ەلوردادا كوپىردەن سەكىرگەن جۇكتى ايەلدىڭ جاعدايى قالاي

نۇر-سۇلتان. قازاقپارات - نۇر-سۇلتان قالاسىنىڭ دەنساۋلىق ساقتاۋ باسقارماسى ەلوردادا كوپىردەن سەكىرىپ كەتكەن جۇكتى ايەلدىڭ جاعدايى تۋرالى مالىمەت بەردى، دەپ حابارلايدى قازاقپارات ءتىلشىسى.

قالالىق دەنساۋلىق ساقتاۋ باسقارماسى باسپا ءسوز قىزمەتىنىڭ حابارلاۋىنشا، ايەلدىڭ قۇرساعىنداعى تىرشىلىك يەسى ازىرگە امان.

«جاعدايى تۇراقتى. مەديتسينا قىزمەتكەرلەرىنىڭ باقىلاۋىندا، تەكسەرۋدەن ءوتىپ جاتىر. بەيىندى مامانداردىڭ بارلىق قاجەتتى كومەگىن الىپ جاتىر»، - دەدى قالالىق دەنساۋلىق ساقتاۋ باسقارماسىنىڭ وكىلدەرى.

ەسكە سالا كەتەيىك، كەشە ەلوردالىق پوليتسەيلەر وزەنگە سەكىرگەن جۇكتى ايەلدى قۇتقارعان بولاتىن. 3-قازان كۇنى استانالىق پوليتسەي الماز قۇلتانوۆ قابانباي باتىر داڭعىلىندا قىزمەت بابىمەن ءجۇرىپ، ساعات 12:20 شاماسىندا «رامستور» ساۋدا ءۇيى ماڭىنداعى ەسىل وزەنىنىڭ كوپىرىندە بەيتانىس قىزدىڭ ادەتتەن تىس ارەكەتتەرىن بايقاپ قالادى. كەنەت قىز سىرت كيىمدەرىن شەشىپ، سۋعا سەكىرۋگە ارەكەتتەنەدى. ول دەرەۋ جەدەل باسقارۋ ورتالىعىنىڭ كەزەكشىسىنە حابارلاپ، ءوزى كوپىرگە قاراي بەتتەيدى. ول كەزدە ايەل دە سۋعا سەكىرىپ ۇلگەرگەن ەدى. قۇلتانوۆ تا ونىڭ ارتىنان سۋعا سەكىرەدى.

«ءتارتىپ ساقشىسى ايەلگە دەيىن ءجۇزىپ بارىپ، كيىمىنەن ۇستاپ، جاعاعا قاراي بەت الدى. وسى كەزدە سەرىكتەرى اسىلحان نۇرمۇحامبەتوۆ قۇتقارۋ شەڭبەرىن لاقىتىرىپ، نۇرسۇلتان ساريەۆ تە سەرىگىنە كومەكتەسۋ ءۇشىن سۋعا سەكىردى»، - دەپ جازادى Polisia.kz.

بۇعان دەيىن دارىگەرلەر ەلورداداعى كوپىردە جول اپاتىنان امان قالعان 18 جاستاعى قىزدىڭ جاعدايى تۋرالى دا ايتقان بولاتىن.

اۆتور: ەسىمجان ناقتىباي