ارميانىڭ قوعاممەن قارىم-قاتىناسى دا وزگەرۋگە ءتيىس - توقايەۆ

اقوردانىڭ باسپا ءسوز قىزمەتىنىڭ حابارلاۋىنشا، نەگىزگى ماسەلە - اسكەري رەفورما جوسپارىنىڭ جوباسى.

مەملەكەت باسشىسى ەلىمىزدەگى اۋقىمدى وزگەرىستەردى ەسكەرە وتىرىپ، قورعانىس سالاسىن رەفورمالاۋ جونىندە ۇسىنىستار ازىرلەۋدى جانە ونى قاۋىپسىزدىك كەڭەسىنىڭ قاراۋىنا ەنگىزۋدى تاپسىردى.

پرەزيدەنت قىسقا مەرزىمدە زاماناۋي، ۇتقىر ءارى تەحنولوگيالىق تۇرعىدان وزىق ارميا قۇرۋدىڭ ايرىقشا ماڭىزىنا نازار اۋداردى.

- قارۋلى كۇشتەردىڭ ساپاسىن وزگەرتۋ مىندەتى قويىلدى. وزگەرىستەر باسقارۋ ءىسىن، اسكەري قىزمەتشىلەردى دايارلاۋدى، كادر ساياساتىن، اسكەري ءبىلىم بەرۋدى، قورعانىستى جوسپارلاۋ مەن تەحنولوگيالىق جاراقتاندىرۋدى قامتۋعا ءتيىس. اسكەري قىزمەتتىڭ قاۋىپسىزدىگىنە، اسكەرگە باسشىلىق ەتۋ مادەنيەتىنە جانە مەملەكەت رەسۋرستارىن ءتيىمدى پايدالانۋعا ايرىقشا ءمان بەرۋ كەرەك. ارميانىڭ قوعاممەن قارىم-قاتىناسى دا وزگەرۋگە ءتيىس. كەشەندى رەفورما قاجەت. بۇل ىستە تولىققاندى شەشىمدەر قابىلدانبايىنشا، كوزدەگەن ناتيجەگە جەتۋ مۇمكىن ەمەس، - دەدى قاسىم-جومارت توقايەۆ.

ەسكە سالايىق، بۇعان دەيىن پرەزيدەنت - قارۋلى كۇشتەردىڭ جوعارعى باس قولباسشىسى قاسىم-جومارت توقايەۆ قورعانىس ءمينيسترىنىڭ ءبىرىنشى ورىنباسارى - قارۋلى كۇشتەر باس شتابىنىڭ باستىعى ايتقۇرمان وماربەكوۆتى جانە قورعانىس ءمينيسترىنىڭ ورىنباسارى تاتيانا ساۆەليەۆانى قابىلداعان ەدى.

مەملەكەت باسشىسى قارۋلى كۇشتەردىڭ قازىرگى قىزمەتى مەن جاۋىنگەرلىك ازىرلىگى، اسكەري دايارلىق ءىس-شارالارىن قارجىلاي قامتاماسىز ەتۋ، قورعانىس مينيسترلىگى بيۋجەتىنىڭ ورىندالۋى تۋرالى ەسەپتى تىڭدادى.