پاريجدە سپورتشىلارىمىزدىڭ دەنساۋلىعىنا جاۋاپتى قانشا مامان بار - باس دارىگەردىڭ جاۋابى

پاريج. KAZINFORM - جەر بەتىندە ادام دەنساۋلىعىنان باعالى، عۇمىرىنان بيىك ەشتەڭە جوق. سپورتشىلارىمىز دا ساۋ دەنەلى بولعاندا عانا بيىك بەلەستەردى باعىندىرا الادى. جارىس بار جەردە جاراقات تا بولىپ جاتادى. ونداي جاعدايدا سپورتشىلارىمىزعا كىمدەر، قانداي دارىگەرلەر قول ۇشىن سوزىپ ءجۇر؟

بۇگىن kazinform ءتىلشىسى وسى سۇراقتارعا جاۋاپ الۋ ءۇشىن پاريج وليمپياداسىندا جۇرگەن سپورت جانە تۋريزم مينيسترلىگىنىڭ ۇلتتىق سپورتتىق مەديتسينا جانە وڭالتۋ ورتالىعى وليمپيادا ويىندارى مەدشتابىنىڭ باس دارىگەرى بەرىك قىڭىربەكوۆپەن ارناي سۇحباتتاسقان ەدى.

- بەرىك بەيسەمباي ۇلى، وليمپيادا ويىندارىنا كەلگەن سپورتشىلارىمىزدىڭ دەنساۋلىعىنا جاۋاپتى باس دارىگەر ەكەنسىز. سپورتشىلارىمىزعا سىزدەردىڭ تاراپتان قانداي كومەكتەر جاسالىپ جاتىر؟

- جالپى سوڭعى توكيو وليمپياداسى ويىندارىنان كەيىنگى پاريج وليمپياداسىنا دەيىنگى سيكلدىك مەرزىمدە ۇلتتىڭ قۇراما سپورتشىلارىنا «ۇلتتىق سپورتتىق مەديتسينا جانە وڭالتۋ ورتالىعى» قىسقاشا ورتالىق تاراپىنان وراسان زور جۇمىستار اتقارىلدى. وزدەرىڭىزگە ءمالىم، بارلىق جازدىق وليمپيادالىق سپورت تۇرلەرىنەن وليمپيادا ليتسەنزياسىن يەمدەنۋ ءۇشىن ءتۇرلى وقۋ- جاتتىعۋ جيىندارى، ءتۇرلى الەمدىك جانە رەسپۋبليكالىق دەڭگەيدە سپورت جارىستارى ءوتتى.

سولاردىڭ بارلىعىندا ءبىزدىڭ ورتالىقتىڭ دارىگەرلەرى مەن ەمدىك ۋقالاۋشىلارى (ماسساجيست) ءوز ۇلەستەرىن قوسقان بولاتىن. سونىڭ ىشىندە بىرىنشىدەن - مەديتسينالىق- بيولوگيالىق قامتاماسىز ەتۋ، سونىڭ ىشىندە فارماكولوگيالىق ءدارى- دارمەكپەن جابدىقتاۋ جانە ماماندارمەن قولداۋ، ەكىنشىدەن - جىلىنا ەكى رەت تەرەڭدەتىلگەن مەديتسينالىق تەكسەرىستەن ءوتۋ، ۇشىنشىدەن - كوماندا دارىگەرىنىڭ تاعايىنداۋى بويىنشا، سونداي-اق كوماندا باسشىلارىمەن، باس جاتتىقتىرۋشىمەن كەلىسىلگەن كەزەڭدەگى مەديتسينالىق تەكسەرىستەن ءوتۋ، تورتىنشىدەن - ورتالىقتا جانە ورتالىقتان تىس جاسالعان جاراقات، سىرقاتتاردان كەيىنگى قالپىنا كەلتىرۋ جۇمىستارىن جۇرگىزۋ، بەسىنشىدەن - ءىرى ليتسەنزيالىق تۋرنيرلەردە، الەم جانە ازيا چەمپيوناتىندا پيسيحو-ەموتسيونالدىق قولداۋ، التىنشىدان - پاريج وليمپياداسىنا ليتسەنزيا العان سپورتشىلارعا تولىققاندى ماماندارمەن، مەديكو- بيولوگيالىق، فارماكولوگيالىق كومەك كورسەتۋ جۇمىستارى كىرەدى.

- جالپى وليمپيادا ويىندارىنا قانشا دارىگەر، قانشا ماسساجيست كەلدىڭىزدەر؟

- وليمپيادا ويىندارىنا سپورت جانە تۋريزم مينيسترلىگى «سپورتتى دامىتۋ ديرەكسياسى» تاراپىنان دارىگەرلەرگە ۇلكەن قولداۋ بىلدىرگەنىن كورىپ وتىرمىز. ويتكەنى سوڭعى توكيو 2021 وليمپياداسىمەن سالىستىرعاندا سپورتشىلارعا قولداۋ رەتىندە كەلگەن دارىگەرلەر مەن ماسساجيستتەر سانى بىرنەشە ەسە كوپ. ناقتى ايتقاندا وليمپيادالىق اۋىلدا جالپى 12 مامان بار. ولار: باس دارىگەر – 1، دارىگەرلەر – 5، دارىگەر (پسيحولوگ) – 1، ەمدىك ۋقالاۋشى ( ماسساجيست) - 5 مامان بار. سونداي-اق، قوسىمشا وليمپيادالىق اۋىلدان تىس 2 دارىگەر، 9 ەمدىك ۋقالاۋشى (ماسساجيست) بار. جالپى، پاريج وليمپياداسىندا 23 مامان جۇمىس اتقارىپ جاتىرمىز.

ايتا كەتەرلىك جايت، بارلىق دارىگەر مەن ماسساجيستتەر ەڭ ءبىرىنشى بەكىتىلگەن سپورت ءتۇرى بويىنشا جارىس كەستەسى بىتكەنگە دەيىن جۇمىسىن اتقارىپ، بىتكەن سوڭ كوماندامەن بىرگە ەلىمىزگە ورالادى. الدىن الا «سپورتتى دامىتۋ ديرەكسياسى» جانە «ۇلتتىق وليمپيادالىق كوميتەت» بىرگە اقىلداسىپ، كەزەكشىلىك كەستەسى بويىنشا جۇمىستارىن اتقارۋدا.

- سىزدەردىڭ نەگىزگى، ناقتى اتقاراتىن قىزمەتتەرىڭىز قانداي؟

- ءبىزدىڭ نەگىزگى مىندەتىمىز ۇلتتىق قۇراما سپورتشىلارىن، ق ر دەلەگاتسياسىنا مەديتسينالىق-بيولوگيالىق، العاشقى كومەك كورسەتۋ. جالپى فيزيكالىق جۇكتەمەدەن كەيىنگى جانە سىرقات، جاراقاتتاردان كەيىنگى قالپىنا كەلتىرۋ (رەابيليتاتسيا) جانە جارىس الدىندا، جارىستان كەيىنگى پيسيحو- ەموتسيونالدىق قولداۋ ءىس-شارالارىن اتقارۋ.

- ەگەر ءبىر سپورتشى جاتتىعۋدا، نە بولماسا جارىس بارىسىندا جاراقات الىپ قالسا، ارى قاراي جارىسقا جىبەرمەۋگە سىزدەر پارمەن بەرە الاسىزدار ما؟

- ەگەر سپورتشى وسىنداي جاۋاپتى جارىس الدىندا نەمەسە كەيىن قانداي دا ءبىر جاراقات الىپ جاتسا، ەڭ ءبىرىنشى كوماندا دارىگەرى تىكەلەي كوماندا باسشىلارىمەن اقىلداسىلىپ، سوڭىندا باس دارىگەرلەرمەن بىرگە كونسيليۋم جاسالىپ، ءبىرجاقتى شەشىمى شىعارىلادى. جالپى، بۇل جاراقاتتىڭ ءتۇر-سيپاتىنا، اقىرى قانداي اۋىر جاعدايعا اكەلۋى مۇمكىن اسقىنۋلار جانە ەڭ باستىسى سپورتشىنىڭ دەنساۋلىعىن ءبىرىنشى ورىنعا قويىپ شەشىلەتىن پروتسەسس.

- اڭگىمەڭىزگە راحمەت!

اۆتور

كۇنسۇلتان وتارباي