قايعىلى حاباردان باستاۋعا ءماجبۇر بولىپ وتىرمىز. ءبىز ءبارىمىز يران پرەزيدەنتى اياتوللا سەيەد يبراحيم رايسي مەن مارتەبەلى راۆەسي مىرزانىڭ جانە ءبىزدىڭ قۇرمەتتى ارىپتەسىمىز، مەيىرىمدى دوسىمىز ابدولاحيان مىرزانىڭ قايتىس بولعانى تۋرالى حابار قابىرعامىزدى قايىستىردى. ولار سوڭعى ساتكە دەيىن ءوز وتانىنا ادال قىزمەت ەتكەن كورنەكتى تۇلعالار، ولار ەلىنىڭ مۇددەسىن قورعاپ، ومىرلەرىن يران حالقىنىڭ ءال-اۋقاتىن قامتاماسىز ەتۋگە، ءوز ەلىنىڭ دامۋىنا جانە حالىقارالىق تۇراقتىلىق پەن قاۋىپسىزدىكتى قامتاماسىز ەتۋگە ارنادى. مەن ءوز اتىمنان جانە بۇكىل كەڭەستىڭ اتىنان قايعىرىپ كوڭىل ايتامىن»، - دەدى مۇرات نۇرتىلەۋ وتىرىستى اشا وتىرىپ.
ودان ءارى وتىرىسقا قاتىسۋشىلار ءبىر مينۋت ۇنسىزدىك جاريالاپ، يران پرەزيدەنتىن ەسكە الدى.
«ءوز اتىمنان پاكىستان مەن بەلارۋس سىرتقى ىستەر مينيسترلەرىن ءبىزدىڭ كەڭەستەرىمىزدىڭ جۇمىسىنا العاش رەت قاتىسىپ وتىرعاندىقتان ىقىلاسپەن قارسى الامىن. بۇگىنگى وتىرىس 3-4-شىلدەدە استانادا وتەتىن شاڭحاي ىنتىماقتاستىق ۇيىمىنىڭ 24-سامميتىنە دايىندىقتىڭ نەگىزگى جانە سوڭعى كەزەڭى»، - دەيدى ول.
«بۇگىنگى وتىرىس ناتيجەلى جانە استانا سامميتىن تابىستى وتكىزۋگە بەرىك نەگىز بولاتىنىنا سەنىمدىمىن. قۇرمەتتى دوستار، ش ى ۇ ءوزىنىڭ دامۋىنىڭ شيرەك عاسىرىندا كوپسالالى ءوزارا ءىس-قيمىلدىڭ بەدەلدى جانە ءتيىمدى الاڭى مارتەبەسىنە يە بولدى. شاڭحاي رۋحىنىڭ نەگىزگى پرينتسيپتەرى، تاتۋ كورشىلىك، دوستىق جانە ءوزارا قولداۋ ءبىزدىڭ ۇيىمنىڭ باستى بەلگىسى. قازاقستان ءوز تاراپىنان ش ى ۇ الەۋەتىن بارىنشا اشۋ ءۇشىن ۇزدىكسىز جۇمىس ىستەدى. ءبىزدىڭ ءتوراعالىعىمىزدىڭ باسىمدىقتارىنا سايكەس، ءبىز تۇراقتى دامۋ مەن وركەندەۋ جولىندا ينكليۋزيۆتى ديالوگ پەن ىنتىماقتاستىق قۇرۋعا ۇمتىلامىز»، - دەدى مۇرات نۇرتىلەۋ وتىرىستىڭ اشىلۋ سالتاناتىندا.
ءمينيستردىڭ ايتۋىنشا، قازاقستاننىڭ ۇيىتقى بولۋىمەن ش ى ۇ اياسىندا 100-گە جۋىق ءىس-شارا وتكەن.
«استانا سامميتى 20-دان استام قۇجاتتى قامتيدى، ونىڭ ىشىندە ەكونوميكا، قاۋىپسىزدىك، قورشاعان ورتانى قورعاۋ جانە باسقا دا سالالار بار. ءبىز ش ى ۇ ەلدەرى كوشباسشىلارىنىڭ كەزدەسۋىنە ەلەۋلى ءۇمىت ارتامىز. الداعى كەلىسسوزدەر مەن شەشىمدەر ۇيىمنىڭ جاڭا عاسىرلىق تاريحىن اشۋعا ارنالعان جانە ءبىز بەيبىتشىلىكتى ساقتاۋ جانە تۇراقتى دامۋدى قامتاماسىز ەتۋ ءۇشىن ورتاق كۇش-جىگەرىمىزدى تاعى دا راستايمىز. العاش رەت ش ى ۇ فورماتىندا مەملەكەتتەردىڭ، مۇشەلەردىڭ، باقىلاۋشىلار مەن سەرىكتەستەردىڭ، ديالوگ بويىنشا، سونداي-اق ب ۇ ۇ باس حاتشىسىنىڭ قاتىسۋىمەن كەزدەسۋ وتكىزىلەدى. سونىمەن قاتار، بەلارۋس ەلىنىڭ ءبىزدىڭ ۇيىمعا قوسىلۋىمەن ۇيىمدى «شاڭحاي وندىعى» دەپ اتاۋعا بولادى. ءبىز الداعى سامميتكە نىق سەنىممەن بارا جاتقانىمىزدى اتاپ وتكىم كەلەدى»، - دەيدى ول.
بۇگىن استانادا شاڭحاي ىنتىماقتاستىق ۇيىمىنا مۇشە مەملەكەتتەردىڭ سىرتقى ىستەر مينيسترلەرى كەڭەسىنىڭ وتىرىسى ءوتىپ جاتىر.
اۆتور
داۋلەت ىزتىلەۋ
