استانادا تىركەۋ ءتارتىبى قاتاڭدادى

 ءبىر بولمەلى پاتەرگە جۇزدەگەن ادامدى تىركەي بەرەتىن داۋرەن ءبىتتى. استانا ءماسليحاتى دەپۋتاتتارى نورماتيۆتى ناقتى بەلگىلەدى. جاڭا ەرەجەگە سايكەس ەندى 1 ادامعا باسپانانىڭ تەك 15 شارشى مەترى ءبولىنۋى ءتيىس. بۇل - تانىسىڭىزدى تىركەۋ كەزىندە عانا قاجەتتى ەسەپتىك نورماتيۆ. ال ءۇي يەسىنىڭ وتباسى مۇشەلەرى مەن تۋىستارىنا قاتىسى جوق.

گريگوري گروموۆ، ادۆوكات:

 - ەندى تانىسىڭىزدى سونىڭ ءوتىنىشى بويىنشا باسپاناڭىزعا تىركەگىڭىز كەلسە دە، تىركەي المايسىز. سەبەبى ۇيىڭىزدە ءدال سوعان شاقتالعان 15 شارشى مەتر بولماسا، جۇيە اۆتوماتتى تۇردە سۇراۋىڭىزدى قاناعاتتاندىرمايدى. ال ەگەر ول ءسىزدىڭ الىس تۋىسىڭىز بولسا، وندا حالىققا قىزمەت كورسەتۋ ورتالىعىنا بارىپ، تۋىستىعىڭىزدى راستاۋىڭىز قاجەت. بۇل نورماتيۆ وتباسى مۇشەلەرىنە قاتىستى ەمەس. مىسالى، اتا-اناڭىز، جۇبايىڭىز نەمەسە بالالارىڭىزدى تىركەۋگە ەشقانداي شەكتەۋ جوق.

«جاڭاشىلدىقتىڭ ماقساتى - زاڭسىز تابىس تاۋىپ، باسپاناسىن جاتاقحاناعا اينالدىرعانداردىڭ جولىن كەسۋ»، - دەيدى ماماندار. بۇعان دەيىن قۇقىق قورعاۋ ورگاندارى استاناداعى ءبىر عانا مەكەنجايدا مىڭعا جۋىق ادامنىڭ تىركەلگەن دەرەگىن انىقتاعان. ەندى مۇنداي فاكتىلەر تىركەۋ جۇيەسىندە بىردەن بۇعاتتالادى. ال ەرەجەنى بۇزعاندار اكىمشىلىك جاۋاپقا تارتىلادى. سايكەسىنشە، ايىپپۇل ارقالايدى.

ايان بەيسەنوۆ، قالالىق پروكۋراتۋرا باسقارماسىنىڭ پروكۋرورى:

 - ق ر تىركەۋسىز نە جەكە باسىن كۋالاندىراتىن قۇجاتتارسىز تۇرۋ اكىمشىلىك قۇقىق بۇزۋشىلىق بولىپ تابىلادى. 2026 -جىلدىڭ باسىنان بەرى ەلوردادا تىركەۋسىز تۇرعانى ءۇشىن 47 مىڭنان استام ادام جاۋاپقا تارتىلدى. ولاردىڭ 578- ءى اكىمشىلىك جازا قولدانىلعاننان كەيىن ءبىر جىل ىشىندە قايتا جاساعان. تۇرعىن ءۇي يەسى وندا تۇرعان ادامداردىڭ تىركەۋسىز تۇرۋىنا جول بەرگەن جاعدايدا ق ر اكىمشىلىك قۇقىق بۇزۋشىلىق تۋرالى كودەكستىڭ 493-بابىنا سايكەس اكىمشىلىك جاۋاپقا تارتىلادى.

استانا ءماسليحاتى وسىلايشا پاتەرگە زاڭسىز تىركەۋ ماسەلەسىن شەشۋ ءۇشىن كوشى-قون ساياساتىن رەتتەۋدى قولعا الدى. ەندى پروكۋرورلار باسپانا يەلەرىنە زاڭدى ساقتاپ، ەرەجەنى قاتاڭ ۇستانۋدى ەسكەرتەدى.