استانادا دارىگەرلەر كوزى كورمەي قالعان ناۋقاستىڭ جانارىن قالپىنا كەلتىردى

استانا. قازاقپارت - استانالىق دارىگەرلەر كوزى كورمەي قالعان ناۋقاستىڭ جانارىن قالپىنا كەلتىردى. كۇردەلى وپەراتسيا ۇلتتىق نەيروحيرۋرگيا ورتالىعىندا جۇرگىزىلدى. اق حالاتتىلار ينسۋلتتەن كەيىنگى اسقىنۋدى قالاي ەمدەدى؟

«جارىق دۇنيەنى كورمەگەننەن ارتىق ازاپ جوق». گۇلميرا بايداليەۆا اڭگىمەسىن وسىلاي باستادى. ول ءۇش اي بۇرىن ينسۋلت العان. سالدارىنان كورۋ قابىلەتى ناشارلاپتى. ءبىر كوزى 30 پايىزعا، ال ەكىنشىسى مۇلدەم كورمەي قالعان. جاعداي ۋشىققان سوڭ كەيىپكەرىمىز تالدىقورعاننان استاناعا كەلىپ، جانارىن قالپىنا كەلتىرۋدىڭ امالىن ىزدەيدى. سوڭعى ءۇمىت ۇلتتىق نەيروحيرۋرگيا ورتالىعى بولدى دەيدى.

گۇلميرا بايداليەۆا، تالدىقورعان قالاسىنىڭ تۇرعىنى:

- ينسۋلت العان سوڭ بىردەن وڭ كوزىم كورمەي قالدى. سول جاق كوزىم بۇلدىراپ تۇردى. سودان الماتىعا بارىپ، 4 اپپاراتتىڭ كومەگىمەن تەكسەرىستەن ءوتتىم. ءبىراق ول جاقتا ناقتى ەشتەڭە ايتا المادى. تەك جاعداي ناشارلاي بەرەدى، ەكىنشى كوزىڭ دە كورمەي قالادى دەپ، شىعارىپ سالدى.

ەلورداداعى نەيروحيرۋرگتار ناۋقاستىڭ ميىنداعى تامىرلارى كەڭەيىپ كەتكەن دەيدى. مەديتسينالىق تىلمەن ايتقاندا انيەۆريزما پايدا بولعان. ول كوزدىڭ نەرۆ تالشىقتارىن قىسىپ، قوس جانارىنا كەرى اسەرىن تيگىزگەن. ءبىراق كەسەلدىڭ كۇردەلىلىگىنە قاراماستان، ورتالىق ماماندارى ونى وپەراتسياعا الىپ، ەم جاساۋعا بەل بۋدى.

ەربول ماحامبەتوۆ، ۇلتتىق نەيروحيرۋرگيا ورتالىعىنىڭ ءبولىم مەڭگەرۋشىسى:

- وپەراتسيا 2 ەتاپقا بولىنگەن. 1-وپەراتسيا ءبىز تەرىنىڭ استىنان ءبىر تامىردى الىپ، ميدىڭ تامىرىنا جالعادىق. 2-ەتاپپەن باستى اشىپ ترەپوناتسيامەن سول ۇلكەن انيفريزمامەن تولتىرىلعان سپيرالدى الىپ شىقتىق. وپەراتسيادان كەيىن كەلەسى كۇندە، سول پاتسيەنتتىڭ كوز كورە باستادى. سوعان ءبىز وتە قۋاندىق.

جالپى جىل سايىن ورتالىققا وسىنداي دياگنوزبەن 200-گە جۋىق ادام تۇسەدى. ءبىراق مۇنداي كۇردەلى جاعدايدا وتا وتە سيرەك جاسالادى دەيدى ماماندار. ابىروي بولعاندا 15 ساعاتقا سوزىلعان وپەراتسيا وڭ ناتيجە بەردى. بىلىكتى دارىگەرلەردىڭ ەڭبەگى اقتالدى. ەندى كەيىپكەرىمىزدى وڭالتۋ كەزەڭى كۇتىپ تۇر.

www.24.kz