استانادا امستەردام الاڭى اشىلدى
استانا. KAZINFORM - نيدەرلاند پرەمەر- ءمينيسترى مارك ريۋتتەنىڭ قازاقستانعا جۇمىس ساپارى اياسىندا استانادا امستەردام الاڭىنىڭ اشىلۋ سالتاناتى ءوتتى.
بۇل - مارك ريۋتتەنىڭ قازاقستانعا جاساعان ءۇشىنشى جۇمىس ساپارى. ونىڭ استاناعا العاشقى ساپارى سوناۋ - 2010 - جىلى بولعان. ودان كەيىن قازاقستانعا 2015 -جىلى كەلگەن.
«ءار كەلگەن سايىن كورسەتىلگەن ءىلتيپات پەن قوناقجايلىلىق ءۇشىن راقمەت. استاناعا قايتا كەلگەنىمە وتە قۋانىشتىمىن. بۇل قالا ءوزىنىڭ قايناعان ەنەرگياسىمەن، قارقىندى دامۋىمەن جانە تاماشا ادامدارىمەن مەنى ءار ۋاقىتتا تاڭعالدىرادى. بۇگىن وسى شاھاردا بولۋ مەن ءۇشىن ۇلكەن مارتەبە! بۇل كۇن قازاقستان مەن نيدەرلاند اراسىنداعى بەرىك بايلانىستى ايقىنداپ تۇر. ءبىزدىڭ ىنتىماقتاستىعىمىز تەك ۇكىمەتتىك ورتادا عانا ەمەس، سونىمەن قاتار سۋ رەسۋرستارىن باسقارۋ سالاسىندا دا بىرتە- بىرتە جاقسارىپ كەلەدى. ءبىز ەكى ەلدىڭ تۇرعىندارى اراسىندا ىسكەرلىك پەن ۇجىمدىق جۇمىستى دامىتۋعا ىقپال ەتەتىن دوستىق قارىم-قاتىناس ورناتقانىمىزعا قۋانىشتىمىز. وسىنداي دوستاردىڭ قاتارىندا بولعانىمدى ماقتان تۇتامىن. وسى ەرەكشە كۇن ءۇشىن تاعى دا العىسىمدى بىلدىرگىم كەلەدى»، - دەدى مارك ريۋتتە الاڭنىڭ اشىلۋ سالتاناتىندا.
2015 -جىلدىڭ كۇزىندە نيدەرلاندتىڭ ەڭ ءىرى قالالارىنىڭ ءبىرى روتتەردامدا استانا الاڭى اشىلعان بولاتىن. پرەمەر- ءمينيستردىڭ ورىنباسارى - ۇكىمەت اپپاراتىنىڭ باسشىسى عالىمجان قويشىبايەۆ اتاپ وتكەندەي، بۇگىنگى ءىس- شارا ەلدەر اراسىنداعى دوستىق قارىم- قاتىناستىڭ تاعى ءبىر دالەلى.
«استانادا امستەردام الاڭىنىڭ اشىلۋى - نيدەرلاندتىڭ قازاقستانمەن ىنتىماقتاستىعىنداعى ماڭىزدى وقيعا. حالىقتار اراسىنداعى بەرىك بايلانىستى راستايتىن جانە ەلدەر اراسىنداعى مادەني الماسۋعا جاردەمدەسەتىن وقيعا. ءبىز ىنتىماقتاستىقتى جوعارى باعالايمىز. سونىمەن قاتار نيدەرلاندتىڭ سۋ تاسقىنىنا قارسى كۇرەستە العاشقىلاردىڭ ءبىرى بولىپ كومەك قولىن سوزعانىن اتاپ وتكىم كەلەدى. نيدەرلاند - ءبىزدىڭ ەكونوميكاعا ەڭ ءىرى ينۆەستور. جىلدار وتكەن سايىن ىنتىماقتاستىعىمىز نىعايا تۇسەدى دەپ سەنەمىن»، - دەدى عالىمجان قويشىبايەۆ.
اۆتور
ورالحان قوجانوۆ
