اسكەردە ءجۇرىپ، مۇگەدەك بولىپ قالعان ساربازدى ۇلتتىق ۇلاننىڭ قولباسشىلىعى شەت ەلدە ەمدەتپەكشى

استانا. KAZINFORM - اسكەردە ءجۇرىپ، باس جاراقاتىن العان قاتارداعى جاۋىنگەر ەربايان مۇحتار 6 ايدان بەرى كومادا جاتىر. بۇگىن ق ر ءى ءى م ۇلتتىق ۇلانىنىڭ باسپا ءسوز قىزمەتى ساربازدىڭ دەنساۋلىعىنا قاتىستى رەسمي اقپارات بەردى.

ۇلتتىق ۇلاننىڭ حابارلاۋىنشا، قاتارداعى ەربايان مۇحتاردىڭ باس جاراقاتىن الۋ فاكتىسى بويىنشا ق ر ق ك 440-بابى 4-تارماعىنىڭ 3-بولىگىنە ساي قىلمىستىق ءىس قوزعالعان. بۇل جەردە اسكەري قىزمەتشىلەر اراسىنداعى ءوزارا قارىم-قاتىناستاردىڭ جارعىلىق ەرەجەلەرىن بۇزا وتىرىپ، دەنساۋلىققا اۋىر زيان كەلتىرگەنى ماسەلە بولىپ وتىر.

«قازىرگى ۋاقىتتا بارلىق قاجەتتى ساراپتامالار تاعايىندالدى. سوتقا دەيىنگى تەرگەۋ جالعاسىپ جاتىر. تەرگەۋ بارىسى ق ر ءى ءى م ءا ت د باسشىلىعىنىڭ باقىلاۋىندا. قاتارداعى جاۋىنگەر ە. مۇحتاردىڭ اتا-اناسىنىڭ تالابى بويىنشا وڭالتۋ ەم-شارالارى اياقتالعاننان كەيىن ۇيىنە شىعارىلعانىن حابارلايمىز. سونىمەن قاتار، دەنساۋلىق ساقتاۋ مينيسترلىگىنىڭ ەمدەۋ مەكەمەسى ق ر ءى ءى م ۇلتتىق ۇلانىنىڭ اسكەري-مەديتسينالىق باسقارماسىمەن بىرلەسىپ وعان مۇگەدەكتىكتى رەسىمدەۋ بويىنشا كومەك كورسەتەدى»، - دەلىنگەن حابارلامادا.

بۇدان بولەك، ق ر ءى ءى م ۇلتتىق ۇلانىنىڭ باس قولباسشىلىعى رەسەي فەدەراتسياسىنىڭ ۆ. م. بەحتەريەۆا اتىنداعى پسيحياتريا جانە نەۆرولوگيا ۇلتتىق مەديتسينالىق زەرتتەۋ ورتالىعىنا، س. م. كيروۆ اتىنداعى اسكەري-مەديتسينالىق اكادەمياسىنا جانە پروفەسسور ا. ل. پولەنوۆ اتىنداعى رەسەي عىلىمي-زەرتتەۋ نەيروحيرۋرگيالىق ينستيتۋتىنا، سونداي-اق كونسۋلتاتسيالىق كومەك بەرۋ جانە اۋرۋحاناعا جاتقىزۋ ماسەلەسىن قاراستىرۋ ءۇشىن تۇركيا ەلشىلىگىنە حات جولداعانى بەلگىلى بولدى.

ەسكە سالا كەتەيىك، بۇعان دەيىن جامبىل وبلىسى وتار اۋىلىندا اسكەردە ءجۇرىپ كوماعا تۇسكەن 19 جاستاعى سارباز اۋرۋحانادان شىققانىن جازعان بولاتىنبىز.

ال، بۇگىن اسكەرگە ءوز ەركىمەن بارىپ، مۇگەدەك بولىپ قالعان ساربازدىڭ تۋىستارى حالىقتان كومەك سۇراعانىن ءبىرقاتار ب ا ق جازعان بولاتىن.

اۆتور
باقىتگۇل اباي قىزى