استانادا رەسپۋبليكا كۇنى قالاي اتاپ وتىلەدى

ەلوردا تۇرعىندارى مەن قوناقتارىنا ارناپ كونسەرتتەر، كورمەلەر، سپەكتاكلدەر، سپورتتىق تۋرنيرلەر، مەرەكەلىك اكسيالار، جاڭا نىسانداردىڭ اشىلۋى جانە باسقا دا شارالار ۇيىمداستىرىلادى.

رەسپۋبليكا كۇنىنە وراي ەلوردادا ءبىرقاتار جاڭا نىسان اشىلادى. اتاپ ايتقاندا، م. تولەبايەۆ كوشەسى، 3-مەكەنجايىندا «TANYM SPORT» كوپفۋنكسيونالدى كەشەنى، ال سۇلتان بەيبارىس كوشەسى، 15- مەكەنجايىندا «TANYM ART» كەشەنى جۇمىسىن باستايدى.

سونىمەن قاتار № 2 كوپبەيىندى قالالىق بالالار اۋرۋحاناسىنىڭ قوسىمشا عيماراتى جانە № 2 قالالىق كوپبەيىندى اۋرۋحانانىڭ قابىلداۋ- دياگنوستيكالىق كەشەنىن اشۋ جوسپارلانىپ وتىر.

ۇلتتىق مەرەكەگە وراي استانادا مادەني-ءبىلىم بەرۋ باعدارلاماسى دا ازىرلەندى. ونىڭ اياسىندا ادەبيەت پەن ونەر وكىلدەرىمەن كەزدەسۋلەر، عىلىمي-پراكتيكالىق كونفەرەنسيالار، كورمەلەر، بەلگىلى ءبىر تاقىرىپتاعى كەشتەر، پىكىرسايىستار جانە باسقا دا ءىس- شارالار وتەدى.

20 -قازاندا ساعات 17:00- دە «جاستار» سارايىندا «ەلىم دەپ سوققان جۇرەگىم» اتتى پاتريوتتىق كەش وتەدى. سول كۇنى ەلوردانىڭ بارلىق مەكتەبىندە رەسپۋبليكا كۇنىنە ارنالعان ءبىرىڭعاي سىنىپ ساعاتى ۇيىمداستىرىلادى.

20-24 -قازان ارالىعىندا ەلوردالىق مەكتەپتەردە وقۋشىلار اراسىندا «ەگەر مەن پرەزيدەنت بولسام…» تاقىرىبىندا پىكىرسايىستار جانە «مەنىڭ ەلىم — قازاقستان» اتتى سۋرەت بايقاۋى وتكىزىلەدى.

21 -قازاندا ساعات 11:00- دە ساكەن سەيفۋللين مۋزەيىندە «ۇلت رۋحىن ۇلىقتاعان ساكەن» اتتى مادەني- تانىمدىق كەش وتەدى. سول كۇنى اقجان ءال-ماشاني اتىنداعى № 92 مەكتەپ- ليتسەيىندە وتەگەن سەيىتوۆ اتىنداعى «بولاشاق پروكۋرور» كلۋبىنىڭ قاتىسۋشىلارى اراسىندا «QAZAQSTAN QUIZ» زياتكەرلىك ويىنى ۇيىمداستىرىلادى.

22 -قازان كۇنى ساعات 11:00- دە دوستىق ۇيىندە عىلىمي-ساراپتامالىق توپتىڭ قاتىسۋىمەن كونفەرەنسيا وتەدى.

سول كۇنى ساعات 11:00- دە ورتالىق بالالار مەن جاسوسپىرىمدەر كىتاپحاناسىندا جازۋشى، دراماتۋرگ جولتاي جۇمات- الماش ۇلىمەن «زەردەلى ۇلت — كىتاپ وقيتىن وتباسىنان باستالادى» تاقىرىبىندا كەزدەسۋ ۇيىمداستىرىلادى. كەيىن كىتاپحانادا «ادەبيەت الەمىندەگى تۇنگى كەرۋەن» اتتى ادەبي ءىس-شارا وتەدى. ول كىتاپحانادا ءتۇن وتكىزۋ فورماتىندا ۇيىمداستىرىلادى.

ساعات 19:00- دە «جاستار» سارايىندا «استانا» ەسترادالىق- سيمفونيالىق وركەسترى «ۇلى دالا اۋەنى» اتتى مەرەكەلىك كونسەرتتىك باعدارلاماسىن ۇسىنادى.

23 -قازاندا ساعات 10:00- دە استانا قالاسىنىڭ مەملەكەتتىك ارحيۆىندە وقۋشىلارمەن «ەگەمەن ەلدىڭ ەرتەڭى» اتتى كەزدەسۋ وتەدى.

ساعات 11:00- دە م. اۋەزوۆ اتىنداعى ورتالىق قالالىق كىتاپحانادا مەملەكەت جانە قوعام قايراتكەرى ساۋىتبەك ءابدىراحمانوۆ پەن تاريحشى، تاريح عىلىمدارىنىڭ كانديداتى، پروفەسسور كۇلپاش ءىلياسوۆانىڭ ەلوردانىڭ بەلسەندى جاستارىمەن كەزدەسۋى وتەدى. كەزدەسۋ «بايتاق ەلىم — قازاقستان!» تاقىرىبىنا ارنالادى.

مەرەكەلىك ءىس-شارالار ەلوردانىڭ التى اۋدانىنداعى بەلسەندى ۇزاق ءومىر ءسۇرۋ ورتالىقتارىندا دا ۇيىمداستىرىلادى.

23- قازاندا ساعات 11:00- دە ر. قوشقاربايەۆ داڭعىلى، 29/1 مەكەنجايىندا «ءان- جىرىم ساعان، قازاقستان» اتتى مەرەكەلىك كونسەرتتىك باعدارلاما وتەدى. سول كۇنى كەشكە مادەني باعدارلاما مەملەكەتتىك «ناز» بي تەاترىنىڭ كونسەرتىمەن جالعاسادى. ۇجىم ساعات 19:00- دە «اڭساعان ارمان» اتتى كونسەرت ۇسىنادى.

سونداي- اق ەلوردانىڭ بارلىق التى اۋدانىندا مەرەكەلىك كونسەرتتەر وتەدى.

اتاپ ايتقاندا، 24 -قازاندا پريگورودنىي، وتاۋ، ونەركاسىپ، باعىستان، ءوندىرىس جانە تەمىرجولشىلار تۇرعىن الاپتارىندا، «قورعالجىن»، «جاعالاۋ»، «اتاتۇرىك»، «ايعىرجال» جانە «جاستار» گۇلزارلارىندا، سونداي-اق قالالىق الاڭدا كونسەرتتىك باعدارلامالار ۇيىمداستىرىلادى.

رەسپۋبليكا كۇنى — 25 -قازان كۇنى دە مازمۇندى باعدارلاما جوسپارلانىپ وتىر. ساعات 11:00- دە ونەر مۋزەيى كەلۋشىلەردى «رۋحتى ەل» اتتى لەكسيا-كونسەرتكە شاقىرادى. ال م. گوركي اتىنداعى مەملەكەتتىك اكادەميالىق ورىس دراما تەاترى «ەر- توستىك تۋرالى اڭىز» ەرتەگىسىن ۇسىنادى.

مۋزىكالىق جاس كورەرمەن تەاترى ساعات 16:00- دە «قازاقستان ونەرىنىڭ ماقتانىشتارى» اتتى شىعارماشىلىق كەش وتكىزەدى. ساعات 18:00- دە «اباي — توعجان» مۋزىكالىق دراماسىن ساحنالايدى.

وسى ۋاقىتتا ءا. مامبەتوۆ اتىنداعى مەملەكەتتىك دراما جانە كومەديا تەاترى «جاس اباي» سپەكتاكلىن كورسەتەدى.

بۇدان بولەك، 25 -قازاندا الەۋمەتتىك وسال ساناتتاعى بالالارعا قازاقستاننىڭ ۇلتتىق مۋزەيى مەن «بايتەرەك» مونۋمەنتىنە ەكسكۋرسيالار ۇيىمداستىرىلادى.

مەرەكە كۇندەرى ەلوردا تۇرعىندارى مەن قوناقتارى اۋىل شارۋاشىلىعى جارمەڭكەسىنە دە بارا الادى. جارمەڭكە 24-25 -قازاندا قارقارالى تاسجولى، 1 -مەكەنجايىنداعى «قازانات» يپپودرومىنىڭ اۆتوتۇراعىندا وتەدى.

جارمەڭكەدە قاراعاندى جانە قوستاناي وبلىستارىنىڭ شارۋالارى ءوز ونىمدەرىن ۇسىنادى. ساۋدا ورىندارى ساعات 09:00- دەن 18:00- گە دەيىن جۇمىس ىستەيدى. كەلۋشىلەر جاڭا ازىق-تۇلىك ونىمدەرىن وندىرۋشىلەردىڭ وزىنەن ءتيىمدى باعامەن ساتىپ الا الادى.

رەسپۋبليكا كۇنىن مەرەكەلەۋ باعدارلاماسىندا كاسىبي سپورتشىلاردى، جاستاردى جانە ءتۇرلى جاستاعى قالا تۇرعىندارىن بىرىكتىرەتىن سپورتتىق جارىستارعا دا ەرەكشە كوڭىل بولىنەدى.

15-17- قازان ارالىعىندا «بارىس ارەنادا» جۇزۋدەن الەم كۋبوگىنىڭ كەزەڭى وتەدى. جارىستى تاماشالاۋ ءۇشىن بيلەت ساتىپ الۋ قاجەت.

17-18- قازاندا ساعات 09:00- دەن باستاپ Sana Sport سپورت كەشەنىندە «زاڭ مەن ءتارتىپ» قاعيداتى اياسىندا استانا اكىمدىگىنە قاراستى ۇيىمداردىڭ قىزمەتكەرلەرى اراسىندا ۆولەيبول تۋرنيرى وتەدى.

19-قازاندا اقشوقى-2 مەكەنجايىنداعى پاراليمپيادالىق جاتتىعۋ ورتالىعىندا كورۋ قابىلەتى بۇزىلعان قاتىسۋشىلار اراسىندا توعىزقۇمالاقتان استانا چەمپيوناتى ۇيىمداستىرىلادى. ەرتەڭىندە، 20-قازاندا، ساعات 10:00- دە وسى ورتالىقتا ەستۋ جانە كورۋ قابىلەتى بۇزىلعان قاتىسۋشىلار اراسىندا شاحماتتان اشىق قالالىق چەمپيونات وتەدى.

22-قازاندا ساعات 10:00- دە بەلسەندى ۇزاق ءومىر ءسۇرۋ ورتالىعىندا ەسىل اۋدانىنىڭ زەينەتكەرلەرى اراسىندا شاحمات تۋرنيرى ۇيىمداستىرىلادى.

سول كۇنى ساعات 14:00- دە «مۋا» پەداگوگيكالىق كوللەدجىندە الماتى اۋدانى كوللەدجدەرىنىڭ ستۋدەنتتەرى اراسىندا ۇلتتىق سپورت تۇرلەرىنەن جارىستار وتەدى.

23-قازان كۇنى ساعات 10:00- دە قالامگەرلەر اللەياسىندا بايقوڭىر اۋدانىنىڭ تۇرعىندارى اراسىندا ۇلتتىق سپورت تۇرلەرىنەن سايىستار ۇيىمداستىرىلادى. قاتىسۋشىلار توعىزقۇمالاق، اسىق اتۋ، ارمرەستلينگ جانە لاڭگى تەبۋ سپورت تۇرلەرىنەن باق سىنايدى.

24-قازاندا «بارىس ارەنادا» كۇرەس تۇرلەرىنەن الەم چەمپيوناتى وتەدى. جارىسقا ارنايى بيلەتپەن كىرۋگە بولادى.