استانا ماڭىنداعى تۇرعىندار كولىكتەرىن تۇراقتا قالدىرىپ، قوعامدىق كولىكپەن جۇرەتىن بولادى
استانا. قازاقپارت - الداعى ۋاقىتتا استانا ماڭىنداعى ەلدى مەكەن تۇرعىندارى كولىكتەرىن ارنايى توراپتارعا قالدىرىپ، قوعامدىق كولىكپەن جۇرەتىن بولادى. بۇل ماقساتتا شاھاردىڭ شەتكەي اۋداندارىندا كولىك اۋىستىرۋ توراپتارى سالىنباق.
تامىز ايىندا قالانىڭ باس جوسپارىنا ءتيىستى وزگەرىستەر ەنگىزىلگەن ەكەن. ەندى وسى تۇزەتۋلەرگە سايكەس، 6-8 توراپتىڭ قۇرىلىسى قولعا الىنادى. وسىلايشا، استانادا كولىك سانىن ازايتىپ، جولداعى قوزعالىستى وڭتايلاندىرۋ كوزدەلىپ وتىر. سەبەبى قاربالاس مەزگىلدە 3,5 مىڭنان استام ادام قوعامدىق كولىككە مىنەدى. جەڭىل اۆتوكولىكتەردىڭ دە ءنوپىرى قالىڭ. كەلەشەكتە ۋاقىت ۇنەمدەۋ ءۇشىن شاھارعا ءوز كولىگىمەن كىرەتىندەر ونى ارنايى توراپتا قالدىرىپ، ءارى قاراي جەڭىل رەلستى كولىك، اۆتوبۋس نەمەسە ترامۆاي قىزمەتىن پايدالانا الادى.
گۇلدانا ءابىش، «استانا باس جوسپارى» ع ز ج ي قالا قۇرىلىسىن جوسپارلاۋ ءبولىمىنىڭ باس مامانى:
- اۆتوبۋستىڭ ارنايى جەلىسى بولادى. سونداي-اق قالانىڭ كىرە بەرىسىندە كولىك ءنوپىرى قالىڭ جەرلەردە ترامۆاي جانە تارلان جەلىسى دە تارتىلادى. قازىر ءبىز نەگىزىنەن ىسكەرلىك ورتالىقتاردى جوبالاپ جاتىرمىز. سولاردىڭ ماڭىندا كولىك اۋىستىرۋ توراپتارىن، ياعني اۋقىمدى اۆتوتۇراقتاردى قوندىرۋدىڭ امالى قاراستىرىلۋدا. سونىمەن قاتار بۇل ماڭدا تۇرعىنداردىڭ قولايلىعى ءۇشىن قوعامدىق نىساندار سالىنادى. ياعني قالاعا كىرمەي-اق، شارۋاسىن تىندىرىپ كەرى قايتاتىنداي مۇمكىندىك جاسالادى.
ماماننىڭ ايتۋىنشا، ترامۆاي جەلىلەرى «تارلان- استانا» ىسپەتتى بولماق. ايىرماشىلىعى تەگىس جەرمەن جۇرگەنىندە عانا. بۇل ارينە، الداعى ۋاقىتقا قۇرىلعان جوسپار. ال بۇگىنگى تاڭدا «تارلان- استانا» جەلىسىنىڭ ەكىنشى، ءۇشىنشى جانە ءتورتىنشى باعىتتارى سالىنىپ جاتىر. اتاپ ايتقاندا، ەكىنشى جەلى سىعاناق-تۇران-سارىارقا-جەڭىس كوشەلەرى ارقىلى شاھاردىڭ وڭ جانە سول جاعالاۋىن جالعايتىن بولادى. ۇزىندىعى 9 شاقىرىمنان اسادى. 9 ستانسا اراسىنداعى قاشىقتىق 1 شاقىرىمعا جەتەر- جەتپەستەي.
ءۇشىنشى جەلى سىعاناقتان شىڭعىس ايتماتوۆ كوشەسىنە دەيىن تارتىلىپ جاتىر. 8 شاقىرىمنان اساتىن جەلى 9 ستانسانى قامتىماق. ايالدامالار اراقاشىقتىعى 1 شاقىرىمعا جۋىقتايدى. ءتورتىنشىسى - استانا- قوسشى باعىتى. 9 شاقىرىمدىق جەلى بويىندا ءار ءۇش شاقىرىم سايىن ءبىر- ءبىر ستانسادان، ياعني بارلىعى 3 ستانسا قوندىرىلادى.
جالپى «تارلان استانانىڭ» العاشقى جەلىسى ىسكە قوسىلعالى 8 ميلليون جولاۋشى وسى كولىككە ءمىنىپتى. جىل سوڭىنا دەيىن بۇل سان 10 ميلليونعا جەتۋى ابدەن مۇمكىن. قالا اكىمدىگى وسىلاي دەپ توپشىلاپ وتىر. ويتكەنى كەدەرگىسىز جۇيتكيتىن ۆاگوندارعا كۇن سايىن 70 مىڭنان استام ادام وتىرادى.
24.kz
