استانا مەن توكيو ەكىجاقتى ىنتىماقتاستىق ماسەلەلەرىن تالقىلادى
استانا. KAZINFORM - قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى الىبەك باقايەۆ پەن جاپونيانىڭ سىرتقى ىستەر مينيسترلىگى ەۋروپا ىستەرى بيۋروسىنىڭ باس ديرەكتورى ماساشي ناكاگومەمەن وتكەن كەلىسسوزدەر بارىسىندا قازاقستان مەن جاپونيا اراسىنداعى ساياسي جانە ەكونوميكالىق ىنتىماقتاستىقتىڭ قازىرگى جاعدايى كەڭىنەن تالقىلاندى.

كەزدەسۋدە تاراپتار ستراتەگيالىق سەرىكتەستىكتى ودان ءارى نىعايتۋدىڭ، ساۋدا-ەكونوميكالىق بايلانىستاردى جانداندىرۋدىڭ، سونداي- اق ەكىجاقتى شارتتىق- قۇقىقتىق بازانى كەڭەيتۋدىڭ نەگىزگى اسپەكتىلەرىن جان-جاقتى قاراستىردى.
سونىمەن قاتار، ب ۇ ۇ جانە ماگاتە سياقتى كوپجاقتى قۇرىلىمدار اياسىنداعى ۇيلەستىرۋدىڭ وزەكتى ماسەلەلەرى بويىنشا پىكىر الماسىلدى.
ەكى تاراپ «ورتالىق ازيا +جاپونيا» ديالوگىنىڭ الداعى ءبىرىنشى ءسامميتىنىڭ ماڭىزدىلىعىن اتاپ ءوتتى.
ءا. باقايەۆ ەلدەرىمىز اراسىنداعى ساياسي جانە ەكونوميكالىق ىنتىماقتاستىقتى نىعايتۋعا جانە ستراتەگيالىق سەرىكتەستىكتى ودان ءارى دامىتۋعا ىقپال ەتۋگە باعىتتالعان جوعارى دەڭگەيدەگى ساپارلاردى ۇيىمداستىرۋدىڭ قاجەتتىلىگىنە توقتالدى.
ءوز كەزەگىندە، م. ناكاگومە كولىك، لوگيستيكا، ادام رەسۋرستارىن دامىتۋ جانە «جاسىل» ەكونوميكا سياقتى باسىم سالالارداعى ءوزارا ءىس-قيمىلدىڭ الەۋەتى تۋرالى حاباردار ەتتى.
كەلىسسوزدەر قورىتىندىسى بويىنشا سۇحباتتاستار قازاقستان مەن جاپونيا اراسىنداعى ءتيىمدى ىنتىماقتاستىقتى ودان ءارى نىعايتۋ ماقساتىندا سىرتقى ساياسي ۆەدومستۆولارى دەڭگەيىندە تىعىز ديالوگتى جالعاستىرۋعا كەلىستى.
اۆتور
ەربول جانات