استاناعا اعىلعان كوش قالاي رەتتەلۋى كەرەك

استانا. KAZINFORM - سەۋل، سينگاپۋر سەكىلدى الىپ مەگاپوليستەر ۋربانيزاتسيانى رەتتەۋدە كوشىپ كەلۋشىلەر سانىن شەكتەۋ ءتاسىلىن قولدانباعان. بۇل تۋرالى «جاڭا باستامالار اليانسى» قوعامدىق بىرلەستىگىنىڭ جەتەكشىسى سابىرجان سەيتجانوۆ ايتتى.

«ەڭبەك رەسۋرستارىن دامىتۋ» ا ق ساراپشىلارىنىڭ ايتۋىنشا، 2050 -جىلى استانا حالقىنىڭ سانى 3,5 ميلليون ادامعا جەتەدى. سونداي-اق، ساراپشىلار قالانىڭ دەموگرافيالىق دامۋ سسەناريىن دە جاساپ شىقتى. بۇل بولجامنىڭ ەرەكشەلىگى سول، ول قازىردىڭ وزىندە 25 جىلدان كەيىن باس قالادا تۇراتىن ميگرانتتار مەن ولاردان تاراعان ۇرپاقتىڭ ۇلەسىن كورسەتىپ بەرە الادى. وسى بولجامعا سەنسەك، 2050 -جىلى ەلوردا تۇرعىندارىنىڭ 47 پايىزىن كوشىپ كەلۋشىلەر قۇرايتىن بولادى»، - دەدى سابىرجان جارىلقاعان ۇلى.

سپيكەردىڭ ايتۋىنشا، ۇلكەن قالالارعا اعىلعان كوشتى باسەڭدەتۋدىڭ امالى - اۋىلدارداعى ءومىر ساپاسىن ارتتىرۋ.

«كوشى-قوننىڭ استانا ومىرىنە تيگىزەتىن اسەرىنىڭ باسقا دا اسپەكتىلەرىنە ءمان بەرۋ كەرەك. Spik.kz ساراپتامالىق پورتالىنىڭ دەرەگىنشە، استانانىڭ سۋمەن قامتۋ جۇيەسى تەك 1 ميلليوننان استام ادامعا ەسەپتەلگەن. ال ءىس جۇزىندە قازىرگى كۇنى قالادا 1,5 ميلليوننان استام ادام تۇرىپ جاتىر. قازاقستاندىق دەموگرافتار، ساياساتكەرلەر، الەۋمەتتانۋشىلار، ەكونوميستەر بۇل ماسەلەنىڭ شەشىمى - اۋىلدى كوركەيتۋ دەپ سانايدى. ياعني، اۋىلداعى ءومىر جاقسارسا، قالاعا اعىلعان كوش سايابىرسيدى»، - دەدى ول «استانا جانە كوشى- قون: دامۋ جانە تۇراقتىلىق ۆەكتورى» اتتى قوعامدىق تىڭداۋدا.

سابىرجان سەيتجانوۆ حالىقارالىق تاجىريبەنى دە زەردەلەۋ ماڭىزى ەكەنىن ايتتى.

«سينگاپۋردى الايىق، رەسۋرستاردى ءتيىمدى باسقارۋ ارقىلى ۋربانيزاتسياعا توتەپ بەرە الدى. سەۋل قالاسىندا دا 60-80- جىلدارى حالىق سانى 2,5 ميلليوننان 8,3 ميلليون ادامعا ءوسىپ، قالا ينفراقۇرىلىمىنا جۇكتەمە ارتقان. بيلىك سول كەزدە كولىك قاتىناسى جۇيەسىن جەتىلدىردى، ونىڭ ىشىنە مەترونىڭ اينالما جەلىسى دە كىرەدى. سۋمەن قامتۋ جۇيەسىن جاڭعىرتتى. قولجەتىمدى باسپانالار سالدى. بۇل جاڭا تۇرعىنداردىڭ قالا ومىرىمەن ينتەگراتسياسىن جەڭىلدەتتى جانە قالانى دامىتتى. ءبىر اتاپ وتەرلىگى، بۇل قالالاردا قالاعا كوشىپ كەلۋدى شەكتەۋ ءتاسىلى قولدانىلمادى»، - دەدى ول.

ءسوز سوڭىندا سپيكەر كوشى-قون تابيعي ۇدەرىس قانا ەمەس، ءار ادامنىڭ كونستيتۋتسيالىق قۇقىعى ەكەنىن اتاپ ءوتتى.

«قايدا تۇرعانىنا، قايتا تۋعانىنا قاراماستان ازاماتتار ەل ىشىندە ەمىن-ەركىن كوشىپ-قونا الادى. بۇل تۇرعىدا ولار وزدەرىن قوعامنىڭ بولشەگى رەتىندە سەزىنۋى ءۇشىن تەز ءسىڭىسىپ كەتۋىنە جاردەمدەسۋىمىز كەرەك. ال ينفراقۇرىلىمعا جۇكتەمەنىڭ ارتۋى جۇيەلى تۇردە شەشىلۋى كەرەك. ەشبىر جاعدايدا ميگرانتتار كەمسىتۋشىلىككە ۇشىراماۋى ءتيىس»، - دەدى «جاڭا باستامالار اليانسى» قوعامدىق بىرلەستىگىنىڭ جەتەكشىسى.

ايتا كەتەيىك، بۇعان دەيىن 2050 -جىلى استانادا حالىق سانى قانشا ادامعا جەتەتىنىن جازعان ەدىك.

اۆتور

ەربول جانات