پاريج-2024: وڭتۇستىك سۋدان ءانۇرانىنىڭ ورنىنا سۋدان مەملەكەتىنىڭ گيمنى شىرقالدى

استانا. قازاقپارات - الەم نازارى اۋعان پاريجدەگى وليمپيادا ويىندارى كۇن وتكەن سايىن قىزا تۇسۋدە، دەپ حابارلايدى 24kz.

سىن ساعاتتا ءتۇرلى كەدەرگىلەرگە تاپ بولعان سپورتشىلار شەبەرلىگىنىڭ ارقاسىندا قانجىعالارىن مەدالمەن مايلاپ جاتىر. ماسەلەن، ۇلى بريتانيالىق ۆەلوشاباندوز جارىس كەزىندە ۆەلوسيپەدىنىڭ دوڭگەلەگى جارىلسا دا، مارە سوڭىندا قارسىلاسىن باسىپ وزدى. ال جاتتىعۋ كەزىندە ساۋساعىن سىندىرىپ العان اۆستراليالىق جارىسقا قاتىستى.

پاريجدىڭ سپورت ساحناسىنداعى قىزىقتى اقپاردى ارنا ءتىلشىسى تىزبەكتەپ بەرەدى.

پاريج وليمپياداسىندا باسكەتبولدان ەرلەر قۇراماسىنىڭ كەزدەسۋى الدىندا وڭتۇستىك سۋدان ءانۇرانىنىڭ ورنىنا سۋدان مەملەكەتىنىڭ گيمنى شىرقالدى. وڭتۇستىك سۋدان - 2011 -جىلى تاۋەلسىزدىك العان كورشىلەس ەل. قىسقا عانا ۇزىلىستەن سوڭ قاتە تۇزەتىلىپ، وڭتۇستىك سۋداننىڭ ءانۇرانى قويىلدى. ولقىلىققا قاراماستان، افريكالىق قۇراما كورشىلەرىن 90:79 ەسەبىمەن جەڭىپ كەتتى. ۇيىمداستىرۋ كوميتەتى بولسا، باسكەتبولشىلار مەن جانكۇيەرلەردەن كوپشىلىك الدىندا كەشىرىم سۇرادى.

اۆستراليالىق سپورتشى وتادان كەيىن سايىسقا تۇسەدى

اۆستراليالىق كوگالداعى حوككەي ويىنشىسى مەتت دوۋسون پاريج وليمپياداسىنا قاتىسۋ ءۇشىن ساۋساعىن كەستىرۋگە ءماجبۇر بولدى. ول ەكى اپتا بۇرىن جاتتىعۋ كەزىندە ساۋساعىن سىندىرىپ العان. ءبىراق مەتت وليمپيادادا اۆستراليا نامىسىن قورعاۋ ءۇشىن شۇعىل وتا جاساتتى. دارىگەرلەردىڭ سوزىنشە، وپەراتسيادان كەيىن قالىپقا كەلۋ مەرزىمى - 6 اي. ءبىراق سپورتشى دودادا باق سىناپ، ويىنعا ورالاتىنىن ايتتى.

وزبەكستان قۇراماسى العاشقى التىنىن الدى

وليمپيادا ويىندارىندا ايەلدەر اراسىندا دزيۋدودان 52 كەلى سالماق دارەجەسىندە كۇرەسكەن وزبەكستاندىق ديەرا كەلديەروۆا الەم چەمپيونى اتاندى. بۇل - وزبەكستان قۇراماسى ءۇشىن پاريج وليمپياداسىنداعى العاشقى جەڭىس. ديەرا قارسىلاسى ايگىلى جاپون دزيۋدوشىسى ۋتا ابەنى ويسىراتا جەڭىپ، اقتىق سايىستا كوسوۆالىق ديستريا كراسنيچتەن باسىم ءتۇستى. وسىلايشا، وزبەكستان قۇراماسى ءبىر عانا التىن مەدالمەن جالپى كوماندالىق كەستەدە ون ەكىنشى ورىنعا شىقتى. ال جاۋىرىنى جەرگە تيمەگەن قارسىلاسى جەڭىلىستى اۋىر قابىلدادى.

ۆەلوسيپەد دوڭگەلەگى جارىلعان شاباندوز التىن مەدال ەنشىلەدى

ۇلى بريتانيا قۇراماسىنىڭ سپورتشىسى توم پيدكوك تاۋ ۆەلوجارىسىنىڭ ءۇشىنشى اينالىمىندا ۆەلوسيپەدىنىڭ الدىڭعى دوڭعالاعى تەسىلىپ، قارسىلاسىنان ارتتا قالدى. ءبىراق ۆەلوشاباندوز تاباندىلىق تانىتىپ، العا جىلجۋدان ەش تايىنعان جوق. مارەگە بىرنەشە سەكۋند قالعاندا فرانسۋز سپورتشىسى ۆيكتور كورەتسكيدى باسىپ وزىپ، 9 سەكۋند ارتىقشىلىقپەن جەڭىسكە جەتتى. وسىلايشا، توم وليمپيادا چەمپيونى اتاندى. ال فرانسۋز ۆەلوشاباندوزى كۇمىس جۇلدەنى يەمدەنسە، وڭتۇستىك افريكالىق الان حاتەرلي قولا مەدالدى قانجىعاسىنا بايلادى.

اۆتورى: ءاسيا نۇرلىبايەۆا