داستان ساتپايەۆ قازاقستان تۋىن ۇستاعان شەتەلدىك جانكۇيەرگە جەيدەسىن سىيلادى
استانا. KAZINFORM - قازاقستان قۇراماسى مەن انگليانىڭ «بەرنلي» كلۋبىنىڭ شابۋىلشىسى داستان ساتپايەۆ چەمپيونشيپ اياسىندا «لينكولن سيتيگە» قارسى سىرت الاڭدا وتكەن ماتچتان (1:4) كەيىن جانكۇيەرگە ءوزىنىڭ ويىن جەيدەسىن سىيلادى، دەپ حابارلايدى Sports.kz.
Instagram جەلىسىندەگى matchwornroyally اككاۋنتىنىڭ يەسى فۋتبولشىمەن كەزدەسكەن ءساتى تۋرالى جازدى. ماتچ باستالماي تۇرىپ، ساتپايەۆ ونىڭ «چەلسي» كلۋبىنا ارنالعان كوللەكسيالىق كارتوچكاسىنا قولتاڭبا قالدىرعان.
«ساتپايەۆ ستاديونعا كەلگەن كەزدە ونىمەن سويلەسۋدىڭ ءساتى ءتۇستى. ول كوللەكسيالىق كارتوچكاما قولتاڭبا قالدىرۋعا ىقىلاسپەن كەلىستى. داستان ماتچتان كەيىن قازاقستان تۋى ارقىلى مەنى ىزدەپ تابۋعا تىرىساتىنىن ايتتى. ويىن سوڭىندا جانكۇيەرلەرگە قولداۋ كورسەتىپ كەلگەنى ءۇشىن العىس بىلدىرگەننەن كەيىن ماعان ءوزىنىڭ جەيدەسىن سىيلادى. مۇنى ۆيدەودان كورۋگە بولادى. داستان — قازاقستاننان شىققان ەڭ جارقىن فۋتبولشىلاردىڭ ءبىرى. ول انگليادا مانسابىن باستاعان ساتتەن-اق تۇتاس ەلدىڭ ءۇمىتىن ارقالاپ ءجۇر. ۇلكەن راقمەت، داستان، — دەپ جازدى جانكۇيەر.
ەسكە سالايىق، اتالعان كەزدەسۋدە ساتپايەۆ «بەرنليدىڭ» نەگىزگى قۇرامىندا الاڭعا شىعىپ، 60 مينۋت وينادى. كەيىن ونىڭ ورنىنا وليۆەر سوننە شىقتى. قازاقستاندىق فۋتبولشى «چەلسيدەن» جالعا الۋ شارتىمەن «بەرنلي» ساپىندا 2026-27 -جىلعى ماۋسىمنىڭ سوڭىنا دەيىن ونەر كورسەتەدى.
بۇعان دەيىن داستان ساتپايەۆ 90 مينۋت ويناۋعا قاشان دايىن بولاتىنى تۋرالى جازدىق.
