ارمەنيانىڭ رەسەيدەن الشاقتاۋ ۇدەرىسى: ەۋروپا وداعى ارمەنيا يمپورتىنا سالىقتاردى ۋاقىتشا توقتاتادى

ە و كەڭەسى وداققا مۇشە مەملەكەتتەردىڭ ارمەنيا ونىمدەرىنىڭ ساۋداسىن ىرىقتاندىرۋعا ارنالعان ۋاقىتشا شارالاردى رەسمي تۇردە ماقۇلداعانىن حابارلادى.

مالىمدەمەگە سايكەس، جاڭا شارالار ارمەنيانىڭ ە و- عا ەكسپورتتايتىن تاۋارلارىنىڭ شامامەن %80- ىن قازىرگى ساۋدا شەكتەۋلەرىنەن بوساتادى. ءبىرقاتار تاۋارلاردى، سونىڭ ىشىندە اۋىلشارۋاشىلىق ونىمدەرىن يمپورتتاۋعا سالىناتىن كەدەندىك باجدار ەكى جىل مەرزىمگە توقتاتىلادى.

ارمەنيانىڭ سىرتقى ساياساتىندا ەۋرووداقپەن جاقىنداسۋ جانە رەسەيدەن الشاقتاۋ ۇدەرىسى ەلدىڭ ساۋدا-ەكونوميكالىق قاتىناستارىنىڭ تۇبەگەيلى قايتا قۇرىلۋىنا الىپ كەلدى. ساياسي تەكەتىرەستەر اياسىندا رەسەيمەن تاۋار اينالىمى %21,5- عا قىسقارىپ، 2,196 ميلليارد دوللاردى قۇرادى، ال ارمەنيانىڭ سىرتقى ساۋداسىنداعى رەسەيدىڭ ۇلەسى %35,1- دان %28- عا دەيىن تومەندەدى. بۇعان رەسەي تاراپىنان فيتوسانيتارلىق تالاپتاردى سىلتاۋراتىپ، ارمياننىڭ گۇل، جەمىس-جيدەك، ءسۇت، بالىق ونىمدەرى مەن مينەرالدى سۋلارىنا ەنگىزىلگەن شەكتەۋلەرى مەن ە ا ە و ەلدەرىنە ترانزيتىن بۇعاتتاۋى دا ايتارلىقتاي اسەر ەتتى.

 مۇنداي ەكونوميكالىق قىسىمعا جاۋاپ رەتىندە ەۋرووداق كەڭەسى ارمەنيا ءۇشىن ساۋدانى ليبەراليزاتسيالاۋ شارالارىن رەسمي تۇردە بەكىتىپ، ارميان ەكسپورتىنىڭ شامامەن %80- ىن كەدەندىك تاۋار باجدارىنان بوساتىلدى. بۇل جەڭىلدىكتەردىڭ ارقاسىندا ارمەنيانىڭ ە و باعىتىنداعى تاۋار ەكسپورتى شامامەن %70- عا ءوستى. دەگەنمەن، ارمەنيانىڭ ەنەرگيا رەسۋرستارىنا، اتاپ ايتقاندا گازدىڭ %78- ىنا قاتىستى رەسەيگە تاۋەلدىلىگى ءالى دە ساقتالىپ وتىر، ءبىراق ەريەۆان ە و- عا مۇشەلىككە ءوتىنىم بەرۋدى جوسپارلاي وتىرىپ، باتىس نارىعىنا ينتەگراتسيالانۋدى بەلسەندى جالعاستىرۋدا.

ە و كەڭەسى ۋاقىتشا شارالار ارمەنيادان ەۋروپا وداعىنا ساۋدا اعىندارىن قولداۋعا جانە ارتتىرۋعا ارنالعانىن اتاپ ءوتتى. سونىمەن قاتار، ەگەر ارمەنيا ونىمدەرىن يمپورتتاۋ ە و وندىرۋشىلەرىنە تەرىس اسەر ەتە باستاسا، بريۋسسەل وداق نارىعى ءۇشىن قورعانىس شارالارىن قابىلداي الادى.

بۇرىن ەۋروپا پارلامەنتى بەكىتكەن ەرەجەنى ە و كەڭەسى قابىلداپ، زاڭنامالىق پروتسەدۋرانى اياقتاعان.

قۇجات ە و- نىڭ رەسمي جۋرنالىندا جاريالانعاننان كۇننىڭ ەرتەڭىنە كۇشىنە ەنەدى جانە ەكى جىل بويى كۇشىندە بولادى.

ەۋروپا كوميسسياسىنىڭ باسشىسى ۋرسۋلا فون دەر ليايەن بۇعان دەيىن ە و ارمەنيا ەكسپورتىنىڭ شامامەن %80- ىن كەدەندىك باجدان بوساتۋ مۇمكىندىگىن بەرۋدى كوزدەپ وتىرعانىن مالىمدەگەن بولاتىن. ول بۇل شارالاردى ەريەۆاندا ارمەنيا پرەمەر-ءمينيسترى نيكول پاشينيانمەن كەزدەسۋدەن كەيىن جاريالاعان.