استانادا LRT قۇرىلىسى ءۇش باعىتتا جالعاسىپ جاتىر
استانا. قازاقپارات - Tarlan Astana جەڭىل رەلستى كولىك جەلىسىنىڭ ەكىنشى كەزەڭى قوسشى قالاسى، جاعالاۋ شاعىناۋدانى جانە «استانا-1» تەمىرجول ۆوكزالى باعىتتارىن قامتيدى. قۇرىلىس جۇمىستارى قازىر وسى ءۇش باعىتتا ءجۇرىپ جاتىر، دەپ حابارلايدى ەلوردا اكىمدىگىنىڭ رەسمي سايتى.
استانا قالاسىنىڭ اكىمى جەڭىس قاسىمبەكتىڭ ايتۋىنشا، «Tarlan Astana» جەڭىل رەلستى كولىك جۇيەسى ىسكە قوسىلعالى بەرى جولاۋشىلار تاسىمالىنىڭ كولەمى 11,5 ميلليونعا جۋىقتادى. ونىڭ سوزىنشە، بۇل كولىك ءتۇرى قالا تۇرعىندارى اراسىندا سۇرانىسقا يە بولىپ، كۇندەلىكتى قاتىناستىڭ ءبىر بولىگىنە اينالىپ كەلەدى. قوسشى قالاسىنا قاراي تىرەكتەردى، ەستاكادالىق قۇرىلىمدار مەن ستانسيالاردى سالۋ جۇمىستارى جالعاسىپ جاتىر.
قازىرگى ۋاقىتتا 294 تىرەك ورناتىلعان. بۇل جوسپارلانعان كولەمنىڭ %97- ىن قۇرايدى. سونداي-اق 385 ەستاكادالىق قۇرىلىم مونتاجدالعان. جوسپاردىڭ %73- ى ورىندالعان. 2026 -جىلدىڭ سوڭىنا دەيىن №401, 402 جانە 403 ستانسيالاردا بەتونداۋ جۇمىستارىن اياقتاۋ جوسپارلانعان. بۇل باعىتتا بارلىعى ءۇش ستانسيا سالىنادى.
جاعالاۋ شاعىن اۋدانىنا قاراي سەگىز ستانسيا سالۋ كوزدەلگەن. گەولوگيالىق زەرتتەۋ جۇمىستارى اياقتالدى. قازىر قورشاۋلار ورناتىلىپ، ينجەنەرلىك جەلىلەردى كوشىرۋ جانە قايتا ورناتۋ جۇمىستارى جۇرگىزىلىپ جاتىر. ال وڭ جاعالاۋداعى «استانا-1» تەمىرجول ۆوكزالىنا قاراي توعىز ستانسيا سالۋ جوسپارلانعان. ولاردىڭ قاتارىندا №201 اۋىسىپ ءمىنۋ ستانسياسى بار. سىعاناق داڭعىلىنىڭ بويىندا، قابانباي باتىر مەن تۇران داڭعىلدارىنىڭ اراسىنداعى ۋچاسكەدە №201/301 ستانسيالارىنىڭ اۋىسىپ ءمىنۋ تورابىن سالۋ جۇمىستارى جالعاسۋدا. قازاق راديوسى كوشەسى مەن قابانباي باتىر داڭعىلىنىڭ اراسىنداعى ۋچاسكەدە ەكى تىرەككە بەتون قۇيىلعان. سونداي- اق قادالار مەن روستۆەركتەردى ورناتۋ جۇمىستارى جۇرگىزىلىپ جاتىر.
