استانا - بارشامىزعا ورتاق باسپانا - جاپونيا ەلشىسى
استانا. KAZINFORM - قازاقستان رەسپۋبليكاسىنداعى جاپونيانىڭ توتەنشە جانە وكىلەتتى ەلشىسى دجۋن يامادا «تازا قازاقستان» ەكولوگيالىق اكسياسى اياسىندا قالاداعى سەنبىلىككە قاتىستى.
جاپونيا ەلشىلىگىنىڭ وكىلدەرى كەڭەس وداعى كەزىندە تۇتقىندالىپ، قازا تاپقان جاپوندىقتارعا ارنالعان ەسكەرتكىشتىڭ ماڭىن جيناستىردى. سونىمەن قاتار، سەنبىلىككە ەلوردا تۇرعىندارى دا قوسىلدى. ولار قايىڭ، قاراعاي جانە باسقا دا اعاش تۇرلەرىنەن 100 ءتۇپ وتىرعىزدى.
جاپونيانىڭ قازاقستانداعى ەلشىسى تاريح جانە مادەنيەت ەسكەرتكىشتەرىن اباتتاندىرۋ جۇمىستارى وتە ماڭىزدى ەكەنىن اتاپ ءوتتى.
«نۇرا اۋدانىنىڭ بارشا تۇرعىنىنا شىن جۇرەكتەن العىس ايتامىز. قالادا جاپونيا مەن قازاقستان اراسىنداعى دوستىقتىڭ وتە ماڭىزدى ەسكەرتكىشى بار. ءبىز ورتاق ەستەلىگىمىزدى جانە تاريحىمىزدى ماڭگىلىككە ساقتاعىمىز كەلەدى. ەلشىلىك قىزمەتكەرلەرىنىڭ ەلوردا تۇرعىندارى رەتىندە سەنبىلىككە قاتىسۋى دا ۇلكەن مارتەبە. استانا - بارشامىز ءۇشىن ورتاق باسپانا، سوندىقتان قالامىزداعى ءتارتىپ پەن تازالىقتى ساقتاۋ - ورتاق مىندەتىمىز»، - دەدى ەلشى.
ايتا كەتەيىك، ءساۋىر ايىنىڭ باسىندا مەملەكەت باسشىسىنىڭ تاپسىرماسىمەن رەسپۋبليكا بويىنشا «تازا قازاقستان» ەكولوگيالىق اكسياسى باستالدى. ناۋقان بەس اپتاعا سوزىلادى. ءار اپتانىڭ وزىندىك اتاۋى مەن ناقتى ماقساتى بار. وسى اپتاعا «كيەلى مەكەن» اتاۋى بەرىلدى. بۇل كۇندەرى تاريحي- مادەني ەسكەرتكىشتەر اۋماعىن اباتتاندىرۋ جۇمىستارى ىسكە اسىرىلىپ جاتىر.
سونىمەن قاتار، قازاقستان رەسپۋبليكاسى پرەزيدەنتىنىڭ تەلەراديوكەشەنىندەگى 300 دەن استام قىزمەتكەر «تازا قازاقستان» ەكولوگيالىق اكسياسىنا قاتىستى. سەنبىلىك كەزىندە «ءابۋ-دابي پلازا» مەن بوتانيكالىق باق اراسىنداعى 14 گەكتارعا سوزىلعان ساياباقتىڭ اۋماعى تازارتىلدى. وسى ساياباقتان 200 قاپتان استام قوقىس شىعارىلدى.
اۆتور
اسحات رايقۇل
