استانادا روبوت-يتتەر قوعامدىق ءتارتىپتى كۇزەتۋگە كىرىستى
استانا. قازاقپارات - استانا قالاسىنىڭ پوليتسيا دەپارتامەنتى قوعامدىق ءتارتىپتى باقىلاۋ مەن قۇقىق بۇزۋشىلىقتاردىڭ الدىن الۋ جۇمىستارىنا زاماناۋي تەحنولوگيالاردى بەلسەندى تۇردە ەنگىزۋدە. ەلوردا كوشەلەرى مەن حالىق كوپ شوعىرلاناتىن ورىنداردا ءتورت بىردەي روبوت-ءيت قىزمەتكە كىرىستى، دەپ حابارلايدى «24KZ».
روبوت-يتتەر قايدا جانە قالاي جۇمىس ىستەيدى؟
قازىرگى ۋاقىتتا بۇل روبوت-يتتەر ادام كوپ جينالاتىن ساۋدا ورتالىقتارى مەن قوعامدىق ورىنداردا جۇمىس ىستەپ جاتىر. ولار پوليتسيا قىزمەتكەرلەرىنە قوعامدىق كەڭىستىكتەردەگى احۋالدى باقىلاۋعا تىكەلەي كومەك كورسەتۋدە. قۇرىلعىلار زاماناۋي بەينەكامەرالارمەن جانە جاساندى ينتەللەكت تەحنولوگيالارىمەن جابدىقتالعان. ولار اينالاداعى جاعدايدى قاداعالاپ قانا قويماي، بەينەاقپاراتتى ناقتى ۋاقىت رەجيمىندە تىكەلەي جەدەل باسقارۋ ورتالىعىنا (ج ب و) جىبەرىپ وتىرادى. بۇل ءوز كەزەگىندە پوليتسياعا وقيعالارعا جەدەل باعا بەرىپ، ءتيىستى شارالاردى ۋاقىتىلى قابىلداۋعا مۇمكىندىك بەرەدى.
ىزدەۋدە جۇرگەن ادامداردى انىقتاي الادى
تەحنولوگيانىڭ ەڭ ماڭىزدى مۇمكىندىكتەرىنىڭ ءبىرى - ىزدەۋدە جۇرگەن تۇلعالاردى انىقتاۋعا كومەكتەسۋ. روبوت-يتتەرگە ينتەگراتسيالانعان جاساندى ينتەللەكت جۇيەسى بەت-الپەتتى اۆتوماتتى تۇردە سايكەستەندىرەدى. ەگەر جۇيە ىزدەۋدە جۇرگەن ازاماتتى انىقتاسا، جەدەل باسقارۋ ورتالىعىنا دەرەۋ اۆتوماتتى تۇردە دابىل حابارلاماسى جىبەرىلەدى. بۇل پوليتسيانىڭ جەدەل ارەكەت ەتۋ مۇمكىندىگىن ايتارلىقتاي ارتتىرىپ، قۇقىق بۇزۋشىلاردى ۇستاۋ جۇمىسىنا قوسىمشا قولداۋ كورسەتۋدە.
استانا قالاسىنىڭ پوليتسياسى الداعى ۋاقىتتا دا قاۋىپسىز قالا تۇجىرىمداماسى اياسىندا ىقتيمال قاۋىپتەردىڭ الدىن الۋ، وقيعالارعا دەر كەزىندە ارەكەت ەتۋ جانە ءاربىر ازاماتتىڭ تىنىشتىعىن قورعاۋ ءۇشىن وسىنداي زاماناۋي تەحنولوگيالاردى قولدانۋدى جالعاستىرماق.
