استانا- الماتى كۇرە جولىنىڭ قۇرىلىسى اياقتالۋعا جاقىن
استانا. KAZINFORM - ورتالىق- وڭتۇستىك دالىزىنە جاتاتىن رەسپۋبليكالىق ماڭىزى بار استانا-الماتى كۇرە جولىنىڭ قۇرىلىسى اياقتالۋعا جاقىن.
قۇرىلىس جۇمىستارى اياسىندا قاراعاندى-بالقاش، بالقاش-بۇرىلبايتال، بۇرىلبايتال-كۇرتى جانە شامالعان ستانتسياسىنىڭ اينالما جولى جوبالارى جۇزەگە اسىپ جاتىر. بۇل جولدىڭ جالپى ۇزىندىعى - 946 شاقىرىم.
كولىك ءمينيسترى مارات قارابايەۆ قۇرىلىس جۇمىستارى ءجۇرىپ جاتقان جول ۋچاسكەلەرىنىڭ باسىنا بارىپ، جاۋاپتى مەردىگەر ۇيىمداردىڭ وكىلدەرىمەن كەزدەسكەن.
«استانا مەن الماتى اراسىنداعى جولدىڭ قۇرىلىس ساپاسىن كورەيالىق Dongsung Engineering جانە ISAN Corporation كومپانيالارى باقىلاۋعا الدى. كومپانيا ينجەنەرلەرى تەحنيكالىق قاداعالاۋدى جۇرگىزىپ، ۇنەمى قۇرىلىس باسىندا»، - دەلىنگەن كولىك مينيسترلىگىنىڭ باسپا ءسوز قىزمەتى ۇسىنعان اقپاراتتا.
كولىك مينيسترلىگىنىڭ اۆتوموبيل جولدارى كوميتەتىندە اتاپ وتكەندەي، ۋچاسكەلەردىڭ ءبىر بولىگى جازدىڭ ورتاسىنان باستاپ قولدانىسقا بەرىلسە، قالعان بولىگى 2024 -جىلدىڭ سوڭىنا دەيىن حالىق يگىلىگىنە تاپسىرىلادى.
ماسەلەن، جالپى ۇزىندىعى 363 شاقىرىم قاراعاندى- بالقاش كۇرە جولىنىڭ بويىندا اينالما جولدار مۇلدەم قالعان جوق. جوبا اياسىندا 11 كوپىر، اۋىل شارۋاشىلىعى تەحنيكاسىنىڭ ءوتۋى ءۇشىن ارنالعان 32 جول وتپەسى، كولىك ايرىعى جانە تەمىر جول ارقىلى وتەتىن جول وتپەسىنىڭ قۇرىلىسى تولىق اياقتالعان. قازىر اباتتاندىرۋ جۇمىستارى جۇرگىزىلىپ جاتىر. سونداي-اق، جولشىلار اسفالتتىڭ جوعارعى قاباتىن توسەپ، جول قوزعالىسى قاۋىپسىزدىگىن قامتاماسىز ەتۋ ءۇشىن ارنايى توسقاۋىل قورشاۋلارىن ورناتىپ جاتىر. نىساندى 2024 -جىلدىڭ قازان ايىندا پايدالانۋعا بەرۋ كوزدەلىپ وتىر.
بىلتىر ماماندار بالقاش-بۇرىلبايتال كۇرە جولىنىڭ جالپى ۇزىندىعى 127 شاقىرىم 3 ۋچاسكەسىن پايدالانۋعا تاپسىردى. بيىل قالعان 3 ۋچاسكە قولدانىسقا بەرىلەدى.
جالپى ۇزىندىعى 81 شاقىرىم كۇرتى-بۇرىلبايتال جولى بيىل جازدا تاپسىرىلادى. قازىر ماماندار جول بويىندا اباتتاندىرۋ جۇمىستارىن جۇرگىزىپ جاتىر. سونىمەن قاتار بيىل جازدا شامالعان بەكەتىنىڭ اينالما جولى دا قولدانىسقا بەرىلمەك.
جوعارىدا اتالعان جول ۋچاسكەلەرى I-ب تەحنيكالىق ساناتىنا سايكەس ءتورت جولاقتى بولاتىنىن اتاپ وتكەن ءجون.
اۆتور
ورالحان قوجانوۆ
