استانادا اۆتوبۋستاعى «قوياندارعا» تىقىر تاياندى

استانا. قازاقپارات - جول اقىسىن تولەمەيتىندەردى بەينەكامەرا اڭدىپ وتىرادى، دەپ حابارلايدى 24KZ.

استانا وسىنداي پيلوتتىق جوبانى قولعا الدى. قوعامدىق كولىكتەر جاراقتاندىرىلسا، اۆتوبۋس پاركى اركىمگە جەم بولمايدى ءارى كوندۋكتور ىزدەپ اۋرەگە تۇسپەيدى.

ماماندار: «ءتىپتى بيلەت الماعاندار عانا ەمەس، پوليتسياعا كانىگى قىلمىسكەرلەردى دە تاۋىپ بەرەمىز»، - دەپ وتىر.

استانا اۆتوبۋستارىندا جول اقىسىن تولەۋدىڭ جاڭا ءتاسىلى ەنگىزىلىپ جاتىر. سول ارقىلى بيلەتسىز جولاۋشىلار سانىن ازايتىپ، قىزمەت كورسەتۋ ساپاسىن جاقسارتىپ، قاۋىپسىزدىكتى ارتتىرماق. ول ازىرگە ءبىر عانا اۆتوبۋسقا ەنگىزىلدى. جۇيەنىڭ قالاي جۇمىس ىستەيتىنىن بىرگە كورەيىك. مامىردىڭ ەكىسىنەن باستاپ ەلورداداعى №24 اۆتوبۋستا جولاۋشىلار وسىلاي كىرگەن بەتتە بەينەكامەراعا ءتۇسىرىلىپ جاتىر. ءار ايالدامادان قانشا ادام كىرگەنى جانە قوعامدىق كولىكتە جالپى قانشا جولاۋشى بارى تابلودان شىعىپ تۇرادى. بۇل مالىمەتتەر كولىك باقىلاۋ دەپارتامەنتىنە ءتۇسىپ، تولەم تۋرالى مالىمەتتەردى سالىستىرۋعا كومەكتەسەدى.

ورىنباسار اگبايەۆ، استانا قالالىق كولىك باقىلاۋ دەپارتامەنتىنىڭ باسقارۋشى ديرەكتورى:

- ءار اۆتوبۋستا 3-تەن 5 كامەراعا دەيىن ورناتىلىپ، بورت كومپيۋتەرىنە جالعانادى دا، روۋتەر جانە كابەلمەن بايلانىس جاسالادى. سونىڭ ارقاسىندا ادامدار ايالدامادان كىرىپ، شىققان ساتتە-اق جولاۋشىلار اعىمىن باقىلاۋعا مۇمكىندىك پايدا بولىپ، سايكەسىنشە اقى تولەمەگەندەر انىقتالادى.

«جالپى ەلوردادا قوعامدىق كولىكتە جول اقىسىن تولەۋدىڭ ءبىر ەمەس، بىرنەشە ءادىسى بار، سونىڭ وزىندە اۆتوبۋسقا كىرگەن بەتتە تولەم جاساماعان جولاۋشىلارعا بەتپە-بەت كەلەمىز»، - دەيدى باقىلاۋشى.

جانار قوسمامبايەۆا، كولىك باقىلاۋ دەپارتامەنتىنىڭ مەنەدجەرى:

- QR- تولەممەن تولەيدى بولماسا كارتامەن ۆاليداتسيا جاسايدى. قازىرگى تاڭدا بىزدە قالامىزدا بانك كارتاسىمەن دە تولەۋگە بولادى. ءتىپتى جولاۋشىلاردىڭ ينتەرنەتى بولماي قالسا، bluetooth ارقىلى دا تولەۋگە بولادى. تولەي المايتىن جاعداي جوق.

جىل باسىنان بەرى 268 مىڭ ادام جول اقىسىن تولەۋدەن جالتارعان. الايدا تەك 10933 ادامعا اكىمشىلىك حاتتاما جازىلىپتى. «ال جاڭا جوبا ىسكە قوسىلسا، ەشكىم نازارسىز قالمايدى، ءتىپتى قوعامعا قاۋىپتى ادامداردى دا اشكەرەلەۋگە بولادى»، - دەيدى ماماندار.

ورىنباسار ارىنبايەۆ، CTS باسقارۋشى ديرەكتورى:

- قىلمىسكەرلەردىڭ بازالىق مالىمەتتەرىمەن دۇرىس ينتەگراتسيا جاسالسا، بەت-الپەتىنىڭ سايكەستىگىنە قاراي پوليتسيا دەپارتامەنتى مەن ءوزىمىزدىڭ ديسپەتچەرلەر بولىمىنە كۇدىكتى جايلى اقپارات جىبەرىپ، قىلمىسكەردىڭ دە جولىن كەسۋگە بولادى.

بەينەاناليتيكا جاسالىپ جاتقالى جول اقىسىن تولەمەگەن 2 مىڭ جولاۋشى انىقتالعان. الايدا بۇل ازىرگە تەك پيلوتتىق جوبا بولعاندىقتان، ادامدارعا ايىپپۇل سالىنبادى.