استانا ىرگەسىندەگى اۋىل ازاماتى قىستا دا بيە بايلاپ، قىمىز باپتاپ وتىر
استانا. قازاقپارات - قىستا دا قىمىز ۇزىلمەيدى. استانانىڭ ىرگەسىندەگى شۇبار اۋىلىنداعى جۇرتشىلىق قارا سۋىق كۇندەرى دە بيە بايلاپ، ساۋمال ساپىرىپ وتىر، دەپ حابارلايدى 24kz.
ءيا، قىستا قىمىز باپتاپ ۇستاۋدىڭ بەينەتى كوپ. باياناۋىلدىق باتىربەكتىڭ استاناعا ات باسىن تىرەگەنىنە كوپ بولعان جوق. ەلورداعا ەندى كەلسە دە، كاسىبى كەڭىنەن ەتەك جايىپ كەلەدى. 20 جىلدان اسا ات جالىندا جۇرگەن ازامات بۇگىندە بيە بايلاپ، كۇبى پىسەدى.
باتىربەك قوشقاربايەۆ، كاسىپكەر:
- پايدالى ءىس جاساپ جاتىرمىز دەپ ويلايمىن. بىرىنشىدەن، ەمدەلىپ جۇرگەن كىسىلەر بىزدەن ساۋمال ىشەدى. ءاربىر 2 ساعات سايىن ساۋىلادى. تاڭعى 8-دەن باستاپ تۇنگى 12-گە دەيىن، كەي كەزدە تۇنگى 2-گە دەيىن سۇرانىسقا قاراي ساۋامىز. قازىرگى تاڭدا 4-5 بيە بايلاپ وتىرمىز. ءبىراق اۋىستىرىپ وتىرامىز. ءدال قازىر كۇنىنە ءبىر 20-25 ليتردەي ساتىپ وتىرمىز. ءبىراق كەي كەزدەرى «40-50 ليتر كەرەك»، دەيدى. ول كەزدە جيناپ بەرەمىز.
ساباداعى سارى قىمىزعا سۇرانىس مول. ساۋىم ۋاقىتى دا ۇزاق. سول سەبەپتى كاسىپ يەسى بۇگىندە 2 ادامدى جۇمىسپەن قامتىپ وتىر.
باتىربەكتىڭ قوراسىندا بايلاۋلى بيەدەن بولەك ءمىنىس اتتار دا ەرتتەۋلى. ولار جاي جىلقىلار ەمەس. تالاي دودانى جارىپ جۇرگەن كوكپار اتتارى مەن دالا ءدۇبىرىنىڭ الدى بولعان بايگە تۇلپارلارى. «قالانىڭ ۋ- شۋىنان شارشاعان ادامدار ساۋمال ءىشىپ ەم الادى، سايگۇلىككە ءمىنىپ دەمالادى»، - دەيدى.
باتىربەك قوشقاربايەۆ، كاسىپكەر:
- ءبىز ەندى بيە ساۋۋدان بولەك، اتتاردى جالعا بەرەمىز. بۇل اتتار جاي ءبىر مالعا ءمىنىپ جۇرگەن اتتار ەمەس. بۇلار ۇلى دالا جورىعىنا قاتىسىپ جۇرگەن، بايگە ۇتادى دەگەن اتتار. بۇل ەندى كاسىپتىڭ ەكىنشى ءبىر ءتۇرى بيە ساۋۋدان پايدا ءتۇسىپ جاتسا، بۇل اتتاردى جالعا بەرۋ بيەلەردىڭ جەم-ءشوبىن اقتاپ تۇرادى.
ءيا، قازبالاي بەرسەك، باتىربەكتىڭ بويىنان ءبىراز قاسيەت تابىلادى. جىل سايىن وتەتىن ۇلى دالا جورىعىنا دا ات قوسىپ، كومانداعا جەتەكشىلىك ەتىپ كەلەدى. كوكپاردان پاۆلودار وبلىسىنىڭ قۇراماسىندا وينايتىنى تاعى بار. ءبىر سوزبەن ايتقاندا، اتا كاسىپتى جالعاستىرىپ كەلە جاتقان ادال ازامات.
