اسحات ايماعامبەتوۆ جەراستى سۋىن قازىر قولدانباي، كەلەر ۇرپاققا ساقتاۋدى ۇسىندى
ماجىلىستە سۋ رەسۋرستارىنىڭ باسقارىلۋ تيىمدىلىگىنە جۇرگىزىلگەن اۋديتورلىق ءىس-شارالاردىڭ قورىتىندىسىن تالقىلاۋ كەزىندە دەپۋتات اسحات ايماعامبەتوۆ جەراستى سۋىن قازىر قولدانباي، كەلەر ۇرپاققا ساقتاۋدى ۇسىندى، دەپ حابارلايدى Kazinform.
«جەراستى سۋىن پايدالانۋ بويىنشا قانداي ستراتەگيالارىڭىز بار؟ جەراستى سۋىن اشۋعا بولمايتىن قور رەتىندە ۇستاۋىمىز كەرەك دەپ ەسەپتەيمىن. ونى تەك كەلەر ۇرپاقتىڭ پايدالانۋىنا ساقتاۋىمىز قاجەت»، - دەدى ءماجىلىس دەپۋتات اسحات ايماعامبەتوۆ.
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆتىڭ ايتۋىنشا، اتالعان ماسەلەلەردى ۇلتتىق گيدروگەولوگيا قىزمەتىن قۇرۋ ارقىلى شەشۋ كوزدەلىپ وتىر.
«قازىر بۇل قىزمەت ءتۇرلى مەملەكەتتىك ورگانداردىڭ قۇرامىندا شاشىراڭقى جۇمىس ىستەپ جاتىر. ءبىز سونىڭ ءبارىن بىرىكتىرىپ، جۇمىسىن جۇيەلەندىرەمىز. 2024 -جىلى وسى جۇمىستى باستايمىز دەپ ويلايمىن»، - دەدى مينيستر.
اۆتور
ەسىمجان ناقتىباي
