استانالىق وقۋشىنىڭ ەشكى ءسۇتىنىڭ پايداسى تۋرالى ماقالاسى حالىقارالىق عىلىمي جۋرنالدا جاريالاندى
استانا. قازاقپارات - استانا قالاسىنداعى اقان قۇرمانوۆ اتىنداعى №17 مەكتەپ-گيمنازياسىنىڭ 10-سىنىپ وقۋشىسى اەليتا ءادىلحاننىڭ عىلىمي-زەرتتەۋ جۇمىسى حالىقارالىق Oxford Journal of Student Scholarship ستۋدەنتتىك عىلىمي جۋرنالىندا جاريالاندى، دەپ حابارلايدى «24KZ».
ەلوردا اكىمدىگىنىڭ رەسمي سايتىنىڭ جازۋىنشا، جاس زەرتتەۋشىنىڭ «Evaluating the Role of Goat Milk Bioactives in Immune Modulation of Seasonal Allergic Rhinitis» عىلىمي ماقالاسى ماۋسىمدىق اللەرگيالىق رينيت جاعدايىنداعى ەشكى ءسۇتىنىڭ بيولوگيالىق بەلسەندى كومپونەنتتەرىنىڭ ىقتيمال اسەرىن زەرتتەۋگە ارنالعان. زەرتتەۋ بارىسىندا ەشكى ءسۇتىنىڭ قۇرامىنداعى پەپتيدتەر، وليگوساحاريدتەر جانە ماي قىشقىلدارى سەكىلدى بيولوگيالىق بەلسەندى زاتتاردىڭ يممۋندىق جۇيەمەن بايلانىسى قاراستىرىلعان.
اۆتور ولاردىڭ يممۋندىق جاۋاپتى رەتتەۋدەگى ىقتيمال ءرولىن جانە ماۋسىمدىق اللەرگيالىق رينيت جاعدايىنداعى اسەرىن عىلىمي تۇرعىدان زەردەلەگەن. اللەرگيالىق رينيت - ماۋسىمدىق كەزەڭدەردە كوپتەگەن ادامنىڭ ءومىر ساپاسىنا اسەر ەتەتىن كەڭ تارالعان ماسەلەلەردىڭ ءبىرى. وسى تۇرعىدان العاندا، جاس زەرتتەۋشىنىڭ جۇمىسى تاعام قۇرامىنداعى تابيعي بيولوگيالىق بەلسەندى زاتتاردىڭ يممۋندىق جۇيەمەن ءوزارا بايلانىسىن عىلىمي تۇرعىدا قاراستىرۋىمەن ەرەكشەلەنەدى.
اەليتا ءادىلحاننىڭ ماقالاسى 2026 -جىلعى 11- تامىزدا جاريالانعان. زەرتتەۋ جۇمىسىنا جەكە DOI ءنومىرى بەرىلگەن. جاس زەرتتەۋشىنىڭ حالىقارالىق ستۋدەنتتىك عىلىمي باسىلىمدا ماقالاسىنىڭ جارىق كورۋى - ونىڭ عىلىمعا دەگەن قىزىعۋشىلىعى مەن زەرتتەۋ جۇرگىزۋ داعدىسىنىڭ ناتيجەسى. مۇنداي جۇمىستار وقۋشىلاردىڭ اكادەميالىق ىزدەنىسىن ارتتىرىپ قانا قويماي، عىلىمي ويلاۋ قابىلەتىن قالىپتاستىرۋعا جانە حالىقارالىق ءبىلىم كەڭىستىگىنە شىعۋىنا مۇمكىندىك بەرەدى.
استانا قالاسىنىڭ ءبىلىم بەرۋ جۇيەسىندە وقۋشىلاردىڭ زەرتتەۋشىلىك قابىلەتىن دامىتۋعا، عىلىمي جوبالارعا قاتىسۋىنا جانە زاماناۋي عىلىم باعىتتارىن مەڭگەرۋىنە ەرەكشە ءمان بەرىلۋدە. اەليتا ءادىلحاننىڭ جەتىستىگى - ەلوردالىق وقۋشىلاردىڭ عىلىمي- زەرتتەۋ باعىتىنداعى الەۋەتىن كورسەتەتىن جارقىن مىسالداردىڭ ءبىرى.
