استانانىڭ وسىنشالىقتى كەرەمەت قالا ەكەنىن بىلمەپپىن نيكولاي كوستەر-ۆالداۋ
استانا. قازاقپارات - Comic Con Astana 2026 فەستيۆالىنە قاتىسۋ ءۇشىن استاناعا كەلگەن دانيالىق اكتەر نيكولاي كوستەر-ۆالداۋ قازاقستانعا قايتا ورالىپ، ماڭعىستاۋدى كورگىسى كەلەتىنىن ايتتى.
بۇل تۋرالى اكتەر Comic Con Astana 2026 اياسىندا وتكەن باسپا ءسوز ماجىلىسىندە ايتىپ بەردى.
ونىڭ سوزىنشە، قازاقستاندا بولعان از ۋاقىتتىڭ وزىندە جەرگىلىكتى حالىقتىڭ قوناقجايلىعى مەن اقجارقىن كوڭىلى ەرەكشە اسەر قالدىرعان.
- مەنى قارسى العان ۇيىمداستىرۋشىلار دا، وسىندا جولىققان ادامدار دا وتە كەرەمەت ەكەن. وسى ساپاردان كەيىن قازاقستانعا مىندەتتى تۇردە تاعى كەلۋىم كەرەك دەپ ويلاپ وتىرمىن. اسىرەسە، ماڭعىستاۋعا بارعىم كەلەدى، — دەدى نيكولاي كوستەر-ۆالداۋ.
سونداي اق اكتەر استانانىڭ ءوزى كۇتكەننەن الدەقايدا زاماناۋي قالا ەكەنىن ايتىپ، قازاقستان تۋرالى العاشقى اسەرىنىڭ وتە جاقسى بولعانىن جەتكىزدى.
- استانانىڭ وسىنشالىقتى كەرەمەت قالا ەكەنىن بىلمەپپىن، - دەدى ول.
سونداي-اق ول ەلدى ەڭ الدىمەن ادامداردىڭ قوناقجايلىعى ارقىلى تانىعانىن جانە قازاقتىڭ ۇلتتىق تاعامدارى ەرەكشە ۇناعانىن اتاپ ءوتتى.
دانيالىق اكتەر كەيىپكەر تاڭداۋدا ءوزى ءۇشىن ەڭ ماڭىزدى قاعيدانى اتادى. اكتەر ءار ۇسىنىلعان رولگە كەلىسە بەرمەيتىنىن ايتتى.
— مەن سومدايتىن كەيىپكەردى تۇسىنە الۋىم كەرەك. ونىڭ ارەكەتىن قۇپتاماۋىم مۇمكىن، ءبىراق نە ۇشىن سولاي ىستەگەنىن ۇعىنعىم كەلەدى. الايدا ەشقاشان كەلىسپەيتىن رولدەر دە بار. مىسالى، بالالارعا زورلىق-زومبىلىق كورسەتەتىن ادامداردىڭ بەينەسىن سومداۋدان باس تارتتىم، - دەدى نيكولاي كوستەر-ۆالداۋ.
اكتەردىڭ ايتۋىنشا، قازىر ول سسەناري مەن كەيىپكەردەن بولەك، فيلمنىڭ كوتەرەتىن تاقىرىبىنا دا ەرەكشە ءمان بەرەدى.
- مەن تەك قىزىقتى وقيعانى عانا ەمەس، بەلگىلى ءبىر ويى، قوعامعا ايتار ءسوزى بار جوبالاردى ىزدەيمىن. جۇمىسىم ويىن-ساۋىقپەن عانا شەكتەلمەي، ادامدارعا قانداي ءدا بىر پايداسىن تيگىزسە دەيمىن. ونىڭ ناتيجەسىن الدىن الا بولجاۋ مۇمكىن ەمەس، ءبىراق مەن ءۇشىن وسى ماڭىزدى، - دەدى ول.
كوستەر-ۆالداۋ سونداي-اق جاسى ۇلعايعان سايىن وزىنە ۇسىنىلاتىن رولدەردىڭ دە وزگەرگەنىن ايتتى.
- بۇرىن اكە ءرولىن العاش رەت سومداۋعا ۇسىنىس السام، قازىر اتا بەينەلەرى دە ۇسىنىلا باستادى. مەن ءۇشىن مانساپتىڭ ەڭ بيىك شىڭى دەگەن ۇعىم جوق. ءار ءرول، ءار جۇمىس جاڭا تاجىريبە بەرەدى. اكتەرلىك ماماندىقتى قىزىقتى ەتەتىن وسى، دەدى ول.
ايتا كەتەيىك، بۇگىن ەلوردادا Comic Con Astana 2026 فەستيۆالى باستالدى.
بۇعان دەيىن Comic Con Astana 2026 فەستيۆالىنىڭ قوناعى، دانيالىق اكتەر نيكولاي كوستەر-ۆالداۋ قازاقستانعا العاشقى ساپارى جايلى اڭگىمەلەگەن ەدى.
