استانادا 20 مىڭ جەر ءۇيدىڭ 12 مىڭى تابيعي گازعا كوشىرىلدى

استانا. KAZINFORM - استانا قالالىق ەنەرگەتيكا باسقارماسى باسشىسىنىڭ ورىنباسارى ماقسات ەسماعۇلوۆ قالانى گازداندىرۋ جۇمىستارى تۋرالى باياندادى.

Азербайджан приостановил поставки газа в Болгарию
Фото: report.az

ەلوردانى گازداندىرۋ جوباسى 2019 -جىلدان بەرى ىسكە اسىرىلىپ كەلەدى. ءبىر جىلدا «سارى ارقا» گاز قۇبىرىنىڭ قۇرىلىسى اياقتالدى. بۇل قۇبىر - تاۋەلسىزدىك تاريحىنداعى ەڭ ءىرى ينفراقۇرىلىمدىق جوبالاردىڭ ءبىرى بولىپ ەسەپتەلەدى.

− قازىر قالادا 8 شاقىرىمنان استام گاز قۇبىرى تارتىلعان. نەگىزگى گاز ينفراقۇرىلىمى قالىپتاستى دەپ ايتۋعا بولادى، ول بۇگىندە جىلۋ، ەلەكتر، سۋ جۇيەلەرى سەكىلدى قالىپتى جۇمىس ىستەپ تۇر. بەكىتىلگەن تاريف تەكشە مەترىنە 39 تەڭگە دەڭگەيىندە ساقتالعان، گاز قۇبىرى تارتىلعالى بۇل باعا استانا جانە اقمولا وبلىسىندا ءبىر دەڭگەيدە قالىپ وتىر، - دەدى م. ەسماعۇلوۆ قالالىق ءماسليحات وتىرىسىندا.

استانانى گازداندىرۋدىڭ نەگىزگى ماقساتى - جىلىتۋ ماۋسىمىنداعى تۇتىننەن ارىلۋ ەدى. ياعني جەكە سەكتوردىڭ بارلىعىن ورتالىقتاندىرىلعان جىلۋ جۇيەسىنە قوسۋ مۇمكىندىگى بولماعاندىقتان، ونى تابيعي گازعا اۋىستىرۋ قاجەت بولدى.

بۇگىندە استانادا گازعا اۋىستىرۋدى تالاپ ەتەتىن 20 مىڭ جەر ءۇي بولسا، ونىڭ 14 مىڭىنا ەسىك الدىنا دەيىن گاز قۇبىرىن تارتىلعان. ناتيجەسىندە شامامەن 12 مىڭ ابونەنت تىركەلدى.

− قازىر بايقوڭىر اۋدانىنان باسقا بارلىق اۋداندارعا گاز جەتكىزىلگەن. سارى ارقا اۋدانىندا كوكتال-1، كوكتال-2، اگروقالاشىق، ماسكەۋ، پوتانين، بوگەنباي كوشەسىندەگى ۇيلەر، الماتى مەن سارايشىق اۋداندارىندا - وڭتۇستىك- شىعىس، سيليكاتنىي، پرومىشلەننىي، جەلەزنودوروجنىي، كۇيگەنجار، ينتەرناتسيونالنىي الاپتارى گازعا قوسىلدى. بىلتىردان باستاپ، سول جاعالاۋدى گازبەن قامتۋ جۇمىستارىن باستادىق، - دەپ ءتۇسىندىردى سپيكەر.

اسىرەسە ەڭ نەگىزگى ءتۇتىن ماسەلەسى - قالا ورتالىعىنداعى شۇبار تۇرعىن الابىندا بايقالاتىن. مۇندا ىشكى گاز جۇيەلەرىنىڭ قۇرىلىسى %85 دايىن، جىل سوڭىنا دەيىن بۇل اۋماقتى گازعا قوسۋ جوسپارلانعان.

تەلمان تۇرعىن الابى اسا ۇلكەن ەمەس، ءبىراق وندا دا ىشكى تاراتۋ جۇيەلەرى جوبالانعان.

ۇركەر اۋدانىنا جەكە ينۆەستور تارتىلىپ، 6 مىڭ ءۇيدىڭ مىڭنان استامى گازعا قوسىلدى. قالعان جۇمىستاردى بيىلعى جىل سوڭىنا دەيىن اياقتاۋ كوزدەلگەن.

− ەندى گازسىز قالىپ وتىرعان ەڭ ۇلكەن ەكى اۋماق - بايقوڭىر اۋدانىنداعى ءوندىرىس پەن كيرپيچنىي الاپتارى. وندا نەگىزگى گاز اكەلۋشى قۇبىرلار مەن گاز ستانسياسى ورناتىلعان، ءبىراق كوشەلەردە ءدالىز جوق، رەتسىز سالىنعان ۇيلەرگە بايلانىستى جوبالاۋ قيىنعا سوعۋدا. سوعان قاراماستان، ءبىراز جۇمىس جۇرگىزىلدى، بيىل ناۋرىز ايىندا بيۋدجەتكە ءوتىنىم بەرىلەدى جانە جوبا ەكى جىل بويى جۇرگىزىلەدى. رەتسىز سالىنعان نىساندار سەبەبىنەن قۇبىرلار جەر ۇستىندە جۇرگىزىلەدى، - دەدى ماقسات ەسماعۇلوۆ.

بۇعان دەيىن استانا قالاسىنىڭ «ۇركەر» تۇرعىن الابىندا گاز تاراتۋ جەلىلەرىنىڭ قۇرىلىسى تۋرالى حابارلاعان ەدىك.

اۆتور

ايجان سەرىكجان قىزى

سوڭعى جاڭالىقتار