استانا اكىمدىگىنىڭ قىزمەتكەرلەرىنە قاتىستى قىلمىستىق ءىس توقتاتىلدى
استانا. KAZINFORM - ەلوردا اكىمدىگىنىڭ قىزمەتكەرلەرىنە قاتىستى جەر جانە ساۋلەت-قالا قۇرىلىسى زاڭناماسى سالاسىندا كوپتەگەن زاڭبۇزۋشىلىق انىقتالعاننان كەيىن باستالعان قىلمىستىق ءىس توقتاتىلدى.
«2023-جىلعى 15-جەلتوقساندا تەرگەۋ ناتيجەسى بويىنشا سىبايلاس جەمقورلىققا قارسى ءىس-قيمىل اگەنتتىگىنىڭ استانا قالاسى بويىنشا دەپارتامەنتى قىلمىستىق ءىس جۇرگىزۋ كودەكسىنىڭ 35-بابى 1-بولىگى 2-تارماعىنىڭ نەگىزىندە، ياعني قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى قىلمىستىق ءىستى توقتاتۋ تۋرالى شەشىم قابىلداعانىن حابارلايمىز»، - دەلىنگەن قالا پروكۋرورىنىڭ ورىنباسارى ەرجان بەردىبەكوۆتىڭ Kazinform اگەنتتىگىنىڭ رەسمي ساۋالىنا بەرگەن جاۋابىندا.
ەستەرىڭىزگە سالا كەتەيىك، وتكەن جىلى استانا پروكۋراتۋراسى اكىمدىككە تەكسەرۋ جۇرگىزگەن بولاتىن. ناتيجەسىندە جوسپارلاۋ جوباسىن تۇزەتۋ، مەملەكەتتىك جەرلەردى بەرۋ، جوبالاۋ-ىزدەستىرۋ جۇمىستارىنا رۇقسات بەرۋ، سونداي-اق ەسكيزدىك جوبالاردى كەلىسۋ تۋرالى شەشىمدەر قابىلداۋعا بايلانىستى بۇزۋشىلىقتار انىقتالدى.
تەكسەرىس ماتەريالدارى قالا اكىمدىگىنىڭ قىزمەتكەرلەرىنە قاتىستى ق ر قىلمىستىق كودەكسىنىڭ 361-بابى (لاۋازىمدىق وكىلەتتىكتەردى اسىرا پايدالانۋ) بويىنشا انتيكورعا تەكسەرۋگە جىبەرىلدى جانە ودان ءارى قىلمىستىق ءىس قوزعالدى.
بۇعان دەيىن ب ا ق- تا 2019-2022-جىلدار ارالىعىندا جەر ۋچاسكەلەرىن بەرۋگە جانە قالادا قۇرىلىس سالۋعا جاۋاپتى استانا اكىمدىگىنىڭ بولىمشەلەرىن تەكسەرۋ تۋرالى حابارلانعان بولاتىن. وسى كەزەڭدە ەلوردا اكىمى التاي كولگىنوۆ بولدى.
پروكۋراتۋرا باستاپقىدا ونداعان مەكتەپ، اۋرۋحانا مەن بالاباقشا سالۋ جوسپارلانعان ۋچاسكەلەر ءۇشىن جوسپارلاۋ جوباسىن تۇزەتۋدىڭ 61 جاعدايىن انىقتادى. ءبىراق ونىڭ ورنىنا تۇرعىن ۇيلەر مەن ەليتالىق جىلجىمايتىن مۇلىك سالىنعان.
اۆتور
داۋلەت ىزتىلەۋ
