استانا قالاسىنداعى ۇلتتىق كيىمدى ۇلىقتاعان ۇزدىك مەكتەپ
استانا. KAZINFORM - ۇلتتىق كيىمدى ۇلىقتاپ جۇرگەن ءبىلىم وردالارىنىڭ ءبىرى - استانا قالاسىنداعى شەيح ءتاميم بەن حاماد ءال-ءتاني اتىنداعى № 85 مەكتەپ-ليتسەيى. مەكتەپ تابالدىرىعىنان اتتاي بەرە قازاقىلىقتىڭ ءيسى اڭقىپ، رۋحىڭ اسقاقتاي تۇسەدى.
بۇعان دەيىن مەكتەپ ۇجىمى ءاز-ناۋرىز قارساڭىندا ۇلتتىق كيىمدى كيۋدى قولعا الا باستاسا، بيىل قىركۇيەك ايىنان باستاپ جوعارى سىنىپ وقۋشىلارى اپتاسىنا كەم دەگەندە ءبىر مارتە كيىپ ءجۇرۋدى داستۇرگە اينالدىرعان.
ال باستاۋىش سىنىپ وقۋشىلارى ساباققا كۇندەلىكتى ۇلتتىق كيىممەن كەلىپ ءجۇر.
بۇل يگى ءداستۇردى اتا-انالار جاپپاي قولداپ، وقۋشىلار ۇلتتىق ويۋلار بەينەلەنگەن بىركەلكى مەكتەپ فورماسىن قالىپتاستىرىپ ۇلگەرگەن.
ءتىپتى، مەكتەپ فورماسىنان بولەك قىزدار شولپى تاعىپ، ۇلدار باسىنا تاقيا كيىپ، مەكتەپتىڭ ءسانىن كەلتىرۋدە.
1 «ءا» سىنىپ وقۋشىسى ايشا ايەتوۆا ءار تاڭدا اناسى شاشىن ءورىپ، شولپى، شەكەلىك تاعىپ بەرەتىنىن ايتادى.
«بۇرىن قۋىرشاقپەن ويناعان كەزدە شاشىن ءورىپ، شولپى تاعۋعا قىزىعاتىن ەدىم. بيىل مەكتەپ تابالدىرىعىن اتتاپ، ساباققا شەكەلىك، شولپى تاعىپ كەلىپ ءجۇرمىن. تاقپاسام، بىردەڭە جەتپەيتىندەي كوڭىلسىز وتىرامىن»، - دەيدى ايشا.
باسىنا تاقياسىن قوندىرعان بەيبارىس تۇرسىندى سىنىپتاستارى «تاقيالى پەرىشتە» دەپ تە اتايتىن كورىنەدى.
«وسكەندە اسكەري قىزمەتشى بولعىم كەلەدى. اتام تاقيانىڭ قاسيەتى جايلى ءجيى ايتادى. سول سەبەپتى مەكتەپتە دە، قوناققا بارعاندا دا كيىپ جۇرەمىن»، - دەيدى ول.
باستاۋىش ءپانى مۇعالىمى اسەم جاناتايەۆا دا ساباققا ۇلتتىق كيىممەن كەلىپ، وقۋشىلارعا ۇلتتىق قۇندىلىقتاردى ناسيحاتتاۋعا ۇلەس قوسىپ ءجۇر.
مەكتەپتە ءسان-سالتاناتى كەلىسكەن كيىز ءۇي بار ەكەن. وندا ساباق بەرۋ مۇعالىمگە دە، وقۋشىلارعا دا قىزىقتى.
ال، ۇلتتىق ويىندار ورتالىعىندا وقۋشىلار توعىزقۇمالاق، اسىق ويناپ، ۇلتتىق سپورت ويىندارىنا دەگەن قىزىعۋشىلىقتارى ارتۋدا.
باستاۋىش ءپانى مۇعالىمى ايگۇل كەنجينا ۇلتتىق كيىم كيىپ جۇرگەن بالالاردىڭ پاتريوت بولىپ وسەتىنىنە سەنىمدى.
«قازاق حالقىنىڭ ۇلتتىق كيىمى وزگە ۇلتتاردان وزگەشە. سەبەبى، اتا-بابامىز تابيعات اياسىندا ەركىن عۇمىر كەشۋىمەن بايلانىستى دەر ەدىم. سوڭعى ۋاقىتتا ءتۇرلى ويۋلارمەن كومكەرىلگەن زاماناۋي ۇلتتىق كيىمدەر پايدا بولدى. بۇل رەتتە، اتا-انالار ۇلتتىق ەلەمەنت بەينەلەنگەن مەكتەپ فورماسىنا تاپسىرىس بەرىپ، وقۋشىلارىمىز سۇپ-سۇلۋ بولىپ ساباققا كەلىپ ءجۇر»، - دەيدى ا. كەنجينا.
مەكتەپ ۇستازدارى دا ۇلتتىق كيىم كيىپ، ساباق بارىسىندا وقۋشىلارعا سالت-ءداستۇر جايلى قىسقا اقپارات بەرىپ وتىرۋدى ادەتكە اينالدىرعان.
ايتا كەتەيىك، شەيح ءتاميم بەن حاماد ءال-ءتاني اتىنداعى № 85 مەكتەپ-ليتسەيى 2018-جىلى 5-قىركۇيەكتە اشىلعان. قازىرگى تاڭدا مۇندا 3044 وقۋشى ءبىلىم الۋدا.
اۆتور
ورالحان قوجانوۆ
