استانا اۋەجايىندا 160 مىڭ دوللار الىپ وتپەك بولعان جولاۋشى ۇستالدى
استانا حالىقارالىق اۋەجايىندا 160 مىڭ ا ق ش دوللارىن الىپ وتپەك بولعان جولاۋشى ۇستالىپ، قۇزىرلى ورگانعا تاپسىرىلدى.
«استانا حالىقارالىق اۋەجايىنىڭ اۆياتسيالىق قاۋىپسىزدىك قىزمەتىنىڭ قىزمەتكەرلەرى ۇشۋ الدىنداعى تەكسەرۋ جۇرگىزۋ بارىسىندا شامامەن 160000 ا ق ش دوللارى كولەمىندەگى قاراجاتتى شەتەلگە الىپ وتپەك بولعان جولاۋشىنى انىقتادى. تەكسەرىستەن كەيىن اۋەجاي قىزمەتكەرلەرى جولاۋشىنى اتالعان قاراجاتپەن بىرگە قۇزىرلى ورگانعا تاپسىردى»، - دەپ حابارلادى استانا حالىقارالىق اۋەجايىنىڭ باسپا ءسوز قىزمەتى.
ەستەرىڭىزگە سالا كەتەيىك، ق ر پرەزيدەنتىنىڭ 2022 -جىلعى 14-ناۋرىزداعى قازاقستان رەسپۋبليكاسىنىڭ قارجىلىق تۇراقتىلىعىن قامتاماسىز ەتۋ جونىندەگى شارالار تۋرالى جارلىعىنا سايكەس، 10000 ا ق ش دوللارىنىڭ بالاماسىنان اساتىن سومادا قولما-قول شەتەل ۆاليۋتاسىن اكەتۋگە تىيىم سالىنادى.
اۆتور
ايدار وسپاناليەۆ
